ما بين العناق والفراق

الجزء الخامس (ما بين العناق والفراق)

يُقال .. كل شي تهرب منه راح يركض وراك ويلاحقك ،
لازم توصل لمرحلة انك تواجهه أسوء مخاوفك .. بمرحلة ما من حياتك..
سواءاً جانت : حب / فراق /وحده / فشل .. الخ ..
ف شنو الحل ؟
ببساطه المفروض انك تنطي لنفسك الفرصة أنك تواجهه الموقف وتختار اكثر حل انت كارهه بهالدقيقه .. لان احتمالية اختيارك للحل الصح تكون جبيره فقط بهيج حاله ..
النكران ماراح يفيد ولا الندم ..
كلنا نتحمل مسؤولية تصرفاتنه ..
الحلول دائماً موجوده .. حارب بكل قوتك وأترك الباقي على الله . 🤍

هذا جان منطقي بالحياة ..
وجنت اطلع من اغلب مشاكلي بهالطريقه ..
اهلي ناس فقره وعلى نياتهم ماعندهم وعي كافي بالحياة بحيث يشرحولنا كيفيه التصرف مع المواقف المختلفه  بالحياة ،
بعيداً عن الدراسه .. لان همه جانو يشجعونه على الدراسه فقط .
اعتقد رادو يعوضون نقوصاتهم  بأنهم يدفعونه للتفوق بالدراسة ..

١٠٠ الف فكرة عشوائيه دتخطر ببالي  بهالدقيقه بموقف يتطلب مني التصرف السريع هسه ..

هيثم : اوف اوف؟ هاي شبيج مثل الصنم صرتي  ؟
هو شوفي ... ( يعدل وكفته  )
اني تصورتج تنصدمين بس مو هلكد هاي انتي واكعه وكعه جبيره طلعتي
وضحك ..

بأستهزاء نظرت باتجاهه بغرور أكبر
ونبره حادة
زمن : .. تصدك بشنو دافكر ؟
هيثم : اي بالله شنو ؟

تالين متوتره  : زمن زمن .. عوفيه تعاي نروح  هسه

باوعتلها بأستحقار ..

زمن : انتي بالذات تنسين وحده بهالاسم وماريد اشوفج بعد اليوم .

هيثم : تتعاركين وياها بعدين هسه كمليلي بالله
تقربت خطوتيين كدامه وحطيت عيني بعينه وركزت بعيونه
حسيته ارتبك
زمن  : هههههه متحمس كلش ؟ ليش ؟
عقد حواجبه وبلع ريكه ..

زمن : طيب طيب ..  حتى لا تظل حسرة بقلبك راح اكولك ..
بصراحه  !!.. دافكر شكد فارغ انت بحيث من صباحيات الله ، العالم رايحه تسترزق وتشوف اشغالها وانت اقصى طموحك تسأل عن بنيه بطريقه ارخص من الرخيصه .. لأي مرحله من الفشل واصل انت لعد؟

باوعت لتالين وحجيت  : وانتي ؟
البارحه جنتي دتحذريني منه واليوم بحضنه تضحكين وياه هههههه

جيت امشي ..
بعدين

وكفت ودرت وجهي عليه وكلت : بس تعرفون ؟
والله  الرخاص يرهمون لبعض جدر ولكه غطاه ..

واشرت بيدي باستهزاء عليهم اثنينهم
اخذت نظرة سريعه على تالين وشفت وجهها قلب الوان وعيونها غرغرت ..
اما هو ف انصدم وبين عليه عصب كلش وراح يفقد..