Sa una mong iyak,
ngiti ang nakapinta
sa aking mga mata,
ligaya na magisnan
mo na ang kagandahan
ng mundo.
Sa una mong lakad,
ngiti ang nakapinta
sa aking mga mata,
ligaya na samahan ka
kahit saang dulo
ng iyong paglalakbay.
Sa una mong salita,
ngiti ang nakapinta
sa aking mga mata,
ligaya na marinig
mula sa tinig mo,
pagsambit ng pangalan ko.
Sa una mong mali,
luha at sakit ang nadama,
subalit pinalo kita
upang malaman mong
mahal kita,
pinalo kita dahil mahal kita.
Mahal kita,
at nais kong ipabatid sa iyo
na nagkamali ka,
ayaw ko lang ulitin
mo pa ito.
Ngunit napagtanto ko
na hindi ka matototo kung
hindi ka magkakamali,
na hindi ka matototo kung
hindi mo madadanas
ang pagkabigo,
kaya pinalo kita
dahil mahal kita.
Mahal kita,
at lagi lang akong nasa likod mo,
kahit saan ka man
dalhin ng iyong mga paa,
o kung pagsawaan mo na
ang mga emosyon sa mundo.
Mahal kita,
at tanggap ko
hindi mo na ako kasama
sa iyong mga paglalakbay,
subalit narito lang ako
naghihintay
sa iyong pagbabalik.
-JK Cabresos / Lhordyx
Happy Mother's and Father's Day. :)
