ဝေဟင် ထင်ထားသလိုပင် Condo၏ မြေညီထပ် ကားParkingမှာ နေနိုင်း၏ ကားက ရှိနေသည်။ ကားကို သေချာရပ်လိုက်ပြီး လက်မှ အိတ်လေးကို ဆွဲကာ ခပ်သွက်သွက်ပင် အခန်းရှိရာဆီ ဝေဟင် တက်လာခဲ့သည်။ Passwordကို နှိပ်လိုက်ပြီး အခန်းတံခါးကို ဆွဲဖွင့်ကာ အခန်းထဲ အလျင်အမြန် ဝင်သွားလိုက်သည်။ ရေခဲသေတ္တာ ဘေးမှာ မတ်တပ်ရပ်နေသော နေနိုင်းရှိရာဆီ တဟုန်ထိုး ပြေးကာ ခုန်တက်ပြီး ဖက်လိုက်တော့ ဝေဟင်၏ ခန္ဓာကိုယ်မှာ သေးသော်ငြား ယောကျ်ားသား တစ်ယောက်မို့ အနောက်သို့ ခြေနှစ်လှမ်းလောက်ထိ နေနိုင်း ယိုင်သွားသည်။နေနိုင်းက ချက်ချင်းပင် ခြေခိုင်အောင် ညှိယူလိုက်ပြီး ဝေဟင်၏ ခါးကို လက်နှစ်ဖက်ဖြင့် သိမ်းကြုံးဖက်တွယ်ထားရင်း ပြောသည်။
" ထင်ထားတာထက် မြန်တာပဲ။ "
ဝေဟင်က ဖက်တွယ်ထားရင်းမှ နေနိုင်း၏ ကျောပြင်ကို နှစ်ချက်လောက် ထုသည်။
" ရူးနေလား ... ရူးနေလို့ ငါ့ကို ထားခဲ့တာလား။ "
" ကျွန်တော် ယုံကြည်လို့ပါ ... "
ဝေဟင်က ခေါင်းလေးကို အနည်းငယ် စောင်းလိုက်ပြီး နေနိုင်း၏ လည်တိုင်ကို သွားဖြင့်ကိုက်သည်။ အသာအယာကိုက်တာမဟုတ်ဘဲ အားဖြင့်ဖိကိုက်သည်မို့ နေနိုင်းမှာ မျက်လုံးမှိတ် သည်းခံထားရသည်။အကွင်းလိုက်ပေါ်လာသော သွားရာကို ကြည့်ပြီးမှ ဝေဟင်က နေနိုင်းနှင့် မျက်နှာချင်းဆိုင်လိုက်သည်။
" အစ်ကို ကျွန်တော့်ကို ရွေးချယ်မယ်ဆိုတာ ယုံကြည်နေလို့ တစ်ကြိမ်လောက် ကံကို လောင်းကြည့်လိုက်တာပါ။ တွေ့လား ... ကျွန်တော် နိုင်တယ်လေ။ ကိုယ်ချစ်တဲ့သူက ကိုယ့်အပေါ် ထပ်တူ ချစ်မြတ်နိုးပြီး ကိုယ့်လက်ကို မလွှတ်ဘူးဆိုတဲ့ ခံစားချက်က ဘယ်လောက်တောင် ကောင်းလိုက်သလဲ။ "
ဝေဟင်က မျက်တောင်လေးစင်းကာ နေနိုင်းကို ကြည့်ပြီးနောက် ပခုံးလေးပေါ် ခေါင်းမီကာ ငြိမ်သွားပြန်သည်။ခုနက နေနိုင်း၏ လည်တိုင်မှာ အကွင်းလိုက် ကိုက်ခံထားရပြီး ဒဏ်ပေါ်နေသည့် နေရာလေးကို ပြန်ချော့သည့်သဘော ဝေဟင်က နှုတ်ခမ်းဖြင့် ငါးခါလောက် နမ်းပေးပြန်၏။နေနိုင်းက အသက်အောင့်ထားလိုက်မိရင်း ခပ်တိုးတိုး ပြောလိုက်သည်။
