سحاب : بنات جدي يقول حنا اللي بنسوي الغدا مع العيال
مدى : لا تكفون مانبي
سعد دخل عليهم : ليش ان شاء الله ؟
مدى : لأنكم همج
لميس وهي ترتب اغراضها : خلاص لا تكبروها عادي نسويه
مدى : تعرفين تطبخين يالميس ؟
لميس وهي تلتفت لها : اطبخ لدرجة تاكلين اصابعك وراه
حور : اوهخ اوهخ
لجين : كفو خيتي
سعد : ورينا شغلك يابنت العم
لميس : تم اللي يبي يطبخ معاي يجي وراي .. ووصل هالكلام للعيال يلي عندك
طلعت متوجهه للمكان اللي بيطبخون فيه ، اخذت نفس وبدت ترتب الاغراض والوصفات اللي كانت تسويها مع امها تطري ببالها وحده ورا الثانيه، همست بداخلها : اليوم بوريهم مين بنتك يا هناء الدنيا .. بسوي اللي علمتيني ودربتيني عليه من سنوات ..
.
.
عند سعد دخل على قسم الرجال : يا عيال لميس هي اللي بتطبخ غدانا اليوم مسويه نفسها سنعه
فراس بحدّه : تعال اعلمك السناعه ياسعدي
سعد : فراس لا تزعل خلونا نكون جديين ماعمري شفت بنت من بناتنا تطبخ زين
ماجد : تعرف لميس انت ؟
رفع سعد اكتافه : لا
ماجد : اجل اسكت
نادر : سعد خذ نفسك واطلع احسن لك ذول بس يجلدون فيك
زياد : قومو اجل بنروح نساعدهم
عبدالعزيز : اي يلا كلكم تعالو
توجهو لها وشافوها تزين الكُشنه وتحطها بالقدر ووراها البنات يشجعونها ويساعدونها
نايف وهو يمشي لجهتها ويدينه بجيوب جاكيته بهدوء : ماشاءالله ماشاءالله على بنت العم
عبدالعزيز : يلا بنساعدك نعرف البنات ما منهم فايده
سعد وهو يدق عبدالعزيز : وما نبي نتسمم
لميس : تبي تساعد حياك .. تبي تنبح من بعيد زي ما انت واقف الحين ، اعطيني قفاك احسن !
سعد : محد يمزح معك انتِ! تعالي يالجين بس
لجين : كنت بجيك ياسعدي بس للأسف غلطت على الشخص الغلط
فاضت براكينه من زود الغيره ونطق من داخله : وش سعدي وش هالميانه !
همس من لاحظة نظرات اخوها مازن سحبت لجين بعيد عن سعد وكملو سوالف
ماجد : وش بتطبخين ؟
لميس وهي تفكر : امم وصفاتي الخاصه
زياد : وش وصفاتك ؟
لميس : بما اني حجازيه بطبخ لكم اكل اهل الحجاز !
سعد : مو بهينه
نواف : الا قولي وش كنتِ تبين فينا يوم كلمتي جدي ؟
لميس : خلونا نخلص الغداء بعدين تعرفو
امير : يلا اجل قولي لنا وش نساعدك فيه ..
قسمت الشغل عليهم وبدو يشتغلون ويضحكون وسعد يذب عليهم كل شوي ويقصفونه ويرجع يكمل ونايف يشتغل ويسترق النظر بين كل دقيقه ودقيقه على لميس وهالشي ما كان بعيد عن ناظر نواف اللي ملاحظ كل شي ..
جلسوا بعد ما رتبوا السفرة والصحون وكل شي صار كامل والاكل يشهي وجدًا وغالبه كان اكل حجازي بما ان لميس عاشت بالحجاز .. بدء الكل يمدح صغير وكبير من لذاذة الطعم الى الرائحه الشهية والشكل المبهر ..
ابراهيم ( ابو مشاري ) : تسلم يدك يالميس ذا الاكل الزين !
