سيرة الرسول صلى الله عليه وسلم

صلوا على النبي صلى الله عليه وسلم

سيرة الرسول ﷺ
🌅✅ لو عرفتموة ✅🌅

✳️ الحلقة 139✳️

يلا صلوا على النبى :)
عمرة القضاء (ج1)

فى شهر ذي القعدة .. فى نفس اليوم و فى نفس الشهر اللى اتحرم المسلمين فيه من أنهم يعتمروا ، حيعتمر المسلمين بعد سنة من صلح الحديبية زى ما أشترطت قريش .. و يقوم النبى عليه الصلاة و السلام و يقول : " أيها الناس إنى مرتحل بالعمرة فارتحلوا " .. و يبدأ النبى يقول : " لبيك اللهم لبيك " .. أنتوا متخيلين نفسية الصحابة عاملة أزاى ! .. الصحابة طايرين من الفرحة .. كله عمال يجرى .. ده يجهز نفسه .. ده يجهز الناقة بتاعته .. سعادة مفيش بعدها سعادة !! مهاجرين من مكة بقالهم 7 سنين ..

فاكرين النبى عليه الصلاة والسلام و هو مهاجر .. قد إيه كان قلبه بيتقطع .. و وقف قدام مكة وقال : " والله إنك أحب بلاد الأرض إلى قلبى و لولا أن قومك أخرجونى منكِ ما خرجت " .. و يخرج المسلمين من المدينة و يرددوا طول الطريق : " لبيك اللهم لبيك ".. و كانوا 2000 معتمر .. فى الحديبية السنة اللى فاتت كان المسلمين 1400 .. ال 600 اللى زادوا دول مسلمين جدد .. دول فتح من عند ربنا ببركة السلام و الهدنة اللى بين النبى و بين أهل مكة .. وينزل قول الله تبارك و تعالى : { لَقَدْ صَدَقَ اللَّهُ رَسُولَهُ الرُّؤْيَا بِالْحَقِّ ۖ لَتَدْخُلُنَّ الْمَسْجِدَ الْحَرَامَ إِنْ شَاءَ اللَّهُ آمِنِينَ مُحَلِّقِينَ رُءُوسَكُمْ وَمُقَصِّرِينَ لَا تَخَافُونَ ۖ فَعَلِمَ مَا لَمْ تَعْلَمُوا فَجَعَلَ مِنْ دُونِ ذَٰلِكَ فَتْحًا قَرِيبًا } ..

تعالوا نفتكر شروط صلح الحديبية : قالت قريش إن لا تعتمروا إلا بعد عام و لا تدخلوا علينا بسلاح .. طيب دلوقتى عدت سنة و المسلمين جايين يعتمروا بس النبى عليه الصلاة والسلام لا يأمن غدر قريش فحيعمل كتيبة من 200 صحابى و يلبسهم لبس حرب كامل .. و سلاح كامل .. و يخلى عليهم أمير ( يعنى قائد ) و حيكون أسمه " محمد بن مسلمة " و حتمشى الكتبية دى أمام المعتمرين ..

فأبو بكر أستغرب لما لاقى النبى أمر بتسليح 200 شخص ، فقال : " يا رسول الله ألم يشترطوا عليك أن لا تدخل مكة بسلاح " !! فقال النبى : " يا أبا بكر إنا لن ندخلها بسلاح و لكنى لا آمن مكر قريش ، فيا أبا بكر سنأخذ معنا السلاح و نترك الكتيبة عند باب مكة فإن غدرت قريش أدخلنا السلاح وإن وفُّوا خرجنا بعد العمرة و أخذنا معنا السلاح " .. ( شايفين  تفكير راقى جدآ .. و شخصية متوازنة يا رسول الله .. فلا أنت طيب لدرجة إن حد يخدعك و لا أنت شديد لدرجة أنك تأذى حد و تظلمه صلى الله عليه وسلم ❤ .. قمة الحنكة السياسية ) ..

طيب طلع المسلمين للعمرة .. و طول السكة الصحابة بيلبوا لبيك اللهم لبيك .. و فى نص الطريق قريش عرفت أن النبى و المسلمين جايين على مكة يعتمروا ، أصل قريش زارعة عيون لمراقبة المسلمين من المدينة لمكة .. شايفين سبحان الله الدنيا أتقلبت .. زمان كان المسلمين همه اللى قلقانين من قريش .. فاكرين قد إيه الصحابة عانوا و تعبوا .. بس خلاص ده كان زماان ، دلوقتى قريش هى اللى مرعوبة مننا و المسلمين ربنا عزهم قال تعالى : { وَلِلَّهِ الْعِزَّةُ وَلِرَسُولِهِ وَلِلْمُؤْمِنِين } [المنافقون-8] ..