المقتص " غراب أسود "

الــبــارت 2

الــمقتص " غــراب اسـود "
البارت الثاني
للكاتبه نور يسري ...

لا تنسون التصويت + التعليق بين الفقرات + متابعه الحساب NOOR__applies

﴿ومن ثُم يَأتيكمُ مِنَ السماءِ رِزقَاً﴾
..................................................................

كمت لـلـفراش ما احس الا الباب تفلش علينه ركضت طلعت لكيت زلم تتصايح بأسم ابوي ويركعون بالباب حجيت بخوف ::-

عنود ::- شكو يمه ؟

اشرتلي ادخل جوه بقيت باوع من فتحه الباب امي لبست عبايتها وطلعت صاحت برچفه ::-

علياء ::- ما تخاف ربك ما تكول البيت بي حرمه شلون هيج تسوي الله لا ينطيك انشالله خليت كلوبنا تطيح بالكاع .

عقيل ::- گافي مضرطه رچلچ وين ؟

علياء ::- شمدريني .

عقيل ::- اريد فلوسي اطلبه 800 الف صارلي اسبوع اركض وراه وما يلزم هسه تنطوني فلوسي يلا عيوني .

علياء ::- والله يعيوني ما عندي ولا ربع عود خابره وشوف وين راح واخذهن منه وعيب عليك تطول لسانك عليه .

طبت جوه ورگعت الباب بوچها بقه عقيل مصدوم منها هز راسه وركب دراچته وراح اجتني ترفه حجت ::-

ترفه ::- شبيها امي ؟

عنود ::- واحد يطلب ابوي فلوس ويريدهن وبس الله اليعلم منو يحلها ؟

دخلت للغرفه لكيت امي تمشط بشعرها چنت من اشوف شعر امي كبل اغم روحي لان چانت حلوه وشعرها يوصل لـرچليها .

باوعتلي ضحكت وحجت ::-

علياء ::- ولچ بعدچ ما نايمه ولي انطمري علمود باجر ترحين لـمدرستج .

عنود ::- يمه شلون بأبويه ما تشوفيه ما يصرف علئ البيت وعبالك صخول كلشي ماكو لا عدنه ملابس لا شيء تره تعبت .

علياء ::- الله فوك ويعرف شلون يدبر عيشتنا يلا يمه ولي لـفراشج نامي .

تافأفت ورحت نمت لـثاني يوم كعدت من الفجر سويتلي ريوك وكعدت اكل حجيت بگلبي ::-

عنود ::- والله مابيه حيل اداوم خل اسوي روحي مريضه وعود اكح علمود امي تسكت مني .

لـهناك كعدت امي بقيت اون كدامها واكح باوعتلي صفح وحچت ::-

علياء ::- شني اليوم ما ترحين ؟

عضيت شفتي بأبتسامه كعدت علئ حيلي وحجيت بتعب ::-

عنود ::- يمه والله چسمي مكسر احس روحي تعبانه خليني اليوم يمج اغسلج وانضفلج وما اخلي ماعون واحد علئ الكاونتر .

ضحكت بأستهزاء وهزت راسها موافقه كبل ركصت وبقيت اهز بروحي من الفرحه حچت ترفه بقهر ::-

ترفه ::- مو عساس مريضه لعد شو تركصين هو المريض بيه حيل يركص .