حكاوى اروى

مظاهر خداعة (الجزء الثاني)

كان عمر قاعد في صالون بيتنا وانا دخلت وشايله كوبايتين عصير فوقفلي وبصيتله
يعني... هو ملامحه مريحة ، بجد زي ما قُلت كدا، مريحة
تحسسك إنه شخص انت تعرفه من زمان، عاشرته، قابلته زمان علي البحر، أو شوفته وهو بيساعد راجل كبير يعدي الطريق، بيقف للست في الاتوبيس عشان متتخبطس في الرجالة، أو شاب عاكسك فدافع عنك بكل شهامة، شخص  روحه طيبة قابلتيه مرة فعقلك رفض ينساه .
&&&&&
حطيت العصير وقعدت وهو كمان قعد كنت متوترة  وكان باين عليا
عمر... العصير حلو اوي تسلم ايدك
ملك.... ان شاء الله تسلم
استجمعت شجاعتي شوية وبدأت اسئله وهو يسئلني، وفي وسط الكلام كانت وجهات النظر بتبان، نختلف ونتفق، مناقشتنا كانت طويلة.
اتكلمنا في مواضيع  بس الي خدت بالي منه انو بيحترم الرأي الآخر طول ما الرأي  مخرجش بره حدود الدين و الادب، كمان لاحظت انو شخص سلس تقدر تاخد وتدي منه ودي كانت نقطة مهمة جدا تتحسبله لان النقاش هو الي بيبني بيت وهو الي بيهده.
&&&&&&&&&&&
جينا للنقطة الي كنت بحاول آجلها للنهاية، مكنتش عاوزة الحوار يخلص دلوقتي وانا عارفة إن سؤالي هتبقي إجابته مش عادية، مش هكدب بس الكلام معاه كان فعلا  ممتع.
&&&&&
ملك.. التعليم.
بصلي هو بهدوء وجاوب... ماله؟
يمكن طريقته وترتني اكتر بعد ما كنت هديت، يمكن لانه مؤدب معايا من البداية.
ملك... اقصد مستوى التعليم.
عمر... ما بينا؟
ملك... ايوة
عمر... ماله برضو؟
بصتله وانا مستغربه وبان علي وشي ده وكملت وقولت..... مش شايف إنه ممكن يكون مشكلة؟
عمر... ممكن طبعا، لو أنتِ شايفاه مشكلة.
ملك... تقصد أية؟
لقيته ساب  فنجان القهوة الي ماما كانت جابتهولنا بعد العصير مع الكيك وميل لقدام وسند دراعاته على رجليه وشبك صوابعه في بعض، وبصلي ب ابتسامه هادية بس ملامحة كانت جد اوي
عمر.... يعني التعليم زيه زي أي حاجة في الدنيا، رزق. وأنا رزقي كان  اني ابقي مدرس ، ودخلت كلية تربية  بإرداتي
كل واحد فينا رزقه في حاجة معينة، كمان الدبلوم  تعليم متوسط ده مش جهل  وكلنا لينا مكان معين وحاجة معينة ربنا خلقها،  ده غير اني معجب بطريقة تفكيرك وشايف انك مثقفة وده بان من نقاشنا وانا راضي بحياتي، انت بقي راضية؟
ملك... الحمدلله.
عمر... يبقي معتقدش ان في حاجة نختلف عليها، ممكن تخليكي ترفضيني.
الي اقصد أقوله عموما ، إننا مش متشابهين، مش هقولك متساوين لأن مش صح أننا نحط نفسنا في مقارنة مع الناس واحنا مش عايشين نفس الحياة بنفس الظروف، احنا مش زي بعض.
ملك... كنت ساندة  ب ايدي علي خدي وانا بسمعه، متوقعتش الرد ده ابدا ، مش جهل منه، أو قلة ثقة فيا، يمكن عشان اغلب الفئة دي تفكيرها متشابه، بس الاهم اني  شايفه اني قدام شخص حكيم، والاهم اني مكنتش متوقعة ان دي وجهه نظرة.
&&&&&&&&&&
&&&&&
عمر... ساكتة ليه؟
ملك... بسمعك.
عمر... اقتنعتِ؟
ملك... بصراحة؟
عمر... مفيش أحسن من الصراحة في أي علاقة، لازم كل حاجة تكون واضحة من الاول .
ملك... انا معجبة برأيك، وشايفاه حلو جدا، بس الكلام غير الفعل، كل حاجة في الدنيا محتاجة إثبات.
عمر... التجربة كفيلة تثبتلك.
