ملاحظة : بما انو عندنا متابعيين عرب للروايات ف حتى نضمن انهم فاهميين الكلام العراقي عند كل كلمة اشوفها صعبة راح احط هاي العلامة (*) وتلقون تحت البارت معنى الكلام بالفصحى وشكرا ❤️
" لا تؤجل عمل اليوم الى الغد "
- جملة جانت امي دائماً تقولها الي!
جنت أكرهه هالحكمة لان بالعادة تكون مربوطه بنهايتها أمر معين او خدمة ..
كبرت وعِرفت أني قضيت تقريباً معظم أيام سنيني
وأني أعاني من موضوع تأجيلي للأمور سواء جانت دراسية ، علمية او حتى عاطفية
اتجنب أواجه الاشياء وأفضل اشغل نفسي بأمور ثانية حتى لا أضطر احل مشاكلي ..
خوف .. بس من شنو ؟ مااعرف .
خلينا نرجع لذاك اليوم ..
........
انسدت باب غرفة زمن بقوة
نزلت ام زمن من الدرج بعصبية وانفعال وهي تتأفف
وهي تفكر ويه نفسها :
"شبيها شجاها هالبنيه ؟ !! انطيتها عين زيادة ؟
ماعرفت اربيها مثل اخوها !!
لا اكيد اتمردت وصار لازم الزم زمام الامور
اليوم احجي ويه ابوها بس يوصل خل تصبرلي ! "
زياد : ها يمه شبيج شو تحجين ويه روحج؟
ام زمن : اووف لتشغل بالك كمل غداك وليدي واريدك كبل وراها للدراسة
زياد : هااا شحجينا قبل شويه ! مو كتلج كملت دراستي
اني شبعت يمه عاشت ايدج اريد اطب اسبح
ام زمن : اصبر ابني ماكو مي حار والدنيا بلشت تبرد
خل افورلك المي الحار بالقوري الجبير على النار احسن ما تتمرض
زياد مزعوج : ايوااا يعني معناها اظل انتظر للصبح
يمه الحمدلله على كل حال بس احنه الى متى هيج ؟ باعي اصدقائي كلهم ركبو *كيزرات *جديدة ببيوتهم تشتغل اوتماتيك
ام زمن : الله كريم حبيبي هسه شبيدي عليك اني
رفع حواجبه بأستسلام وطلع من المطبخ ..
....
بعد عدة ساعات ..
نزلت زمن متوترة من الغرفه الي بالطابق العلوي
ركضت باتجاه الصالة بعد ما اتأكدت انو ماكو احد ..
بهالوقت كل الي بالبيت ياخذ قيلولة الظهر ..
مسكت التلفون الارضي واتصلت بصديقتها نبراس
زمن : ا .. الو ؟
ام نبراس : الو منو ؟
زمن: السلام عليكم خالة اني زمن
ام نبراس : هلا بزوزو الشطوره شونج حبيبتي وشونها ماما
زمن بخجل : الحمدلله خالة تسلمين .. موجوده نبراس ؟
ام نبراس : اي حبيبتي هسه اصيحها
تسد السماعه بيدها وتنادي
نبررررراس .. يمه نبراااس تعاي هاي صديقتج زمن
أنت تقرأ
ما بين العناق والفراق
Storie d'amoreقصة جديدة واقعية لفتاة بسيطة تنقلب حياتها رأساً على عقب في زمن النظام السابق العراقي الرواية التي قلبت كل الموازيين .. 🌪️
