انا احبك عهدا والعهد دين لا يموت

بارت 1

                          الحب هو رجل وانثى يتقنان الجنون ...هي انوثتها طاغية وهو رجولته قاتلة                                                                                                                                        واهلا بالهلاك 

فمدينة الناظور شرق المغرب مدينة الريف والجبال مدينة معروفة بالطبيعة ديالها وجمال بحارها ناسها راقيين ومتحضرين وفنفس الوقت متشبتين بالعادات والتقاليد وعائلاتها محتارمين بزااااف فواحد الحي شعبي بامتياز دار لاصقة دار ودراري صغار  كايلعبو الكورة وصداعهم عالي ونساء لي كايطلو من سراجم وشادين النميمة ... وشمكارة لي كايبيعو لحشيش والمخدرات مقنتين فالدروبة كايديرو خدمتهم مهم هاد الحي معروف عليه فالمدينة كاملة البوليس ديما جايين خارجين من داك الحي الحاصول داك الحي مقطع لوراق 

فواحد الدار لي كانت فلخر ديال الدرب كتكون من جوج طوابق ماشي كبيرة وماشي صغيرة  فيها 6 دالغرف ....الطابق الاول فيه صالون  كبيير كاياخد كثر من 5 دالطوابل مفرشينو بالسداري عصرية باللون الازرق الحاصول كان صالون مغربي بامتياز وتصميم ديالو انيق ومطبخ لي كبييييير او واسع بزاااف يقضي الغرض ديال كاع المناسبات فالجهة الاخري كاين كولوار لي كبير ومفرشين فيه ثلاثة ديال كانابي مع جوج فوتوي فلون لزرق سموي اما الطبقة الثانية فكان فيها ربعة ديال الغرف وصالون صغير مفرش فنفس سداري ديال صالون لول ....او جوج طواليطات ....او فاللخر كاين سطح لي كان كبير او فيه جوج غرف 

او فواحد الغرفة من دوك الغرف كانت ناعسة ومشبحة على النموسية كل رجل فين حاطاها وشعرها شاد الريزو الله احسن عوان راجلها المستقبلي مايلقا فين ينعس هههه ....كانت الغرفة مقلوبة كاملة سفاه على علاه... ها لباس مقلوبين كاملين وكل حاجة فين والماكياج مليوح فجيه اما الكتوبة لي طالبين معاها الله وشرع كل ورقة فين مليوحة  اما واحد كتاب دالماط لي طايح فالارض ومزلع عليه كاس دالعاصير ايلا مشا حتى شافها انشتاين يدفنها وهي حية اودي يودي علاى البنت لي عندها الباك 

كسر صمت  التيليفون لي كايوصني دازت مدة عادت سمعات للتيليفون خرجات راسها من تحت الوسادة ومدات يديها فوق النموسية كتقلب على التيليفون حتى لقاتو ودارتو فودنيها بلا ماتحل عينيها 

......: انوضي يا ديك الموصيبة بغيت ليك غبارة وشي كحل لعفطة يهينيني منك ساعة وانا كنصوني علااش ماكتجاوبيش

....: وناري  اماما اش بغيتي مني على هاد الصباح واش الناس كايصبحوعلى الرومانسية والحب وانتي مصبحا عليا بالنكير 

 .....: الحب والرومانسية اللي غاتشوفي دابا ايلا متكعدتيش من بلاصتك  لالياتك كاينوضو مع صباح يديرو شغل دالدار ويعجنو لمسمن والخبز ويديرو لفطور غير المصيبة لي بلاني بيها ربي  صابحة خامرة ..والله يانسرين  كاتعرفيني عندك عشرة دقايق  ايلا مانزلتيش دابا غادي تشوف نجوم انهار ابنتي