ကုတင်ပေါ်မှ အိပ်ယာခင်းကို အောက်ချကာ ခင်း၍ နှစ်ယောက်စလုံးအိပ်ကြသည်။
"ချစ်တယ်နော် ကေသီ"
မြနန္ဒာသည် ကျွန်မ ကြားချင်နေသော စကားကို အိပ်ပျော်ခါနီး မှေးခနဲဖြစ်နေသော အချိန်မှာမှ တိုးတိုးလေးကပ်ပြောလေသည်။ကျွန်မကလည်း ရှင်းရှင်းလင်းလင်းပင် ကြားလိုက်ရသည်။
"ဟင် မြနန္ဒာ၊ဘာပြောလိုက်တာလဲ"
တဖြည်းဖြည်းလှုပ်ရှားလာသည့်ကျွန်မ၏ ခေါင်းကို မြနန္ဒာသည် သူ့လက်တစ်ဖက်ဖြင့် အသာအယာပြန်ဖိထားသည်။ကျွန်မ၏ခေါင်းသည် ခေါင်းအုံးနှင့်ပြန်ကပ်သွားလေသည်။ကျွန်မကလည်း မြနန္ဒာ၏ မေးစေ့ကလေးကို ရအောင်နမ်းလိုက်လေသည်။
"ကေသီနော်၊အခွင့်ကောင်းမယူနဲ့"
"အို ၊ကျွန်မကပဲ အမြဲအခွင့်ကောင်းယူခံရတာပါနော်"
"အို သူကပဲပြောရတယ်ရှိသေးတယ်၊ဘယ်တုန်းကလဲ"
မြနန္ဒာ ထထိုင်လေသည်။
"ရန်ကုန်မှာတုန်းကလေ၊မြနန္ဒာပဲ Good Night ဆိုပြီး သူများပါးကို လာလာနမ်းတာလေ၊ဒီက ပြန်တုန်းကလည်း နဖူးနမ်းသွားသေးတယ်၊အရက်မူးတုန်းကလည်း ကိုအောင်နဲ့မှားပြီးတော့ အနမ်းခံလိုက်ရသေးတယ်၊ကျွန်မကမှ နစ်နာသူအစစ်ပါနော်"
မြနန္ဒာသည် ဘာမှပြန်မပြောနိုင်ဘဲ အံ့သြနေလေသည်။သူ့ကိုကြည့်၍ ရယ်ချင်လာသော်လည်း အောင့်ထားရသည်။
"မင်းက နစ်နာတယ်ပေါ့ ဟုတ်လား၊ကဲ အဲ့ဆို၊နစ်နာသူကြီးကို အလျော်ပြန်ပေးမယ်၊ရော့"
မြနန္ဒာသည် မျက်လုံးမှိတ်ပြီး သူ့မျက်နှာကို မော့ထားပေးလေသည်။ကျွန်မ အသံထွက်ရယ်မိတော့သည်။
"ဘာရယ်တာလဲ၊နစ်နာကြေးမယူဘူးလား"
"မယူပါဘူး မြနန္ဒာရယ်၊ကျွန်မက စတာပါ၊ခုနက ပုံစံလေးကို အသည်းယားလိုက်တာ၊အချစ်နဲ့ထိတွေ့ရင် လူတိုင်း ရူးတာပဲနော်၊ကျွန်မလည်း ရူးနေပြီ"
"တို့တော့ မရူးပါဘူး၊ကေသီပဲရူး၊အိပ်ချင်နေပြီကွယ်၊အိပ်ရအောင်နော်"
နောက်တစ်နေ့တွင် ကျွန်မတို့ ပိုင်ပိုင်ဆီ သွားကြသည်။ ပိုင်ပိုင်လည်း မြနန္ဒာရောက်နေတာ မသိသေး။မြနန္ဒာက ဖုန်းဆက်ပြောချင်သော်လည်း ကျွန်မက မပြောနဲ့ဟု တားထားလိုက်သည်။အံ့သြသွားမည့် ပိုင်ပိုင့်ကို မြင်ချင်သေးသည်။
YOU ARE READING
To Cathy With Love
General Fictionတစ်သက်နှင့်တစ်ကိုယ်မရောက်ဖူးသည့် အရက်ဘားတစ်ခုတွင် မြနန္ဒာဟူသော အမျိုးသမီးတစ်ဦးကို ကျွန်မ ရှာဖွေနေကြောင်း သူငယ်ချင်းတွေမြင်ခဲ့လျှင် "ကေသီ၊နင်ရူးသွားပြီလား" ဟုအမေးခံရပါလိမ့်မည်။ *** ဇာတ်လမ်းထဲမှာပါတဲ့ အဖြစ်အပျက်၊အကြောင်းအရာနဲ့ ဇာတ်ကောင်တွေကို စာရေးသူ...
