ပီပီ(မန္တလေး)၏ ဇာတ်လမ်းများ

ရေအိုင်ထဲက အကြွေပန်းလေး (အပိုင်း - ၂)

(အခန်း-၄)

လွန်ခဲ့သော တစ်လကျော်ခန့်... ရာသီဥတု ကြည်လင်သာယာသော နေ့တစ်နေ့တွင် မိုးမြင့် အာကာသည် ထင်းရှူးတောကြီးထဲသို့ အဖော်မပါဘဲ ထွက်လာခဲ့သည်။

သူ့အား ဟိုတယ်မန်နေဂျာ ကိုခင်မောင်စိုးကတောင် စနောက်လိုက်သေးသည်။

"ကိုမိုး... ထင်းရှူးတောထဲက သစ်တောဘိုတဲလေးကို မသွားနဲ့နော်၊ အဲဒီဘိုတဲ (Guest house) က တစ္ဆေခြောက်တယ်လို့ နာမည်ကြီးနေတာ၊ သစ်တော ဝန်ထမ်းတွေတောင် အဲဒီဘိုတဲကို နေ့ဘက် တစ်ယောက်တည်း မသွားရဲကြဘူး။ တော်နေကြာ ကိုမိုးကို ဘိုတဲက အင်္ဂလိပ်သရဲမ ချောချောလေးက ဆွဲခေါ်ထားမှဖြင့်... ဟားဟား... ဟား"

"ဟား ဟား... အဲဒါဆိုရင်လည်း လူပျိုကြီးဘဝက ကျွတ်တာပေါ့ ကိုစိုးရ၊ ကဲ... ကဲ... နေမမြင့်ခင် သွားလိုက်ဦးမယ်ဗျို့"

သူကလည်း ကိုခင်မောင်စိုးကို ပြန်စလိုက်ရင်း နှုတ်ဆက်ကာ ထင်းရှူးတောထဲ ဝင်လာ ခဲ့သည်။

သာယာသော ကျေးငှက်သံလေးများနှင့် တသွင်သွင်စီးနေသော စမ်းချောင်းလေးကြောင့် သူ့စိတ်တွင် ပင်ပန်းရမှန်းမသိ၊ ထင်းရှူးတော၏ အတွင်းပိုင်းကို ရောက်လာ၏။ ထင်းရှူးတော သည် ဟိုတယ်၏ အနောက်ဘက်မှ စဝင်လျှင် အတော်လေးလှမ်း၏။ ထင်းရှူးတော၏ တစ်ဖက် ရွာချင်းဆက်သွယ်ထားသော ကားလမ်းမှဆိုလျှင် ရေဝင်အိုင်ငယ်လေးများ ရှိရာသို့ သိပ်ပြီးမသွားရ ချေ။

သို့သော် ကားလမ်းနံဘေး ထင်းရှူးတောအစပ်ကို ကွန်ကရစ်တိုင်များထောင်၍ သံဆူးကြိုး များ ခပ်ကျဲကျဲ ကာရံထားသည်။ သို့ဖြစ်၍ လမ်းလျှောက်ဝင်မှသာ ရမည်။

ဆိုင်ကယ်နှင့်ကားများ ဝင်ထွက်မရရန် ကာရံထားပုံရသည်။ လူငယ်အချို့ကတော့ ခပ်လျော့ လျော့ရှိသော သံဆူးကြိုးကို ဖြဲ၍ ထင်းရှူးတော အတွင်းဝင်ကာ စမ်းချောင်းလေး၌ ရေလာချိုးကြ လေ့ရှိသည်။ ဒါကလည်း အနီးနားရွာက ခပ်ဆော့ဆော့ လူငယ်များသာ လာဖြစ်ကြ၏။

မိုးမြင့်အာကာ စမ်းချောင်းလေးကို စိတ်ဝင်တစားနှင့် လျှောက်လာစဉ် အရွက်စိမ်းဖားဖား အုံ့ဆိုင်းနေသော သစ်ပင်ကြီးတစ်ပင်အနီး ရောက်သောအခါ သူ့ခြေလှမ်းတို့ ရပ်တန့်သွားသည်။ သစ်ပင်ကြီးတွင် အမြင့် ၆ ပေခန့်ရှိမည့် နတ်ကွန်းတစ်ခု တွေ့ရသည်။ နတ်ကွန်းတွင် မြင်းဖြူရုပ် လည်းတွေ့ရ၏။ ပြီးတော့ နတ်သမီးအရုပ် တစ်ခုလည်း တွေ့ရသည်။ ရှန်နီ/ ရှန်ဖြူစများ ချည်နှောင် ထားလေ၏။ သူ နတ်ကွန်းကို လေ့လာရင်း ခဏတစ်ဖြုတ် နားနေလိုက်သည်။