سيرة الرسول صلى الله عليه وسلم

صلوا على النبي صلى الله عليه وسلم

سيرة الرسول ﷺ

🔅الحلقة 164🔅.. يلا صلوا على النبى :)

#سرية_ذات_السلاسل

إنهارده أحنا سنة 8 هجرياً .. السنة دى عندنا حدث مهم حصل فيها و هو خروج المسلمين فى سرية أسمها " ذات السلاسل " .. سبب الغزوة دى إن فيه قبيلة أسمها " قضاعة " غدرت بالمسلمين و هجمت على 15 صحابى و قتلتهم .. و لما وصلت الأخبار للنبى عليه الصلاة و السلام قام مجهز جيش لردع قبيلة قضاعة ..

خرجت سرية ( يعنى جيش صغير بقيادة واحد من الصحابة .. و ذى ما قلنا السرايا مش بيخرج فيها النبى ) مين القائد بتاعها ؟ القائد كان " عمرو بن العاص " .. و كان يدوب عدى على إسلامه شهور .. و على فكرة مكنش الجيش كبير لأن المسلمين راجعين من مؤتة فكانوا تعبانين .. فالمهم كون النبى جيش صغير و بعت لسيدنا عمرو و قال له : " يا عمرو , إنى أريد أن أبعثك بجيش إلى قضاعة , وإنى أرجو الله أن ينصرك عليهم و تأخذ غنائم من الحرب "..

فحزن سيدنا عمرو و أفتكر إن النبى فاكر إن عمرو حيرضى يطلع عشان مكاسب مادية .. فقال عمرو : " والله يا رسول الله ما على هذا أسلمت معك و إنما أسلمت لله عز وجل " ، فقال النبى : " أعلم هذا يا عمرو , ولكن يا عمرو نعم المال الصالح للرجل الصالح " .. طيب ليه النبى أختار عمرو بالذات ؟ لأن عمرو كان من دهاه العرب و ذكى جداً فالنبى واثق فى قدراته .. و كمان لأن أم عمرو من قبيلة قضاعة .. فلما الناس تلاقى إن عمرو قائد على المسلمين و فى بينه و بينهم قرابة فده حيألف قلوبهم للإسلام ..

و فعلاً خرج سيدنا عمرو بن العاص و معاه 300 فارس , و وصل عند أطراف منطقة المعركة و لقى إن أعداد الأعداء كبيرة جداً .. فبعت سيدنا عمرو إلى رسول الله يطلب المدد , فبعث النبى مدد ب 200 فارس و على رأسهم سيدنا " عبيدة بن الجراح ".. و بدأ القتال , ووقت القتال كان قصير جداً وأنتهى بإنتصار حاسم للمسلمين بفضل الله عز وجل ..

و أتسمت المعركة بذات السلاسل لأن كان موجود فى موقع المعركة بئر إسمه السلاسل .. و  كمان أتقال من كتر خوف الأعداء من المسلمين .. فجيش العدو عمل حاجة عجيبة أوى هى أن كل عشرة ربطوا نفسهم فى سلسلة حديد , عشان لو واحد هرب , التسعة يشدوه و يثبت فى المعركة .. طيب والنتيجة كانت إيه ؟ نتيجة اللى عملوه كانت إن لما المسلمين يقتلوا واحد , كان يقع و يشد معاه التسعة اللى مربوطين فى السلسلة .. فعشان كده أتسمت بذات السلاسل ..

إنتصر المسلمين فى معركة ذات السلاسل بس حصل موقف عجيب أوى .. لما الجيش كان فى طريق رجوعه من المعركة ، كانت الدنيا برد جداً .. بس كل ما الجيش يحاول يشعل نار عشان يدفوا .. يغضب سيدنا عمرو و يأمرهم إنهم يطفوها .. فالصحابة يطيعوه بس و همه مضايقين و تانى يوم لقوا سيدنا عمرو كان بيدور على مايه عشان يتوضأ بس ملقاش , بعدها بشوية سمعوه و هو بيقيم الصلاة ! و حيقف بالناس إمام فأفتكروا إنه بيصلى بيهم من غير وضوء , فقالوا : " لنشكونه إلى رسول الله " ..