محمد ( ابو مازن ) : والله وطلعتي مو بهينه طبيخه ماشاء الله عليك
الجد هايف بفرحة : ايه ذي بنت الغالي خالد وش تنتظرون منها
العم سلطان : ما قصرتي والله يعطيك العافية
العمة امل وهي تضحك : ماتوقعت يطلع منك كل ذا والله شوي وتتحداني بالطبخ
لميس وهي تجلس بنهاية السفرة : بالعافية عليكم
الجد : لميس وش مرجعك ورا تعالي حولي
لميس : لا مرتاحه كذا ياجدي
سعد وهو ياكل : اهخ ذوبان
عبدالعزيز : لازم نروح الحجاز ياخي اكلاتهم احسن من اكلاتنا
الجد هايف بنظره : ليه وش مقصره فيه اكلات نجد ؟
عبدالعزيز : وشهي اكلات نجد؟ ما اكلت الا الجريش والمرقوق والباقي ما اعرفها
الجد : انا اوريك من اليوم ورايح مانطبخ الا اكل نجد وخلي واحد يفتح فمه!
نواف رفع يده بخوف : يمزح يمزح ياجدي
سعد وهو يبلع ريقه : استهدي بالله ياجدي
الجد : ايه والبنات بعد من اليوم ورايح كلهم بيتعلمون الطبخ
لجين وهي تاكل شرقت من سمعت كلام جدها واجوان ضحكت وخبطت على ظهرها : صحة صحة لا تموتين علينا
لجين وهي مخنوقه تكلمت بصعوبة : جدي لا تكفى الا المطبخ
مازن بخوف وبدون وعي مد لها كاست الماء : بتموتين اشربي!
اخذت منه وشربت والابتسامة تزين ثغرها وما لاحظ هالشي غير لميس اللي ابتسمت من ابتسامتها
مدى : جدي مو لازم نتعلم الله يهديك
همس بعصبيه : اتفق مره ماله داعي !
امير : شفيك معصبه احنا واحنا عيال تعلمنا
همس : شدخلك ؟؟
امير وهو يأشر على رأسه : مزاجي
نطق مازن يغير الموضوع من نظرات لجين : بس انتِ وياه لا يقلب عليكم جدي الحين !
الجد وهو يناظر لميس اللي تحرك صحنها بدون ما تاكل ويناظر نايف اللي يناظر فيها بحزن : لميس ليش ما تاكلين ؟ نايف عطي بنت عمك وقرب لها !
نايف وهو يلتفت له : سّم ياجدي
اقترب يمد لها الصحون ويعطيها من كل نوع قطعه
لميس : خلاص يكفي اكل انا شكرًا ..
الجد هايف : اخلصوا بنقوم نرقص
سعد : لااا تكفى ياجدي وش بعد هالأكل رقص ؟
سلطان ( ابو زياد وسعد ) : لا حلال فيكم يعطي نشاط من الخمول اللي انتم فيه
الجد : مافي رفض والبنات معنا بعد
لميس وهي تناظر باستغراب وتهمس لحور : وش اللي والبنات بعد ؟ بنرقص معاهم !
حور وهي تضحك : اي نرقص العرضة النجدية والسامري والمجرور و الدحة كل ذي رقصات جدي لازم بكل مناسبه يسويها وخصوصًا السامري عشق بالنسبة له
عقد لميس حواجبها : ليش السامري ؟
حور : عشان جدتي الله يرحمها كانت تحب هالرقصة وهي اللي علمت جدي ومن بعدها جدي صار يرقصها بكل مناسبة وكأنه يحيي روح جدتي
لميس بحزن : ياعمري واضح كان يحبها كثير
حور : جدًا ، حبهم قصة عشق تكتب بتاريخ ..
أنت تقرأ
لأنك جئت في الوقت الذي كُنت أرفضُ فيه الحُب ، أحببتكَ أكثر
Romanceبينما تخوض حربًا بين تحرشُ والدها ومرضها المُميت ، وبينما تطلب من الله احدى المعجزات لِتُبدل حالها .. تحّلُ عليها اندر المعجزات حصولاً لتأخُذها من " غرور الحِجاز .. إلى عُذوبةِ نجد " لِتُقابل عائلةً جديدةً لها نتيجة خطأً طبّي ، وقلبًا حنونًا لا يؤم...
