سيرة الرسول صلى الله عليه وسلم

صلوا على النبي صلى الله عليه وسلم

سيرة الرسول ﷺ
🌅✅ لو عرفتموة ✅🌅

🌻الحلقة 25🌻

يلا صلو على النبى 🙂

رحمه رسول الله ♡
ولسه عمر بن الخطاب بيحاول يقنع رسول اللهﷺ بإنه لازم ميصليش على عبدالله بن أبى بن سلول بعد ما مات لأنه  اتهم عائشه زوجه النبى بالزنا ..فعُمر بيقول: والله ظللت أذكره بمساؤى هذا الرجل (وبرضه مافيش فايدة) .. لحد ما عُمر خلاص مش قادر  فقاله يا رسول الله أتصلى عليه وقد نهاك الله ؟؟!

فالنبىﷺ يقول : لا يا عُمر بل قال الله : "اسْتَغْفِرْ لَهُمْ أَوْ لَا تَسْتَغْفِرْ لَهُمْ إِن تَسْتَغْفِرْ لَهُمْ سَبْعِينَ مَرَّةً فَلَن يَغْفِرَ اللَّهُ لَهُمْ " وأنا يا عمر سأزيد على السبعين لعل الله يغفر له 🙂 ويصلى عليه فعلا ويستغفرله أكتر من سبعين مرة وينزل قول الله تعالى ”وَلَا تُصَلِّ عَلَىٰ أَحَدٍ مِّنْهُم مَّاتَ أَبَدًا وَلَا تَقُمْ عَلَىٰ قَبْرِهِ ۖ إِنَّهُمْ كَفَرُوا بِاللَّهِ وَرَسُولِهِ وَمَاتُوا وَهُمْ فَاسِقُونَ “

و مرة واحد كان ماسك الشاة(الغنم) بتاعته هيدبحها وماسك السكينة بأيده و وبأيده التانية بيجر الشاة فينفعل النبى ﷺ ويقول: يا أخى أتريد أن تقتلها مرتين ؟ هلا حددت شفرتها قبل أن تنحرها (ما تخليهاش تشوف السكينة ، سن السكينة الأول وبعدين أنحرها علشان ماتشوفهاش 🙂 ) و قالﷺأما يتقى أحدكم ربه فى شاته ! ..
صلى الله على محمد 🙂

و يبقى النبى عليه الصلاه و السلام فى خروجه لغزوه(معركه) بيرد فيها الإعتداء على المسلمين فيوصى جيش المسلمين و يقول : أيها الناس لا تقتلوا شيخاً لا تقتلوا إمرأةً لا تقتلوا طفلاً لا تقتلوا مريضاً لا تهدموا بيتاً لا تحرقوا زرعاً لا تقطعوا نخلاً لا تحرقوا زهراً ،ستجدون رجال فى الصوامع "كفار" تفرغوا للعبادة دعوهم وما هم فيه ولا تغيروا "تهجموا" على الجيش ليلاً ، قالوا لِمَ يا رسول الله ؟ قال حتى لا تُفزّعوا النساء والأطفال 🙂 .. أرحم الخلق صلوات ربى وسلامه عليه .. وما أرسلناك الا رحمةً للعالمين ❤
فيستحيل يتفسر الحديث ده "لقد جئتكم بالذبح " بالشكل اللى فئه من الناس فسرته بيه و قصو الحديث من الاحداث اللى قال النبىﷺ الحديث فيه." اقروا البوست رقم 26 😊 "

ونرجع للإيذاء الشديد اللى اتعرض له الصحابه ..الصحابى "مصعب بن عُمير" صحابي جميل .. كان شاب غني جدا ابن أسرة كبيرة جدا في مكة .. عنده ٢٣ سنة . وكان مترف جدا كل ملابسه وعطره من الشام (مستورد).. ومع ذلك مصعب كان بطل من ابطال الاسلام .. يوم غزوة أحد حيستشهد دفاعآ عن رسول الله.. الشاب الجميل ده اسلم فأمه قالت له : ان لم تنتهي حرمتك من الميراث .. راح قايل لها : خذي ما شئتي .. فأمه حبسته ومنعت عنه الأكل و الشرب لحد ما بقى هزيل وضعيف و أصيب بحساسيه خلت جلده أتقطع و بقى جلده شبهه جلد الحية.

و الصحابى صهيب الرومي : صحابي جميل وشعره طويل وكان مش عربي .. كان من بلاد الروم .. قريش عذبته بعد إسلامه .. كانوا يمسكوه من شعره الطويل ويغطسوا وشه في مايه سخنه جدا ويعذبوه اول ما يحسوا انه خلاص هيتقطع نفسه و يموت فيطلعوا بسرعه راسه من المايه..