شَهله جات داخله قالت ليها: اها يا مَهره قولي ليها وين؟؟
مَهره نزلت راسها وقالت بصوت واطي: طلقني ومشى لمرتو الأولى
شَهله بخلعه قالت ليها: رجعها يعني؟؟
مَهره حركت راسها واكتفت بالسكوت، شَهله بقت خاته يدها في راسها وقالت ليها: سؤال منطقي؟؟ البت دي هتربيها كيف براك؟؟
مَهره عاينت ليها واتنهدت وقالت: هاقعد معاكم لحدي م اشوف لي شقه لانو ابوها عارف الشقه وين م بعيد يجي هناك ويشيلها مني
مِسكه طبطبت عليها وقالت: دا بيتك التاني يابتي وكِنان ولدي زاتو م قاعد طوالي هسي عندو رحله م معروف يجي متين
مَهره سكتت م قالت شي بس عاينت لشَهله ، شَهله قالت ليها: زي م قالت ليك البيت بيتك
مَهره انبسطت وعاينت ليها وهي مبتسمه قالت: عايزه امشي الشقه اجيب شهاداتي وورقي هأخلي معاكم ليندا يا خالتي عشان ابوها ممكن يعمل اي شي يشيلها مني
شَهله قالت ليها: طيب بمشي معاك انا
مِسكه: يابتي م تعبانه انتي؟؟
مَهره حركت راسها وقالت: لالا يا خالتي بمشي وبجي سريع معاي شَهله بس خلي بالك من بتي
مِسكه قالت ليها:خير يابتي ربنا يسهلها
هي وشَهله لبسو ومرقو اول م وصلو مَهره قلبها قبضها قالت ليها: انا بنزل خليك هنا
شَهله حركت راسها بمعنى "طيب" ومَهره نزلت بصعوبه ووصلت شقتها فتحت الباب ودخلت فتحت النور ، اطمنت ماف زول مشت غرفتها فتحت الدولاب بقت تطلع شهاداتها وورقها وهي طالعه عاينت وهي مخلوعه قالت ليهو: انت؟؟؟
في جانب تاني
فاطمه داخله ومارقه زعلانه عشان راجلها سفهها ومرق اتصلت لصاحب ادهم
فاطمه بتوتر: محمد ، ادهم معاك؟؟
محمد قال ليها: اي اي معاي في شنو؟
فاطمه اتنهدت وقالت ليهو: ماف شي بس اديني اتكلم معاهو
محمد بتوتر: لالا هو في الحمام هسي بعد يمرق بتصل ليك تتكلمي معاهو
فاطمه حست في شي قالت ليهو: طيب م تنسى ترجع لي
قفلت الخط بقت مارقه وداخله وهي متوتره فجأه قامت ومشت ع مكتب راجلها فتحت الادراج كلها بقت تفتش ، بعد تعبت من التفتيش قعدت في الكرسي وختت يدها في راسها وقالت: اووف ياربيي وديت الورق وين يا ادهم؟
في قعدتها ادهم جا داخل باس راسها قال ليها: مالك؟ بتفتشي شنو؟
فاطمه قامت على حيلها وقالت: الورقق عايزه الورق، عايزه ولدي يا ادهم!
ادهم حضنها عليها وقال : هانت بكره يكون في حضنك
فاطمه وهي بتبكي قالت: م كنت قايله اني هأتحرم من الاولاد طول عمري لو كنت عارفه م كان خليت ولدي لزول غريب💔.
حضنها عليهو وبقى يطبطب عليها وهي بتبكي.
فاطمه وهي بتتنهد: اسفه عشان كوركت فيك قبيل بس انا بجد عايزه ولدي
ادهم حضنها عليهو زياده وقال ليها: م مشكله وانتي عارفه انا م بزعل منك بس فكره الطلاق دي شيليها من بالك استحاله اطلقك
فاطمه قالت ليهو: ادهم م تخليني انا واثقه فيك شديد
ادهم ابتسم وضماها عليهو وقال: وانا هأكون قدر الثقه دي
باس راسها وسكت م قال شي
الحصل قبيل:
مَهره بعدم استيعاب قالت ليهو: انت تاني ظهرت في حياتي عشان تقلبها لي مش؟؟
ادهم وهو بيقرب عليها: م هأعمل ليك شي بس عايز بتيي
مَهره قالت ليهو وهي بتكورك: اياك ثم اياك تقرب منها ، هسي بقت بتك وعايزها؟؟ وين كنت ال٩ شهور دي؟ انا تعبت وولدتها ولهسي تعبانه انت سألت مننا؟؟؟
ادهم وهو معصب قال ليها: قلت ليك لو ابيتي هاشيل اي شي منك
مَهره ضحكت ونزلت راسها تفتش ورق معين رفعت الورقه وقالت ليهو: انا جيت مخصوص عشان العقد دا!!م تنسى بينا في ورقه وم من حقك تشيل بتك
ادهم جا عليها عايز يشيل الورقه نزلت يدها ومشت ع باب الشقه قالت ليهو: استحاله اديها ليك على م اعتقد عندك نسخه منها صح؟؟ لو عايز بتك بيناتنا المحكمه
فتحت الباب بمفتاحها ونزلت خلت ليهو الشقه اول م وصلت العربيه اتنهدت وقعدت تبكي ، شَهله عاينت ليها وهي مخلوعه: يابت مالك بتبكي في شنو
مَهره حضنتها واكتفت بالسكوت بس ، السواق اتحرك ..
بهناك ادهم عصب شديد دخل الحمام غسل وشو وقعد مسافه يفكر نزل بسرعه ركب العربيه اول م قفل الباب
ادهم: اطلع بسرعه ع البيت فاطمه هتكون مقلقه وقاعده
محمد: هسي هي اتصلت لي قبل تجي بدقايق
ادهم حرك راسو وقبل ع الشباك قال ليهو: عارفها هتكون عملت كدا
محمد قال ليهو: هتعمل شنو ؟
ادهم وهو معصب: رفضت رفضت
محمد قال ليهو: استحاله تديك ليها وهي معاها العقد
ادهم قال ليهو: م هندخل في محاكم وغيرو بس بتي بجيبها
محمد سكت م قال شي وادهم تاني سكت وبقى يفكر قال في سرو " فاطمه لو عرفت استحاله تتحمل البيحصل دا"
