حمدان : اوووف ترا والله ماكنا نقعد بالفندق طول اليوم طالعين ونرجع تعبانين نبا نريح وانا صح اني قصرت واييد معاج بس اسف و اسمحي لي و اوعدج ان شاء الله مايتكرر هذا الاسلوب ولا التعامل معاج ، مثل ما انتي تبين حمدان القديم انا بعد ابي نفسية روضه القديمه ترد
روضه : مع الحمل ماقدر
حمدان : واذا عشاني؟
روضه : وعشاني انت بتغير من عمرك وبتهتم فيني؟
حمدان : اكيييد بدون ماتقوولين
روضه : اعتبره وعد؟
حمدان : اوعدج وانتي اوعديني
روضه : انا حبي واهتمامي لك واضحين مايبالهم وعد
حمدان : ان شاء الله ماتتغيرين وتعتدل نفسيتج معاي
روضه : معتدله نفسيتي مافيها شي
حمدان : هيه واضح بعدين انتي ماقلتي بترقدين؟ بترقدين ولا اتحرش فيج؟
روضه : بصراحه طار الرقاد شرايك تقوم تطلعني ابي اسير اخذ لي فستان لعرس مهير ، تدري لين الحين ماشفت لي فستان لعرسهم
حمدان : شو هالكسل اللي فيج؟ عرسهم ما بقى له شي وانتي لين الحين ماخذتي لج فستان
روضه : حامل لا تلومني تعبانه من الحمل عيالك متعبيني
حمدان : عيالي بعدهم ما وصلوا وهم متعبينج؟
روضه : هيه دام مافيني رقاد يلا بقوم اجهز عمري
قاموا يتجهزوا للطلعه ، طلعوا مع بعض مروا محلات الفساتين ، قعدت روضه تشوف وتختار كذا فستان ، حمدان طفر ومل وهو يدور معاها ويباها تخلص بسرعه
