To Cathy With Love

Episode 17

တရိပ်ရိပ် တက်လာသောလရောင်အောက်တွင် အဝေးဆီမှ အိမ်များသည် ထင်ရှားလာသည်။
တချက်တချက်တွင် ထွက်ပေါ်လာတတ်သော ညဥ့်ငှက်၏အော်သံမှအပ ပတ်ဝန်းကျင်တစ်ခုလုံးသည် တိတ်ဆိတ်၍နေပေသည်။ညနတ်သမီးသည် မြူပုဝါကို ခြုံထားလေသည်။ဆောင်းလေအဝှေ့တွင် ပုဝါစသည် လွင့်၍လာပေသည်။အချိန်အားဖြင့် ညဆယ်နာရီကျော်ရှိပြီ။

ပိုင်ပိုင်သည် မြနန္ဒာလက်ဆောင်ပေးထားသည့် ကင်မရာဖြင့် မြင်သမျှလိုက်ရိုက်နေ၏။ကျွန်မနှင့် မြနန္ဒာသည် စကားမပြောမိကြဘဲ ပိုင်ပိုင့်ကိုသာငေးကြည့်နေမိကြသည်။ဖေဖေနှင့် မေမေသည် အိပ်ချိန်ရောက်၍ အိမ်ပေါ်သို့တက်သွားလေပြီ။ကျွန်မတို့သုံးယောက်သာ အိမ်ရှေ့မြက်ခင်းပြင်ရှိ စားပွဲဝိုင်းတွင် ကျန်ရစ်ခဲ့ကြသည်။

အေးလာသည် ထင်ပါ၏။မြနန္ဒာလက်ပိုက်လိုက်သည်ကိုတွေ့ရသည်။ကျွန်မသည် ဆွယ်တာတစ်ထပ်ဝတ်ထားသော်လည်း မြနန္ဒာနှင့်ပိုင်ပိုင်သည် အပြင်ခံဝတ်မထားချေ။အိမ်ထဲဝင်ပြီး ပိုင်ပိုင်အတွက် ငြိမ်း၏ဆွယ်တာတစ်ထည်နှင့် မြနန္ဒာအတွက် မေမေဝယ်ပေးထားသည့် မသုံးရသေးသော အပြာနုရောင်ခြုံပုဝါတစ်ထည်ယူလာခဲ့သည်။

ပုခုံးပေါ်တွင် ပုဝါလွှမ်းပေးလိုက်သည့်အခါ  မြနန္ဒာသည် ကျေးဇူးတင်သည့်ဟန်ဖြင့် ပြုံးပြသည်။ ကင်မရာသံတဖြတ်ဖြတ်ကြား၍ လှည့်ကြည့်တော့ပိုင်ပိုင်သည် ကျွန်မတို့နှစ်ယောက်ကိုအမိအရ ဓာတ်ပုံရိုက်နေလေသည်။

"မမ ကြည့်ကြည့်၊မိုက်တယ်မလား၊ဒီလိုအပြုံးတွေအကြည့်တွေဆိုတာ တမင်လုပ်ယူလို့မရဘူး၊ဒီလိုအခိုက်အတန့်မျိုးကိုမှတ်တမ်းတင်နိုင်ဖို့ဆိုရင် ကင်မရာမန်းကကြည့်တတ်ပြီး မျက်စိလျှင်ဖို့လည်းလိုတယ်"

ပိုင်ပိုင်သည် အောင်နိုင်သူအပြုံးဖြင့် သူ့ကိုယ်သူဂုဏ်ယူနေတော့သည်။မြနန္ဒာကတော့ ပိုင်ပိုင့်ကိုပြုံးကြည့်နေသည်။တကယ်ပင် မြနန္ဒာအားပုဝါခြုံပေးချိန်ကို ပြည့်ခါစ လ ပုံနောက်ခံနှင့် ကွက်တိရိုက်မိထားလေသည်။
ဒီကောင်မလေး ဘယ်တုန်းကဘယ်လိုမြင်လိုက်သလဲမသိ။

ပိုင်ပိုင်သည် မြနန္ဒာကိုလည်း ပြလိုက်သေးသည်။မြနန္ဒာသည် ပိုင်ပိုင့်ကို၍ချီးကျူးလေသည်။အခုလို လူအများနှင့်မိသားစုကဲ့သို့ နေရသဖြင့် ပျော်နေသော ပိုင်ပိုင်ကိုကြည့်၍ မြနန္ဒာပျော်သလို ကျွန်မလည်းပျော်နေမိပါသည်။