سيرة الرسول صلى الله عليه وسلم

صلوا على النبي صلى الله عليه وسلم

سيرة الرسول ﷺ
🌅✅ لو عرفتموة ✅🌅

🔆الحلقة 155🔆

يلا صلوا على النبى :)
رجوع أصحاب رسول الله من الحبشة (ج1)

حكينا فى حلقات فاتت أن النبى عليه الصلاة والسلام بعت جواب لنجاشى الحبشة و بيقول النبى فيه : " السلام عليك أيها الملك جزاك الله عنا خيرآ أسالك أن ترد إلي أصحابى " ( فاكرين الصحابة اللى هاجروا من تعذيب قريش و راحوا الحبشة ؟! دول بقالهم سنين فى الحبشة .. و أخيرا حيرجعوا دلوقتى لحضن النبى عليه الصلاة و السلام بعد ما اتحرموا منه 14 سنة ) ..

فيدخل الصحابة المدينة و يقابلهم النبى بكل لهفة و حب .. و كان من الصحابة دول ، واحد اسمه " جعفر بن أبى طالب " و ده يبقى ابن عم النبى ، فيحضنه النبى و يقول مقولته الشهيرة : " بإيهما أفرح بفتح خيبر أم بقدوم جعفر ♡ " .. و على فكرة أطلق عليهم أسم
" أهل السفينة " لأنهم هاجروا بالسفينة من مكة للحبشة ..

و حنحكى قصص عنهم و حنبدأ بقصة " أسماء بنت عميس "، أسماء كانت صاحبة السيدة " حفصة بنت عمر ابن الخطاب " و لما دخلت المدينة راحت زارت حفصة و قعدت كل واحدة تحكى للتانية عن أحوالها .. فعدى سيدنا عمر فقال لحفصة : " من معك "، فقالت : " أسماء" فقال عمر : " الحبشية " (يعنى  اللى رجعت من الحبشة) فقالت حفصة : " نعم "، و هنا بقى سيدنا عمر قال كلام هزار ، بس أسماء حتاخد الكلام جد ^_^ ..

قال لها عمر : " أنتم لم تهاجروا مع رسول الله من مكة للمدينة و نحن أحق برسول الله منكم" فأسماء مضحكتش و خدتها جد و قالت : " لا لستم أحق برسول الله منا فأنتم كنتم في صحبته يطعم جائعكم و ينصح جاهلكم و يحنو عليكم ، أما نحن فكنا هناك في البعداء البغضاء و حرمنا مصاحبته و كان كل ذلك فى سبيل الله و رسوله ".. و بكت أسماء و قالت لعمر : " لأشكونك إلى رسول الله دون أن أزيد أو أنقص شيئاً " .. و فعلا راحت أسماء للنبى و حكت له كلام عمر و قال لها النبى : " و بماذا أجبتى عمر ؟ " ، فقالت أسماء : " قلت له أنكم كنتم بين رسول الله يطعم جائعكم و ينصح جاهلكم و يحنو عليكم ، أما نحن فقد كنا في البعداء البغضاء و حرمنا مرافقته "..

فرد النبى عليها و قال : " أصبت و أحسنت يا أسماء و كمل النبى كلامه و قال : إن عمر و أصحابه هم أصحاب هجرة واحدة ، أما أنتم أصحاب هجرتان " (عشان همه هاجروا فى سبيل الله مرتين مرة من مكة للحبشة و مرة من الحبشة للمدينة و كل ده فى سبيل الثبات على دين الله فبالتالى همه أولى برسول الله ♡) ..

و أحنا بردوا محرومين من رسول الله لكن حقول لكم حديث حيفرحكوا أوى أوى ، النبى عليه الصلاة و السلام قال : " عبادة في الهرج كهجرة إلي " ( والمقصود بالهرج هنا الفتنة واختلاط أمور الناس ، وسبب كثرة فضل العبادة فيه أن الناس يغفلون عنها ويشتغلون عنها ، ولا يتفرغ لها إلا أفراد ) ..

يعنى وقت ثباتك على طاعة الله و حواليك ناس مش بتعملها و بتعصى ربنا .. فأنت بثباتك بتبقى هجرت معصية .. و بقيت فى هجرة فى سبيل الله و رسوله .. فيا ترى كام هجرة هاجرت للنبى ؟! .. كل ما تثبت على طاعة وسط معاصى كتير بيعملها اللى حواليك ، بتزيد هجرة لرسول الله و بتكون أولى برسول الله ♡..