انا احبك عهدا والعهد دين لا يموت

جزء 3

من بعد ما دخلات للدوش قضات حاجتها وغسلات وجهها وسنانها وخرجات بالزربة لبسات بيجامة واسعة بالحكم فصباح كايكون باباها وخوتها ومشطات شعرها وجمعاتو كوت شوفال وخدات المرطب ودارتو ليديها او وجهها ولبسات فرجليها كلاكيطة ونزلات بالزربة حيت عارفة ماماها غادي تكون ساخطة عليها نزلات كاتكركب فدروج حتى للسفلي دخلات وهي تلاقا مع كوثر فالدخلة دالكوزينة وهما  يخنزرو فبعضياتهم 

كوثر وهي مخنزرة فنسرين ....: ايوا صباح الخير العروسة ويلي علاش نزلتي حشومة كون غير ستنيتينا نطلعو ليك لفطور لفوق 

نسرين ببرود ....: الله يحفظك ليا امرات خويا عارفاك بلي كاتبغيني بزااف وحبك ليا ماعالم بيه غير الله 

خنزرات فيهم لالة خديجة لي كانت كاتعجن المسمن ...: وبقاو مجمعين ليا تماك والفطور انا نوجدو ياك زيدو تحركو دغيا كل وحدة لشغلها راه الوقت الفطور داز ونتوما هاد صباح صبحتو خامرات ولكن انا لي طلقت ليكم كان خاصي نزيركم باش تولو شادين طريق 

يلاه جات تدوي نسرين قاطعاتها خديجة بتخنزيرة ....: نتي زمي فمك ولا نوض ليك نجمع ليك الجديد والقديم يلاه تحركي كملي على المسمن دغيا من بعد ونتحاسب معاك ونتي (شيرات لكوثر ) سيري طيبي الخبز فالفقونة (الفرن التقليدي ) 

مشات نسرين على سعدها او وعدها جلسات على الارض كاتعجن المسمن وهي خاسرة ماحملاش راسها وهاد الحياة  لي عايشة اليوما الويكاند وكان خاصها ترتاح فيه ولكن الا هي بالعكس منوضينها مع سبعة دالصباح تشقا وتذمر تقول عندها لولاد تنوض توكلهم 

المهم عجنات نسرين المسمن وفرقاتو كويرات صغار ومن بعد قرصاتو مزيان وطواتو وموراها طيباتو الحاصول نسرين حادكة فالكوزينة والماكلة من يديها كاتخرج بنينة قادات المسمن لي طيبات فالطباسل وقادات الزيتون وكونفيتور وزيت العود والزبدة والشكلاط فالصينية ومشات حطاتهم فالصالة فين كايتجمعو كان مازال مانزل حتى واحد ورجعات لكوزينة هزات المسمن وحطاتو على الطبلة وتبعاتها كوثر حطات الخبز لي طيبات على الطبلة كان سخون وتبعاتهم موراها لالة خديجة بالصينية داتاي والحرشة بسميد فوقها الزبدة والبيض مسلوق رتبو داكشي فالطبلة وقادوه 

لالة خديجة ...: سيري انسرين عيطو عليهم ينزلو يفطرو 

نسرين ...: وواخا 

كوثر بمياقة  ....: عيطي ليا معاك حتى على اميراتي عافاك غايكونو مازالة ناعسين 

خنزرات فيها نسرين واحد التخنزيرة كون كانو عينيها قرطاس كون تيرات فيها ومشات وهي كاعية وساخطة 

نسرين ....: واخا اكوثر غير صبري عليا شحال من مرة كانقول ليك بعدي عليا ولكن نتي لي جبدتي نحل على راسك انا غانوريك نسرين علاياش قادة 

طلعات وهي الدم طالع ليها مشات لبيت باباها لول دقات جوج دقات فالباب 

نسرين ...: بابا نوض الفطور واجد 

الحاج عبد القادر ...: صافي سيري انا تابعك 

مشات نسرين لبيت خوها براهيم وعاود خوها عبد الماليك عيطات عليهم ينزلو وموراها دخلات لبيت دالبنات لي كاين فنفس الطبقة حلات الباب كانو لبنات ناعسين الغرفة كانت كاع بالزهري وفيها بزااف ديال الاعاب والرسومات والغرفة ديالهم دير 3 من الغرفة ديالها بقات كاتشوف فالمكان وهي فراسها بزااف ديال الاسئلة 

نسرين .,...: علاش انا معشتش الطفولة ديالي بحال كاع دراري علاش انا ملقيتش الحنية لي نستاحق باش كنت طفلة علاش انا مالقيتش الاهل لي يحنو فيا منين كنت صغيرة كنت محتاجة للدفئ والحنان ولكن هادشي عمري عشتو انا 

عينيها ولاو حمرين كرزات على يديها بجهد وهي كاتحاول تنسى الماضي تنفسات بعمق دخلات لغرفة لداخل وهي تقشع الكوافوز ديال كوثر حيت هي دارت الكوافوز ديالها فغرفة ديال بناتها قربات منو وهي تقشع بزااف ديال لي كريم والمرطبات والماكياج وهي تبتسم بشر 

نسرين .....: هههه هاي هاي علا كوثر ولات كاتهلا فراسها ههه (خدات واحد القرعة ديال المرطب ديال الجسم كايديروه مور الاستحمام بقات كاتشوف فيه لمدة حتى تبسمات بشر شافت جيهت الباب لايكون جاي شي واحد وشافت لبنات لي كانو ناعسين ماجايبين للدنيا خبار بتاسمات بمكر ) 

نسرين ....: انا حذرتك من قبل اكوثر قلت ليك بعدي من طريقي ولكن نتي مسمعتيش عندي انا نوريك لعب مع نسرين اش كيسوى 

هزات لقرعة ديال الاسيتون لي كايزيلو بيه صباغة دالاضافر وهو معرفو عليه مضر للبشرة ويقدر يسبب تصبغات واثار على البشرة هزات وكبات منو فالقر عة ديال المرطب وخلطات داكشي مزيان بظفارها ورجعات داكشي لبلاصتو بحال ايلا مادارت حتى حاجة ودارت ابتسامة نصر على شفايفها