يتحكي ليهو قالت" أول م جيت هنا طبعاً م عندي مصاريف ولا غيرو نزلت في الفندق الحجزو لي ايمن ومنها تاني اختفى وانا متأكده عمل كدا عشان ابوي غصبو ، فعلا قعدت في الفندق اسبوع وبعدها طلعت لانو مصاريفي م هتكفيني ، بقيت لافه ساي في الشوارع وم باكل غير عيشه واحده وحاف ، وتلفوني فصل شاحن وبقيت م قادره اصل لزول ، بعت تلفوني وبقروشو بقيت بقدر اكل، في مره برضو مصاريفي قطعت بقيت لافه برضو وشايله شنطتي وم عندي اي شي ابيعو قعدت اسبوع وشويه في الشارع ومع التعب وقعت في الشارع ودوني المستشفى والحمدلله ساعدوني وصحيت لقيت شَهله في وشي ، الوقت داك م كنت بعرفها بعد دقايق جات خالتو مِسكه داخله وقعدت معاي وبقت تسألني مالي والحاصل علي شنو ، وقتها م صدقت لقيت ناس مني وفيني ،حكيت ليها وانا ببكي ،فعلاً ساقوني معاهم وقعدت والوقت داك كان آصِف قاعد ، اول م دخلنا بقا يسأل خالتو مِسكه من الحاصل ، ف قالت ليهو بشرح ليك بعدين وفعلاً دخلتني الغرفه ورقدت ومن اليوم داك بقو اهلي وناسي ، قعدت معاهم كم يوم والوقت داك كان حالهم على قدرهم كانوو جو يادوب وقاعدين في شقه كبيره طلبت من شَهله تفتش لي شغل وفعلاً اشتغلت اي شي يخطر على بالك، كنت بغسل عده في المطاعم، وفتره اشتغلت عامله نضافه في شركه ،والفتره ديك كلها كنت بتعرض لأي شي كعب حرفياً ، في البيشاغلني وفي بيمد يدو وفي البقل ادبو بس م كنت بحكي لشَهله عشان م تقول لي اقعد من الشغل ،في مره حصلت مشكله كبيره في المطعم الكنت شغاله فيهو وقفلوهو ومن يومها بقيت قاعده في البيت وحاسه اني تقيله عليهم لانو هم زاتهم حالهم على قدرهم، م لقيت حل تاني غير اني انزل في المستشفى الودوني ليها لمن وقعت وكلمت شَهله ووافقت بعد تعب ،والشغل كان ماشي كويس كنت بنضف ومرات مرات بساعد الممرضين والدكاتره يعني من الاخر كدا خدامه، في مره كنت واقفه بنضف لفت انتباهي في مره قاعده وبتبكي وراجلها فوق راسها ، المره جميله شديد ماشاء االله ملامحها م سودانيه خالص لكن الراجل ملامحو سودانيه بقيت براقبهم وحاساهم واقعين في مشكله ، تاني يوم برضو جو والمره دي انا مشيت معاهم وسمعت الراجل بيقول لمرتو انهم محتاجين واحده يأجرو رحمها، وقتها م كنت عارفه دا شنو بس وقت سمعت المبلغ الخرافي طوالي خبط ليهم الباب وقلت ليهم انا مستعده اعمل كدا ، بتذكر كان الراجل بيعاين لي بنظرات غريبه شديد ، سألني قال لي:انتي سودانيه؟
قلت ليهو :اي
حرك راسو بمعنى طيب
قال لي بس بشرط: هأتزوجك عشان م ندخل في حرمه او غيرو
طبعا انا كنت داخله جديده في الاسلام وم عارفه هو بيقول شنو وهو اقنعني انو لو اتزوجنا هيكون حلال وعادي
،فعلا بدينا الاجراءات وعقد علي وعملنا العمليه وهو جاب لي شقه وعربيه وفتح لي حساب في البنك وبقيت مرتاحه وعايشه براي وطبعاً شَهله هي كانت اول المعارضين على العلاقه دي وكنت بقنعها اني حبيتو عشان كدا وافقت اتزوجو ، وقطعت تواصلها معاي وهي للان م عارفه الحصل في غيابها شنو ، بعد ادهم عرف اني ولدت وعايزه اسجل البت بإسمو هو كان مخلوع لانو قايلها ولد م عارفه جاب المعلومه دي من وين ومن ولادتها هو بيلاحقني وعايز يشيلها مني ،وانا هسي محتقره نفسي شديد وعارفه ليه كِنان قال كدا في الغالب محمد صاحب ادهم طليقي وراهو مكاني ومشى ليهو ووكلمو مع انو من شروط العقد البيني وبينو ماف زول يعرف بس هسي بقى يلعب لصالحو ومُصر يشيل بتي مني".
