ياسعود ما أتعَبتني السِنين أنتظارك

البارت الخامس عشر

بقلم الكاتبه دَنو آل عَبدالله✍🏻

{البارت الخامس عشر}

بِسْمِ اللَّـهِ الرَّحْمَـٰنِ الرَّحِيم

ياسر: أجل يلا نتحرك للبقاله وفكري بوش تبي تسوي
موضي: تمم
~
"في المزرعه"
دخل سلطان عند الرجال لخيمتهم و رد السلام عليهم: السلام عليكم
الكل رد بصوت واحد: وعليكم السلام ورحمة الله وبركاته
تقدم سلطان يجلس جنب سعود
سعود: ليه تأخرت رد سلطان عليه: يرجال ماتأخرت كثير
فهد وهو جنبهم بحلطمه قال بهمس: انا انكرفت عاد انت ياسلطان مهمتك خفيفه
سلطان: خفيفه بس يكون عندك صبر
فهد: الظاهر ما عجبتك مهمتك عاد تعال خذ مهمتي من الصباح وانا بالمزرعه جبت الحطب لحتى نشب النار بالليل
سلطان تنرفز منه وقال: يرجال اقول اذلف انا بروح عند اسطبل الخيول بشوف وجود
سعود بأستغراب: وش فيها وجود
سلطان: ابد زعلت مني براضيها
فهد: ذي مثل العنز عنيده ماترضى بسرعه
سلطان:ماعليك بحاول معها
~
"عند خيمة الحريم "
دخلو حفيدات الجد سعد عند الحريم وسلموا على الحريم
تقدموا حفيدات سليمان لعند حفيدات سعد وجلسوا كلهم مع بعض
لين شافت غزال اول ما دخلت كانت متلطمه بالشماغ وقالت بأستغراب: غزولتي وين نقابتس
ضحكوا حفيدات سعد وقت تذكروا
غزال بضحكه: مدري نسيت وين حطيته والملاحق كانت كلها مقفله
الهنوف: وربي فشله
ميهاف: بس الحل حقتس يجنن
تحنحت وجود وقالت بكل ثقه: طبعًا انا اللي انقذتها وحليت المشكله
غزال ناظرت وجود وقالت بكل حب: فديتها منقذتي احبتس
وجود رمت بوسه بالهوا لغزال
ضحكوا البنات على حركتها: ههههههههههه
دانا بضحك: الله حركاااتتت ماعرفتس
وجود: أوبس كان لازم تعرفيني أجل
وكملوا البنات ضحك عليهم
~
"عند ياسر وموضي"
ياسر: هاه وش بتسوي حلى
موضي بتفكير: افكر اسوي كوكيز
ياسر: كل شي من يدك لذيذ
موضي: الله يحفظك ياولد اخوي
وكتبت موضي المكونات اللي تبيهم وارسلتهم لجوال ياسر لحتى ينزل يجيبهم
وقف ياسر سيارته جنب البقاله ونزل يجيب اللي طلبتهم موضي
وماهي الا دقايق رجع ياسر ومعه كل شي طلبته موضي
ياسر: جبت كل شي طلبتيه ودتس شي ثاني تآمريني بشي
موضي: هذا العشم فيك ياولد اخوي ماتقصر
ياسر: يعني اتحرك للبيت
موضي: ايوه يلا توكلنا على الله
وتوجهوا للبيت
~
"في المزرعه"
عند البنات
وجود: دنو تروحي معي عند اسطبل الخيول اشتقت لزامري
دانا: وانا بعد اشتقت لأبهري وبشوف ترف بعد
وجد: اخاف منهم
ضحكوا البنات عليها: ههههههههههه
وجد: اصه يعني لازم يكون عند الشخص مخاوف والخيول وحده من ذي المخاوف
رويدا بطقطقه: أجل تخافي من القطوه
وكملت ضحك عليها
وجد: مابقول شي انكتموا
رنيم حطت يدها على كتف وجد تبي تحضنها وقالت: لا حد يزعل حبوبتي
وجد: احبتس ياعيونها
رنيم: وانا بعد احبتس
وجود تناظرهم بغيره وتقول: اقول دنو امشي نروح عند الخيول
دانا بحماس: تم يلا قودااممم
وتوجهوا عند اسطبل الخيول
~
"عند ياسر وموضي"
فتح ياسر البوابه ودخل بسيارته للداخل
ياسر: سريع سريع تجهزي لحد ما اتروش
موضي: الملاحق كلها مقفله كيف بتتروش
ياسر: ثوابي معي بالشنطه حقتي ماعليتس
موضي: اجل تم بروح اتجهز وازهب الحلى
