قِصص الأنبِياءْ | The prophets' stories

قصة سيدنا آدم عليه السلام ج١

السلام عليكم ورحمة الله وبركاته يا قمرات❤

زي ما اتفقنا هنشر هنا إن شاء الله قصص الأنبياء من البداية

نبدأ بقصة سيدنا_آدم

القصة هنزلها علي 3 أجزاء
يلا بينا ✨

#قصة_سيدنا_آدم_الجزء_الأول

قصص الأنبياء هتتحكي بأسلوب الكاتبة طبعاً و مرجعها في الكلام إللي هيتقال والآيات والأحاديث الصحيحة والقول الراجح من جمهور المفسرين كمان🥰

____________________

مكنتش ناوية أقول أي آيات أو أحاديث إلا لو احتجت يعني عشان مطولش عليكم ويبقى قلت المختصر المفيد😅

لكن لقيت إن ذكر الآيات والأحاديث مع القصة بتوضح معاني القرآن وبتفهمنا الآيات والأحاديث وتستمتعوا😄

يلا باسم الله..

- صلي على النبي الأول يا جميلة ✨❤

قبل ما نبتدي بقصة سيدنا آدم عليه السلام خلونا نشوف قبل خلق آدم كان في إيه في الكون!!

قبل خلق السماوات والأرض والملائكة مكنش في حاجة خالص، كان في فراغ ..الكون كان فاضي وبعدين ربنا أول حاجة خلقها العرش على الراجح من أقوال العلماء، وبعدين خلق القلم وأمر القلم إنه يكتب كل حاجة هتحصل لحد يوم القيامة في اللوح المحفوظ،
وبعد كده ربنا خلق السموات والأرض والملائكة والجن وباقي الخلق،

قبل ما ربنا يخلق آدم،
ربنا قال للملائكة إنه هيخلق في الأرض خليفة،

"وَإِذْ قَالَ رَبُّكَ لِلْمَلَائِكَةِ إِنِّي جَاعِلٌ فِي الْأَرْضِ خَلِيفَةً "

ومش معنى خليفة إنه خليفة 《الله》 في الأرض زي ما في ناس فاهمة😅

الكلام ده خطأ..

لأن الشخص لا يكون خليفة عن حد إلا إذا مات المستخلِف
أو غاب...

يعني أبو بكر الصديق رضي الله عنه خليفة رسول الله ﷺ لأن رسول الله ﷺ مات،

وهارون خليفة موسى عليه السلام لأن موسى غاب عن بني إسرائيل،

فمينفعش نقول إن الإنسان خليفة ربنا في الأرض لأن الله حي لا يموت وكذلك لا يغيب ويعلم كل شيء👌
فمعنى كلمة خليفة هنا إن الخليفة ده هيخلُف الجن،
لأن الجن كان بيسكنوا الأرض قبل البشر بألفين سنة،
فلما قتلوا بعض وأفسدوا في الأرض،
ربنا أمر الملائكة إنهم يبعدوا الجن عن القارات وينفوهم إلى جُزر البحار،
يعني يفضّوا الأرض كلها من الجن،
ويكون مكانهم الجزر المهجورة إللي في البحار،