سيرة الرسول صلى الله عليه وسلم

صلوا على النبي صلى الله عليه وسلم

سيرة الرسول ﷺ
🌅✅ لو عرفتموة ✅🌅

🔆الحلقة 185🔆

تلخيص غزوة تبوك ❤

عشان نقدر نستوعب الغزوات سوا.. فإحنا اتفقنا أننا حننزل بوست يبقى فيها تفاصيل كل غزوة فى نقاط مختصرة و كمان أسبابها .. و بعدين حننزل يوميا بتفاصيل الغزوة كلها على حلقات بإذن الله
#غزوة_تبوك
1- التوقيت : سنة 9 هجريا من شهر رجب
2- سميت بهذا الاسم:
كانت فى موقعة تبوك.. و ليها اسم تانى اتذكر فى القرآن "غزوة العسرة" و ده لصعوبة ظروفها و مشقتها...و كمان الناس سموها بغزوة "الفاضحة" لأنها فضحت المنافقين و حنعرف إزاى بعد كده..
3- طرفى القتال : الرومان و المسلمين
4- أسباب الغزوة :
وصلت أخبار للمسلمين أن الرومان حضروا عدد كبير جدا من الجنود وهو 40,000 مقاتل للقضاء على المسلمين.

5- أحداث الغزوة :
- النبى عليه الصلاة و السلام هيخرج للقتال لانه لو مخرجش هم حيهاجموه جوه المدينة. النبى خرج بالفعل ومعاه 30,000 مقاتل ..

- المسافة بين المدينة و تبوك حوالى 1000 كيلو، والمسلمين كان معاهم بعير للركوب، وكل 3 يتعاقبون على بعير.. وقتها كانوا فى شهر أغسطس فى عز الحر فى الصحرا.

- هيخرج المسلمين بلا طعام، يدوب التمر و الماء لانهم خرجوا قبل موسم الحصاد فمكنش فيه أكل..لدرجة ان كان الصحابى يمص التمرة عشان تفضل معاه فترة أطول.

- حيتخلف عن المعركة بعض الصحابة عن رسول الله و لكن ربنا حيتوب عليهم و حيكرمهم بنزول الآيات عشانهم.

-حيتخلف المنافقين عن المعركة و حيقدموا الأعذار.

-وصل المسلمين لمنطقة تبوك بعد مسافة طويلة قطعوها فى 50 يوم فى عز الحر و العطش .. و ملاقوش جيش الرومان .. لأن الرومان لما عرفوا ان المسلمين استعدوا بسرعة للقتال فخافوا وانسحبوا.. وبكدة خلاص مفيش معركة.

- غزوة تبوك كانت آخر غزوة فى حياة النبى عليه الصلاة و السلام.. و دى تعتبر إختبار للصحابة و لتصفية جيش المسلمين من المنافقين.

و التفاصيل فى الحلقات الجاية إن شاء الله❤

🌅✅ لو عرفتموة ✅🌅

🔆الحلقة 186🔆

يلا صلوا على النبى.. #غزوة_تبوك (ج1)

حنتكلم سوا النهاردة عن آخر  غزوة فى حياة رسول الله :(خلاص الوفاة قربت.. صلى الله عليك يا سيدى يا رسول الله..)
غزوة تبوك كانت فى سنة 9 هجريا من شهر رجب.. و اتسمت بالاسم ده لأنها كانت فى منطقة تبوك.. و كمان ليها اسم تانى فى القرآن فى سورة التوبة و هو غزوة العسرة و ده بسبب صعوبة الغزوة دى و مشقتها و كمان اتسمت فى السنة "بالفاضحة" لأنها فضحت المنافقين..
طب إيه قصتها الغزوة دى؟ فاكرين غزوة مؤتة لما انتصرنا على الرومان..فدلوقتى الرومان عايزين ينتقموا فحيجهزوا جيش من 40 ألف مقاتل ..