وتحرك كل واحد يتجهز
'بعد ماتجهزت موضي واخذت اللي تبي تاخذه معها للمزرعه ومن ضمنهم هدية عيد ميلاد غزال دخلت المطبخ تزهب الحلى لحد ما يتروش ياسر ويتجهزو
وبعد ساعه ياسر وموضي تجهزوا وتوجهوا للمزرعه يقضون معهم ثلاث ايام
~
"في المزرعه، عند اسطبل الخيول"
دخلت دانا وبصوتها الجمهوري تنادي على خيلها ونطقت: يا الأبهررر
اول ماسمع الأبهر صوت فارسته ركض الأبهر لعندها
دانا بشوق لخيلها قالت: وحشتني ابهري
ركبت عليه وبدت تلعب معه والأبتسامه على وجهها، اما عند وجود قبل ما تروح ناداها سلطان
وجود وهي بعدها زعلانه منه قالت: هلا سلطان وش بغيت أخلص بروح عند زامري
سلطان بعصبيه: علامتس الشرهه عليي اراضيتس
وجود بجديه: جاي تراضيني وتعصب عليي؟
سلطان بدا يستغفر في داخله مايبي يعصب زياده وتزعل زياده وقال: العذر والسموحه مب قصدي اعصب عليتس بس انتِ طالعتي خلقي مابقى غير تطلعيني عن ديني بعنادتس وماقدرت امسك نفسي
وجود بعد ما حست بغلطها قالت: كنت استفزك وقتها ماكان قصدي وانت تدري اني استفزك لأني احبك
سلطان بأبتسامه بانت على وجهه: يعني رضيتي؟
وجود: مازعلت منك بس كنت معصبه من ردك
وكملت كلامها وقالت: هو حد عنده سلطاني ويزعل وربي انه مب صاحي
سلطان فتح يدينه ودخلت اخته بحضنه وحب راسها
وجود وهي بحضنه: جعلني ما انحرم منك ولا اعدم
سلطان: تبين شي
وجود: لا ياخوي مابي شي
سلطان: ان تبين شي كلميني او ناديني وان ماكنت موجود نادي عليي
وجود ابتسمت وقالت: ابشر
سلطان: تبشري بالجنه
رجع سلطان عند خيمة الرجال و وجود عند دانا بالأسطبل
~
دخلت الونيت حق ياسر ومعه موضي للمزرعه ودق البوري حقه طلع ناصر وفهد وصالح يشوفون من جاهم
ناصر بس شاف اخوه دق تحيه وقال بصوته الجمهوري: ارحببب يا العضيدد
ياسر ابتسم بس شافه وسمع ترحيبه
ياسر من بعيد قال بصوت جمهوري: البقى يانويصر
فتح العامل اللي يشتغل بالمزرعه البوابه بحكم انهم قفلوها بعد ما دخل الكل
فتح فهد الباب لعمته موضي وقال: ارحبي ياعميمه شحالتس ردت موضي عليه وقالت: دامك بخير انا بخير يا ولد يوسف، رد فهد عليها وقال: جعله دايم بخير
ودخلت موضي للداخل عند الحريم
نزل ياسر من الونيت وسلم على ناصر وفهد وصالح (سلام رجال)، وعلى جية سلطان لهم
سلطان: ارحب ياولد العم
ياسر: تبقى يبو يوسف
ودخل عند الرجال
تقدم ياسر يسلم على الرجال وعلى جده وابوه
وجلس جنب ناصر اللي مستانس بوجود ياسر جنبه
ناصر بهمس لياسر: افااا ما قلت لي انك جاي
ياسر: ياولد حبيت افاجأكم
ناصر: مادخلت عند امي للحين
ياسر: الحين ادخل عليها واشوف البنات ترا ماحد يعرف اني جاي حتى موضي تفاجأت بس قلت لها اني بكون الكابتن حق الرحله
ناصر: لاتعيدها وتسوي اشياء من وراي
ياسر ابتسم وبانت غمازاته وقال: ابشر يا العضيد والحين انا بستأذن بدخل عند امي واشوف البنات
استأذن ياسر منهم وتوجهه لخيمة الحريم يشوف امه وخواته
~
"في خيمة الحريم"
دخلت موضي عليهم وردت السلام على الحريم وحبت راس امها
موضي: شلونتس يمه
الجده نوره: بخير يابنتي متى وصلتي ومن جابتس
