انا احبك عهدا والعهد دين لا يموت

جزء 8

نرجعو لمغرب عند لحمقة ديال نسرين لي جمعات البيت كامل رتبات كتوباتها وطوات لباس وقاداتهم فالماريو وجمعات وقادات كولشي فبلاصتو وهزات تيليفونها وجلسات على النموسية طالعة نازلة فالانستغرام دازت ساعة وهي غير مقابلة مع التيليفون شافت فالساعة وهي تلقاها مازال 10 ديال صباح وساطت بملل 

نسرين ....: بففففففففففف ياربي على ملل شنو ندير اووووف ناس فالويكاند كايخرجو ويتساراو وكايحيدو الستريس ديال سيمانة كاملة ولكن انا لا كانظل خامرة فهاد الدار هئ هئ اوووف ياربي انا مليت مليت من هاد العيشة ضروري خاصني ندير شي حل لراسي اوووف 

تكات على النموسية كاتشوف فسقف وكاتفكر فشي حل لراسها حيت بالصح ملات حسات بواحد الاكتاب والخنقة 

نسرين ...: اووووف غاننزل نجيب الماء راه واحد الشوية نتخنق فهاد الدار 

ناضت من على النموسية لبسات كلاكيطة ديالها وخرجات من البيت نازلة فدروج وصلات عند الطبقة لولة يلاه جات تنزل وهي تسمع شي هدرة لي خلاتها ترجع باش تسمع ديك الهدرة كان خوها براهيهم لي كايدوي فالتيليفون فالبيت ديالو لي محلول 

نسرين قربات بالزربة من غرفة ديالو كاتحاول تسمع الهدرة ديالو 

براهيم كايدوي فالتيليفون...: وي غدا غادي نسافر لطنجة فالليل ضروري وراك عارف بلي دابا جات سلعة جديدة وخاصني انا والواليد نطلعو نديرو خدمتنا تماك باش مايوقعش شي غالط واه اصحبي راه الخدمة ايلا ماوقفتيش عليها براسك وضمرتي عليها راه داكشي لي بنيناه كامل غايمشي اه دابا ماعرفتش بالضبط شحال غانبقى ولكن كانضن من 15يوم ولا 18 يوم مهم ماتفوتش 20 يوم اه وراه دابا غادي نمشي وبالي مشغول على الدار وراك عارف الوضع كي داير 

وهو يتسمع صوت الفاز طاح الارض بسباب نسرين لي كانت كاتشطح بقوة الفرحة وطيحات الفاز براهيم دار لجيهت الباب وهو يشوفها 

نسرين جمدات فبلاصتها ...: ب ب سمحليا اخويا بغيت نجي عندك وانا نطيح هاد الفاز 

براهيم ...: وي صافي بسلامة من بعد نهدرو (وقطع على المتصل وشاف فنسرين ) اخر مرة تجي البيت ومادقيش الباب مفهوم واخا يكون الباب محلول دقي لول 

نسرين ...: اه واخا سمحليا اخويا 

براهيم ...: علاش جيتي شنو بغيتي 

نسرين بقات كادور عينيها بحال ببوشة كاتحاول تختارع شي عذر وهي تجي فبالها فكرة وحدة تنقذ فيها راسها ...: بغيت نطلب منك واحد الطلب اخويا 

براهيم شاف فيها ...: وي زربي دغيا شنو بغيتي معنديش الوقت 

نسرين ...: خويا دابا فالمدرسة كاتعرف هاد العام عندي الباك ودابا بغيت شي فلوس باش ندير واحد البروجي باش نشري تصاور دالبروجي وملفات والوقائق 

براهيم خنزر ...: ومالكي حابسة فيك النفس لي يشوفك يقول غير باغيا طالبي بالاستقلال صافي قوليها من لول خويا بغيت لفلوس (جبد دستامو )شحال بغيتي 

نسرين ...: محتاجة 150 درهم باش نشري داكشي لي محتاجة لبروجي 

جبد  900 درهم ومدها ليها ...: خودي هادي وخبيها عندك ايلا حتاجيتي شي حاجة فسيمانة لي جاية حيت انا ماغاديش نكون هنايا غادي نسافر عندي شي شغالات نقضيهوم انا او الواليد وهادي خبيهم ملي تحتاجي شي حاجة ماشي ضيعيهوم فالخوا الخاوي 

نسرين  لقلوبة خرجو ليها من عينيها ماكرهاتش تنقز عليه وتبوسو...: اه واخا اخويا الله اوصلك على هير شكرا 

براهيم قرب منها وشاف فيها بنبرة قاصحة زرع فيها الرعب ...: نسرين عندك يسحابليك غادي نسافر وغادي تلقاي راحتك الديري مابغيتي كوني على يقين بلي انا غادي نوصي عليك كولشي واياك وتغلطي راني حذرتك غادي تشوفي وجه اخر لي غادي يخليك تندمي على حياتك كاملة مفهوم هاني وصيتك 

نسرين شاافت فالارض ماقدراتش ترفع عينيها فيه ...: ا اه واخا اخويا كون هاني انا عمري عصيت كلامك ولا درت عكس هدرتك وكيف كاتشوفني ديما غادي نبقا هاكا 

براهيم ...: كنتمنى ايوا يلاه سيري لقرايتك دغيا