ကျွန်မ ရောက်သွားသည့်အချိန်တွင် မမလဲ့ရီသည် အမျိုးသမီးတစ်ယောက်နှင့် စကားပြောနေလေသည်။မမလဲ့ရီသည် ဖုန်းမဆက်ဘဲ မပြောမဆိုရောက်ချလာသောကျွန်မကို မြင်၍ အံ့သြသွားသည်။ကျွန်မကို အခန်းထဲဝင်စောင့်နေရန် မျက်ရိပ်ပြသည်။
ဆယ့်ငါးမိနစ်ခန့်မျှ စောင့်နေပြီးနောက် မမလဲ့ရီဝင်လာသည်။
"ဘယ်လိုဖြစ်လို့ ဖုန်းမဆက်အကြောင်းမကြားဘဲ ရောက်လာတာလဲ ကေသီရယ်၊တစ်ယောက်ပဲကျန်တော့လို့တော်သေးတာပေါ့၊ကဲ ဘာတွေအရေးကြီးလာသလဲပြော"
"လာဖို့အစီအစဥ်မရှိဘဲ မမလဲ့ရီရယ်၊ဂျူတီပြီးတော့မှ သွားချင်စိတ်ပေါ်လာတာနဲ့ လမ်းရောက်မှဖုန်းဆက်လိုက်တာ မမဖုန်းကမအားသေးပါတဲ့၊မြနန္ဒာအခြေအနေသိချင်လို့ပါ"
မမလဲ့ရီက ကျွန်မအတွက်ပါ ကော်ဖီဖျော်ပေးသည်။
"မြနန္ဒာလား၊သူက စိုးရိမ်စရာတော့မလိုပါဘူး၊စိတ်အတက်အကျမြန်တာလေးတစ်ခုပဲ၊မမမေးတာတွေလည်း အေးအေးဆေးဆေးဖြေနိုင်တယ်၊ပထမဆုံးတစ်ခေါက်ထက်စာရင်တော့ တိုးတက်လာပြီလို့ပြောလို့ရပါတယ်၊ဒီထက်ပိုပြီးပြောလို့မရတော့ဘူးနော်ကေသီ၊တို့လူနာရဲ့ privacy မို့ပါ၊သိချင်ရင် မြနန္ဒာဆီမှာထပ်မေးကြည့်"
"သိပါတယ် မမရာ၊ကေသီက မမနဲ့လည်းဖုန်းပဲပြောဖြစ်ပြီး မတွေ့ဖြစ်တာကြာပြီမို့လို့ပါ"
"မပိုစမ်းပါနဲ့ကေသီရယ်၊တို့ညီမအကြောင်း မသိဘူးများထင်နေလား၊နင်ဘယ်တုန်းက သူစိမ်းတစ်ယောက်ကို အခုလိုအရေးတယူလုပ်ဖူးလို့လဲ၊ပြောစမ်း မြနန္ဒာမှာ အစ်ကိုတွေမောင်တွေရှိသေးလား၊အစ်ကိုနဲ့လား ဒါမှမဟုတ် မောင်နဲ့လား"
"အို မမရယ်၊မဟုတ်ပါဘူး၊အစ်ကိုတွေမောင်တွေလည်းမရှိပါဘူး၊အခန်းနီးချင်းတွေမို့ ခင်နေကြတာပါ"
မမလဲ့ရီက စနောက်နေကျပေမယ့် ကျွန်မ ပြာပြာသလဲငြင်းမိသည်။
"ဟုတ်လား၊မမဆေးခန်းနဲ့ချိတ်ပေးရတဲ့အထိတောင်စိုးရိမ်နေတာဆိုတော့ တော်တော်ခင်နေပြီထင်တယ်"
မမလဲ့ရီသည် ကျွန်မကိုအဓိပ္ပါယ်ပါပါကြည့်၍ ပြောသည်။ဘုရားရေ၊ကျွန်မအခုမှ သတိဝင်လာသည်။မမလဲ့ရီဟာ မိန်းကလေးချင်းချစ်တဲ့သူပဲ။ကျွန်မ သူ့ဆီမှာမမိအောင် ဟန်ဆောင်ရသည်။
YOU ARE READING
To Cathy With Love
General Fictionတစ်သက်နှင့်တစ်ကိုယ်မရောက်ဖူးသည့် အရက်ဘားတစ်ခုတွင် မြနန္ဒာဟူသော အမျိုးသမီးတစ်ဦးကို ကျွန်မ ရှာဖွေနေကြောင်း သူငယ်ချင်းတွေမြင်ခဲ့လျှင် "ကေသီ၊နင်ရူးသွားပြီလား" ဟုအမေးခံရပါလိမ့်မည်။ *** ဇာတ်လမ်းထဲမှာပါတဲ့ အဖြစ်အပျက်၊အကြောင်းအရာနဲ့ ဇာတ်ကောင်တွေကို စာရေးသူ...