ملك... التجربة فيها مغامرة بحياة كاملة، بقلب وبمشاعر وبعواطف وانا مش بحب اعيد غلطاتي  الاهم ان فيها جواز.
عمر... ابتسم وهو بيقولي اسبتشري خير، مين عارف ايه اللي هيحصل، بعدها عمرك ما هتلاقي شخصين زي بعض ممكن نفس الشكل، انما الطبع التفكير، المعتقدات  معتقدش .
ملك... يمكن
خلص كلامه ووقف، فوقفت بسرعة.
عمر... فرصة سعيدة يا أستاذة ملك.
ملك... فرصة سعيدة يا أستاذ عمر.
&&&&&
قيمت الموضوع من أكتر من جهه ووافقت نتخطب
والايام بتجري وانا المشاعر جوايا بتكبر
انجذاب، رغبة، اهتمام بالتفاصيل الصغيرة، الست الي جوايا كانت محتاجة الاهتمام ده، الطريقة دي في الكلام، الابتسامه لما نتقابل، يعرف اكتر عصير بحبه، فيلمي المفضل، يحترم خوفي من الضلمة، الي متأكدة منه أن كلنا محتاجين شخص حنين.
$$$$$$$$$
كنا في محل شاورما  ، والمكان كان زحمة، كنت واقفة مع محمود برة وهو بيشتري لينا الاكل عشان نقعد علي النيل نتغدي، لاقيت بنوتين صغيرين باين انهم علي قد حالهم، واحدة منهم جريت على الازاز ، بتشاور علي الاكل بفرحة،  كان اختها في ايدها ٢٠ جنيه واضح اوي ان مفيش غيرها،  وكان باين اوي انها كبيرة بالنسبالهم
ف دخلت  الكبيرة تشوف، معرفش ايه الي حصل بس انا شوفت الراجل بيزعقلها جامد، وشوفت عمر وهو بيزعقله اكتر، وشوفته وهو بيدي الاكل الي طلبه للبنت بعد ما كان واقف في طابور طويل وانو لو حاول يطلب تاني هيرجع يقف في الاخر  بس  هو حتي مترددش يعمل كده، شوفت البنت وهي بتحضنه جامد،  وهي بتديله وردة حمرا حلوة شبهها الموقف مر في ثواني.
ثواني بسيطة كانت كفيلة تبين قدامي الرحمة والإنسانية، في الاغلب هو مش متخيل اني شايفاه
لكن انا عشان متابعه البنت فقربت اشوفها، او جايز ربنا خلاني اقرب واشوفه.
يومها حسيت انو كبر اوي في نظري
&&&&&&
جالنا بعد مدة وكان شكله مفرهد ومحرج شوية
عمر....أنا اسف يا جماعة والله بس
محمود وقاطعه.... اسف علي ايه ده راجل عايز يتشد انا  حاليا متأكد اني اختارت صح ل اختي
ابتسم عمر وبصله.... طب هناكل ايه
ملك... ممكن ناكل كشري
محمود.... والله فكرة جميلة
عمر... هو اكلتي المفضله لكن مش هناكلها في أول خروجة لينا يعني
ملك.... لا عادي مفيش مشكلة
&&&&&&&
طب ما أنا عارفة انو اكلتك المفضلة، ايوه انا بقالي ٣ أيام قاعدة علي الفيس بتاعك بتفرج عليه بوست بوست وكومنت كومنت وتفاعل تفاعل، مثلا لاحظت ان محمود وامجد اقرب صحاب ليك، عرفت ان اكلتك المفضلة الكشري، وانك بتحب كتب علم النفس وخصوصا كتاب جلسات نفسية، عرفت انك بتحب علم الفلك، بتحب أهلك جدا ومرتبط بيهم، وانك بتحب الحيوانات.
اهتمام، مشاعر متلغبطة، اعجاب، جايز كلها حاجات حاسة بيها لكن الي متأكدة منه انك الراجل الوحيد الي حرك فيا حاجة ، هي ايه معرفش لكنك حركتها
&&&&&&&&&&
كنا بنتناقش في مواضيع مختلفة دايما عشان نشوف وجهات نظر بعض ونخلق لغة حوار بينا وأرض مشتركة نتلاقي فيها
&&&&&&&&
ملك... نتكلم بقي في حقوق الزوجة
عمر... والزوج ؟! ده حتي غلبان
درايت ابتسامتي وبصيت الناحية التانية
عمر... شوفتها يا قاسية، ايه بقي حقوق الزوجة دي
ملك... حقوق الزوجة والزوج
سكت فابتسمت وبصيتله مستغرب؟
عمر.... شوية أصل ايه جاب سيرتها او فكرك بيها
ملك... ايه خايف  دي مجرد مناقشة
عمر... هخاف من ايه أي إنسان ليه حقوق وواجبات وأي علاقة صحية سليمة لازم يبقي فيها تبادل مشترك بنفس القدر والطاقة والكمية عشان محدش في الطرفين يحس انو بيتعب اكتر او مهدور حقه
ابتسمت  وبصتله دايما قادر يخليني مبهورة كأني أول اقابله.