موضي كان ياسر منبها ماتقول للموجودين انه جاي لأنه يبي يفاجئ اهله وحاولت تتهرب من السؤال وقالت: يمه الحين برجع بشوف بنات اخواني وتوجهت عند البنات
موضي بحماس: سيبرايززز يحلوات
عهد: ارحبييي ميشوو
ديم: الحمدلله على السلامه
موضي: ألبقى عهدي وكملت كلامها وقالت: الله يسلمتس حَرم عبدالعزيز
موضي: جبت لكم حلى ساويته بالبيت اول مارجعت
رنيم: يوهه ذا انتِ متى وصلتي الظاهر من زمان
موضي: ايوه ساويته سريع وجبته ذا حلى السمره بالليل بعد ما ينام الكل نطلع لبره خلف الخيمه ونجلس
لينا بحماس: تمم
موضي بطقطقه: اوباا غريبه مب جالسه مع دنو كل ما التفت لتس الا تكوني معها
ضحكت لينا من كلامها: ههههههههه
لينا: قالت تبي تشوف الأبهر وخرجت مع وجود عند الاسطبل
موضي: ايوه عاد كان لازم لحقتيها
لينا: مالي خلق قلت بجلس مع البنات
قاطع حديثهم ساره وقالت: ديم شهم وينه
ديم: عند عبدالعزيز
ساره: مدري ان كانت حور معه
ديم بضحك: اكيد شهم اخذها معه عندهم
غزال ناظرت ساره وقالت: تبين اطلع اشوفها
ساره هزت راسها بمعنى "ايوه" وقالت: شوفيها وان كانت مع شهم خليها بس ابي اتطمن عليها لأن عبدالرحمن جواله مقفل
قامت غزال من مكانها تشوف حور
قربت اذنها لعل وعسى تسمع صوت حور هي وشهم وماسمعت صوت فكرت ان مافي حد جنب الخيمه جالس ومدت راسها لخارج الخيمه والا سلطان لمح غزالته وتوجهه لها
سلطان بأستغراب: في شي ليه طالعه
غزال بتوتر: ءءكنت بدور على حور وشهم زوجة عبدالرحمن تبي تتطمن على بنتها
سلطان والغيره ذابحته مع انه ماكان حد غيره بالخارج وهو اللي لمحها وقال: وان كنتي تبي تشوفيها تطلعي راستس سلاماتت غزال
غزال والدموع في عيونها لأنه اول مره يتكلم معها بذي النبره قالت: وش فيك كلها بشوف شهم وحور وكملت كلامها ونطقت: وصوتك لاعاد ترفعه ما احب الصوت العالي
سلطان لمح دموعها بمحاجر عيونها وقال: ما اقصد ازعلتس بس خفت حد يشوفتس
غزال: وانت عادي تشوفني وانت ما تحل لي!
سلطان: اذا انا اليوم مب حليلتس باكر حليلتس
قبل ماتقول غزال شي حط سلطان يده على فمها وقال بأستعجال وقلة صبر: تبين اطلبتس من ابوتس وقدام الرجال
غزال تسارعت نبضات قلبها وقالت بصدمه: هاه كيف
سلطان: وش اللي كيف ابطلبتس من ابوتس على سنة الله ورسوله انا رايدتس بالحلال يابنت سالم
غزال بخوف: ءسلطان انا مب جاهزه لذي المرحله
سلطان بعصبيه: وش اللي مب جاهزه قلتي لي اني اشوفتس وانتِ ما تحلي لي ووقت قلت لتس بطلبتس بشرع الله صرتي مب جاهزه
غزال: انا مب جاهزه
سلطان بعناد: بس تسمعي ان ضاري يبيتس بشي ويناديتس وقتها اعرفي جاي ياخذ رأيتس
غزال: يعني هي عناد
سلطان بأصراره على قراره قال: ايوه يابنت سالم وماياخذتس الا غيري
غزال بعناد: ماراح اوافق عليك
سلطان: الرجال اللي يعطون الكلمه
غزال والدموع بعيونها: ما ابيك دامها عناد
سلطان: يعني تكرهيني يابنت سالم؟
__________________
ارحبووووو ينجوميي✨، شلونكم ان شاء الله تكونوا بخير عُدنا ببارت جديد يحبه قلبكم ودي اشوف حماسكم للبارت الجاي بالكومنتات اكتبوا رأيكم بالبارت رأيكم يهمني واعطوا البارت حقه وادعموني بنجمه لحتى استمر
استودعتكم الله❤
ألتقي فيكم ببارت جديد🌸🌸.