أحفاد الطوبجي

البارت 32

#ملحمه
#مملكه_الطوبجي_1
#أحفاد_الطوبجي_2
#أميره_أسامه
#صاحبه_البطل_الواحد

    🔥البارت الثاني و الثلاثون🔥
            😍دقات قلب😍

السعاده اللي كان سالم حاسس بيها متتوصفش فرحته ودموعه ونبرة صوته كان روحه رجعلته من تاني

ماسك كف زيد مش راضي يسيبه وباصص علي الدكتور وهو بيكمل كشف عليه وبيكتب كل حاجه في التقرير اللي في ايده.

فضل سالم يحسس علي راسه بحب وكل شويه يوطي يبوس راسه ويرجع يقوم يبص علي الدكتور.

زيد افتكر كل اللي حصل بس مكانش عارف ايه اللي حصلوا لسه ولا عارف تفاصيل الكام يوم اللي كان فيهم في غيبوبه.

الدكتور.....الحمد لله كده احنا حلوين اوي.

سالم...طمني يا دكتور.

الدكتور.....زي الفل متقلقش كل حاجه فيه كويسه الضغط والسكر و القلب كله تمام

سالم...يعني مفيش اي قلق؟

الدكتور....خالص مفيش اي حاجه تقلق خالص

سالم....طيب هو هيفضل في الرعايه؟

الدكتور.....بص في العادي اي شخص بيدخل في غيبوبه لما بيفوق منها بيبقي معرض يدخل فيها تاني بمعني ايه يعني ممكن يفوق ثواني او دقايق يكلمك ومن غير اي انذار يدخل تاني في غيبوبه ممكن يفوق نص ساعه او ساعه ويرجع يدخل فيها ويمكن دي مش حاجه تقلق اوي لانها بتبقي عامله زي التوابع لسه العقل مترجمش صح لسه مفيش تركيز او انتباه قوي

وفي حالات بتفوق وخلاص مبترجعش تدخل في غيبوبه تاني احنا الوقت بقالنا حوالي نص ساعه وهو الحمد لله زي الفل مركز معانا طبعاً انت اكيد ملاحظ انه بيفتح ويبقي معانا ويرجع يسكت وتحس انه تاه شويه بيغمض عينه ينام دقيقه ويرجع يصحي كل اللي انت شايفه ده ميقلقش خالص هو بيحاول يقاوم اي حد فينا لما بيصحي من النوم بيفضل شويه علي السرير بيحاول يقنع عقله انه خلاص صحي عشان جسمه يبدأ يستجيب ويقوم من علي السرير الكلم دقيقه دول اللي بتفضل فيهم علي السرير بتفضل تغمض عينك تروح في النوم ويرجع عقلك ينبهك ان الوقت هيتأخر فا تروح مفتح تطمن ان لسه فاضل كام دقيقه فا تغمض لحد ما يجي الوقت اللي انت لازم تصحي فيه فا تلاقي تلقائي جداً جسمك اللي كان كله خمول وعينك اللي كانت بتغمض غصب عنك فتحت وفوقت وقومت بسرعه من علي السرير زمان واحنا صغيرين لما كنا نصحي للمدرسه كنا نقول لامنا سبينا خمس دقايق  ونبقي احنا نايمين اكتر من 8 ساعات قبلها يمكن الخمس دقايق اللي كنا بنعيط عليهم دول وبنطلبهم  بالنسبالنا  كانوا بال8 ساعات اللي نيمناهم كلهم وبعدها نقوم فايقين ونصحي خلاص بنشاط.

نفس الفكره في الغيبوبه انت عقلك وجسمك مريحين بقالهم فتره مستحيل لما هتفوق هتقوم علي طول وهي دي التوابع اللي كنت بقولك عليها هي مش غيبوبه بالمعني الحرفي لكن لسه العقل بيقاوح ما بين يصحي ويركز وبين انه لسه مشتغلش بنفس الكفاءه اللي كان عليها فا بيفضل ينام ويقوم يتوه ويركز يفتح ويغمض يعني كل اللي انت شايفه ده مش حاجه تقلق وفي حالته دي بعد نوم حوالي خمس ايام هو محتاج كام ساعه لحد ما العقل يستعيد نشاطه ووعيه الكامل ولما ده يحصل ونطمن عليه والكام ساعه دول يعدوا هنرتاح ووقتها يقدر يخرج علي غرفه عاديه