ملك....  لو في يوم كنت تعبانة ومش قادرة اطبخ هتعمل ايه
عمر... هطبخ انا عادي الحياة مشاركة  انت بتشيليني وانا بشيلك
ملك... مبدأ الضرب للتقويم
عمر... مرفوض طبعا أي راجل يمد ايده علي ست يبقي راجل ضعيف لو مش عارف تتفاهم معاها طلقها
ملك... بس خلينا متفقين اني مش هقبل اي ضرب من اي نوع تماما يعني لو ده حصل كل الي بينا انتهي
عمر... مفهوم طبعا
انت اكيد عارفة ان الخروج من البيت من غير اذن مرفوض
ملك... مفهوم طبعا، اولا حرام،. ثانيا ده عدم احترام ولازم يبقي علاقتنا قايمة علي الثقة والاحترام والمودة والرحمة والحب
عمر.... ليه مقولتيش الحب الاول
ملك.... عشان الحب مش كفيل يفتح بيت  لكن المود والرحمة ، الثقة والاحترام  بيخلقوا الحب
ملك... طبعا انا ليا مصروف شخصي بعيدا عن مصروف البيت، في حدود استطاعتك وامكانياتك اكيد.
عمر... ده اكيد طبعا، لو حصل بينا مشكلة المفروض ندخل اهلنا ولا لا
ملك.. بص الخصوصية احسن حاجة في الاول والاخر احنا الي هنتجوز احنا هنتصافي ونننسي لكن اهلنا هيشيلوا من الطرف التاني،  فطول ما المشكلة بسيطة مش محتاجين ندخل حد بينا، لكن لو الموضوع كبير ممكن نتفق علي طرف معين نكلمه وقتها.
عمر... ده نفس رأيي بالاضافة اني لو غلطان عاتبيني وانا هعتذر ونفس الشئ من طرفي
ملك... مش هتتكسف تعتذر ؟
عمر... مفيش انسان سوي بيتكسف يعتذر، راجل او ست.
ملك... حلو أوي كدة خلصنا نقطة الحقوق
عمر.... اتمني اكون جبت امتياز
ملك.... مرتفع كمان
&&&&&&&&&&&&
دايما التجارب بتسيب ندبات واثار جوانا، اثار مش سهلة تتمحي، بتخلينا دايما حذرين في تعاملنا، بنكون في دوامة ما بين خوف، توتر، قلق، خوف من المستقبل والمجهول وبكره، فكان لازم  اطمن علي نفسي.
&&&&&&&&&&&
الفرح بيقرب، قربنا من بعض اكتر، التحفظ قل، والود بقي بيبان بدون مناسبة، والفرحة مش مجرد فرحة  ده احساس اعمق بكتير احساس بالكمال، احساس اني لاقيت نفسي، اني اطمنت، اني ارتاحت أن مش هيبقي في تعب او شقي او وحدة تاني
العلاقة بتاخد شكل اوضح، هو بارد وانا عصبية هو مستفز وانا مطقش،  احنا مثلا؟ بنحب بعض.
&&&&&&
كان زي ما اتخيلته يوم مليان بفرحة كل الي بحبهم، كان نفس حلمي بيتحقق، واختارت بوكيه جوري احمر، كان نفس فرحة اهلي وصحابي بيا
بس كان الاهم  فرحته هو بيا، لما حطيت ايدي في ايده بعد عناء وصبر وتعب وخناق وضحك وصور كتير وعيوب ومميزات وأرض مشتركة اتخلقت بينا، فرحته بيا كانت احلي حاجة في اليوم.
بصيتله وانا بحط ايدي علي ايده وقولت.... هي كدة الحكاية خلصت؟
ضحك وبصلي....  الحكاية لسه هتبدء.
&&&&&&&&
اتمني تعجبكم
بقلمي أنا سنيوريتا الروايات أروى العش 🧚‍♀️🧚‍♀️