عمران: مَهره احسن ليك تقيفي
مَهره بتطلع ليهو لسانها وقالت ليهو: ابيييت
شافت ام عمران طوالي اتدست بوراها قالت ليها: خالتو الحقيني عمران هيدقني
عمران وقف قال ليها: قولي لامي عملتي شنو
مَهره قالت ليهو: قلت ليك دا اخو صحبتي سلمت عليهو بس
عمران جا عليها وقال: تسلمي عليهو تناديهو بدلعو؟؟
مَهره وهي لسه واقفه ورا ام عمران قالت ليهو: ياخي اختو بتناديهو كدا انا ذنبي شنو
عمران قال ليها: كان مره اطلعي من ورا امي هسي دا
مَهره قالت ليهو:بقت كدا يعني؟؟
ام عمران بتضحك فيهم قالت: يا ولدي م خلاص خليها
مَهره قالت ليها: لالا خليني امرق ليهو
وقفت قدامو بكل ثقه قالت ليهو:اها وريني هتعمل شنو؟؟
عمران عاين في عيونها وقال ليها: بعد تبعدي مني بوريك هأعمل شنو
مَهره قربت وقالت ليهو: ولو قلت لا؟؟
عمران عاين ليها وابتسم ابتسامه بالجنبه وقال: م هأخليك بسيطه يعني
مَهره وقفت على اصابعينها عشان قصيره قالت ليهو: برضو ابيت
عمران طوالي نزل وعضاها من جضومها هي ادتو كف قالت ليهو: انت قليل ادب ولا شنو عايني يا خالتي
قبلت وراها لقت امو ماف رجعت تاني عاينت ليهو وهي رافعه عيونها ورقبتها فوق ومعصبه قالت ليهو: جابت ليها قله ادب كمان
عمران مسكها من انفها وقال ليها: حلاتو المعصب
وزح منها قال: يلا انا هامشي الشغل واياك ثم اياك تمرقي
مَهره قالت ليهو: امشي وهتجي تلقاني ماف
عمران وهو طالع قال ليها: يبقى تنتظريني في بيتكم وم عندي شغله بأيمن ولا احمد
مَهره وسعت عيونها وقالت: وشك زاتو امشي
عمران ضحك ومشى جات ام عمران قالت ليها: يابتي والله غيرك لولدي م عايزه
مَهره خجلت وقالت ليها: لكن يا خالتي في فرق بينا عارفه حبنا مستحيل
ام عمران قالت ليها: ماف شي مستحيل وبعيد من ربنا حاسه نهايتكم بيت
مَهره سرحت وقالت: ياريت يا خالتي والله بحبو اكتر مني
ومسكت الخاتم الاداهو ليها عمران وقالت" والله بحبك❤️"
"جزئيه من الماضي"
_____
مسكت تلفونها لقت مكالمه من طليقها رمت التلفون وم اشتغلت بيهو شالت بتها وطلعت برا اول م طلعت في زول نط قدامها قالت ليهو: آصِف الله يخلعك ياخ
