Oops! This image does not follow our content guidelines. To continue publishing, please remove it or upload a different image.
في ليلة شتوية كانت جميلة واقفة جمب باب بيتها وماسكة طرف توبها باين عليها القلق، بعد انتظار دام نص ساعة أخيراً ملامح الارتياح بدت تظهر على وشها قالت بي لهفة:
- آلحاج علو خير خبارك الليلة متأخر!
* انتي لسة ما نمتي ادخلي البرد دا شديد هنا كيفن مستحملاهو!
- كيفن أنوم وأنت ما بان ليك خبر، أدخل أدخل خليني أجهزلك شيتاً تاكلو
* ماني جعان بس لو ممكن كبايتين شاي من ايدين جميلة
- تكرم يا حاج غالي والطلب رخيص
دخلت جميلة المطبخ حضرت الشاي في سيرمس ومعاهو صحن لقيمات طلعت الحوش لقت الحاج مولع نار وفارش فرشة والقمر مكتمل وضوو ساطع إبتسمت رصت الحجات في الفرشة وقعدوا
- لسة فاكر!
* كيفن أنسى إنو في يوم برضو اتأخرتا لسة جيت لقيتك في الشارع واقفة كنتي قلقانة وعلي خايفة!
- كنت خايفة شديد عليك خصوصاً إنو الجو كان بارد شديد خفت تكون ضعت أو سرحت!
* كنتي زعلانة شديد وعشان أراضيك عملت نفس القعدة النحنا فيها هسا جو بارد قمر ساطع كباية شاي ونار بدفو والرفيقة جمبي كانت ولسة قاعدة!
- الرفيقة! ... هو انت لسة ح تقول رفيقة؟ عندنا أحمد وعثمان زينب وإبراهيم، نحنا لينا أربعين سنة
* "يا غُنانا المشتهنوا ياني موعود بي زمانك بي مواقيتو البِرنّو بإرتعاش صرخة وجودك يوم يطل ميلادي منو لما اتوسد صباحك ياتو ليل يفصلني عنو "
- هو انت لسة فاكر الغنية دي؟ دي الغنية الحببتني فيك
* كنت بحب اغنيها ليك لانو ملامحك بتكون جميلة زي جمالك فاكرة لما كنتي حامل بي أحمد أول فرحتنا
بضحكة خجولة قالت: أنا ماني ناسية ولا موقف معاك.. " أجيك بي قدرتي الباقية حُطام إنسان موسم بي شقى الدنيا ومقسم قلبو بالأحزان "
* الغنية دي غالية علي شديد ويوم قلتها ليك كنت قاصد كل حرف فيها، يعني معقول مرتي تكون حامل بي فرحتنا الأولى وتتعب ما اخلي القدامي والوراي وأجيها؟!
- الموقف داك خلاك في عيني أكبر من قبل، انبسطت شديد لمن شفت الاحباط في وش بت عمك بعد سمعت الرد القلتو ليها بعد قالت ليك دلع نسوان ساي جاييها لشنو وخليت شغلك وراك
