حكاوى اروى

مظاهر خداعة

دبلوم يا ماما! دبلوم!
- وفيها أية؟  بنت عمك وأنت أولى بالورث من أي حد، بعدها حلوة وزي القمر، وأخلاقها تشهد بيها الناس كلها.
سامر..... أخلاقها فوق راسي، بس التعليم، التعليم مهم، أنت عايزة الناس تضحك عليا، أنا المهندس سامر اتجوز واحدة معاها دبلوم .
أمينة.... هيفرق معاك في أية التعليم،  هي الست هتعمل ايه غير انها هتخلف وتربي وتهتم ببيتها.
سامر.... يا أمي بالله عليكِ افهميني، ليه اتجوز واحدة احس معاها بأن بينا بلاد واننا مش فاهمين بعض ولا تفكيرنا واحد ، هتربي ولادي ازاي وتخليهم حاجة كبيرة أفتخر بيهم قدام الناس
أمينة.... وانا مخلتكش حاجة كبيرة ابوك يفتخر بيها قدام الناس
سامر... أنت بتقارني مين بمين يا أمي انت دخلتي الجامعة اينعم مكملتيش عشان تربينا بس انت متعلمة
امينة... ما البت متعلمة حد قالك انها مبتعرفش تفك الخط
سامر... ليه احس إنها بعيده عني في التفكير ؟ مش بقول إنها وحشة ولا قليلة، بس مش مناسبة ليا أنا.
امينة.... اخر الكلام يا سامر يا هتتجوزها يا لا انت ابني ولا اعرفك وابوك الي هيتصرف معاك
&&&&&&
اتخطبنا وأنا مبحبهاش وعمري ما حاولت أحبها طول فترة الخطوبة كنت بحاول أكون بارد علي قد ما اقدر
وكنت بحاول احسسها انها اقل مني ١٠٠ مرة
&&&&&
سامر كنت عازمها في مطعم علي الغدا واخوها كان معانا
اخوها  يبقي ظابط اسمه محمود
احنا عيلتنا بتعلم الرجالة بس
الستات مش محتاجين التعليم في حاجة من وجهه نظرهم بس الحمدلله احنا ولدين ٢ بس  ل ابويا وامي
ده غير ان اغلبنا اتجوز  من بعض، محمود متجوز بنت عمتنا آيه والي تبقي ممرضة عمتي صممت تعلم بناتها
وده حقيقي انا بحبه فيها
علا.. اخت آيه وتبقي مدرسة.... أنا هطلب ليكم علي ذوقي
ملك خطيبة سامر... شكرا يا علا أنا هطلب لنفسي
علا... يا بنتي وانت هتعرفي تقرئي المنيو ده انجليزي
آيه... عيب كده يا علا
ملك...  وانت مش مكسوفة من نفسك وانت مش عارفة ان اللغة التانية عندنا انجليزي
سامر... وبصلها ب استغراب وبعدها بص ل علا بشوية غيظ
محمود...  اتكلمي مع اختي كويس يا علا  مش عاجبك الدبلوم انت مكنتيش هتتعلمي اصلا لولا وقفه بابا مع عمتي 
وبعدها بص لسامر بشوية قرف وسخرية... انا ماشي يالا يا ملك يالا يا ايه
وخد محمود مراته واخته ومشي من المكان وهو مضايق ومتعصب
&&&&&&
فضلت ارازيها شوية و علا ترازيها شوية
ومن ضمن المواقف الي عمري ما توقعتها من علا 
انها تعمل حركة غبية  قدام الكل
&&&&&&
في البلكونة
محمود : انا مش مصدق الي عملتيه مع علا بنت عمتي حركة  ذكية منك
ملك... ماهي مستلماني هي وسامر وده خلاني شكيت فيهم، اصلها لو مفيش بينهم حاجة، هتبقي محموقاله ليه، هي كانت بتحاول تستظرف وتقول ان لو هي الي هتتجوزه كانوا هيبقوا احلى وانجح
محمود.. .. انا مصدقتش اما ماما حكتلي بس مكنتيش غيرانة
ملك... لا طبعا غيرت بس انا مش المفروض ابين غيرتي والا هتعرف انها نجحت في انها توقع بينا، وكده كده انا حاساه مغصوب عليا قولت ابوظها.
محمود.... شكيتي فيه عشان كده قررتي تبوظيها
ملك... للاسف ايوة  هو شايفني اقل، وتصرفاته مريبة خصوصا معاها، وشايف انو بيتجبي عليا، مع انو عارف ان التعليم ده رزق وانو زي ما خد رزقه في التعليم انا هاخد رزقي في حاجة تانية
محمود ... اوعي تكوني فكرتي ان كلامها صح
ملك....لا فكرت لانو في الاغلب صح يا محمود واحتمال يتخطبوا  
بعدها هي كانت فاكرة ان الشغل ده هياكل معايا انا بقي قولتلها ان ده نصيب وان لو ربنا كاتبهم لبعض هيتجوزوا ودخلت ماما وعمتي ومراه عمي  في الحوار وشهدتهم عليها وان لو كان نصيبهم يتجوزوا هيتجوزوا ودي مش أول مرة عشان كده  خدت معاها رد فعل قوي 
محمود... برافو عليكي أنا فخور بيكي
بس  كانت ايه لزمتها تفسخي الخطوبة
ملك...جبته قدام ابويا وابوه وقولتله الي حصل  وهو قالي بنت عمتك وبتهزر عمره ما حاول يدافع عني شايفني قليله روحت فاسخة الخطوبة وقولتله الكلمتين
محمود... وهو محاولش يوقفك
ملك... لا تقريبا ما صدق
محمود... تفتكري هي هتفكر تعملها
ملك...  اه افتكر جدا
محمود.... ولا تزعلي والله ما يستاهلك ولا كنت موافق علي الجوازه اصلا
بكرة ربنا هيعوضك وهتشوفي
ملك... ونعم بالله أكيد يا حبيبي
&&&&&&&
في اليوم ده  هي فسخت الخطوبة وحصلت خناقة كبيرة بين ابوها وعمتي وابويا
وابويا غلطني واعتذرتلها  والموضوع خلص
طبعا ابويا وامي كانوا مغلطني في الاول  بس هي عمرها ما كانت مناسبة ليا من وجهه نظري أنا
ما اصل انا كنت بحب علا بس امي وعمتي مش بيتفقوا اوى، كمان ورث بنات عمتي قليل بالنسبه لورث ملك
انا مش فارق معايا موضوع الورث قد ما فارق معايا اتجوز الي انا بحبها،  ومش بعد ما وعدتها هي وعمتي بالجواز هطلع عيل معاهم
أنا اتجوزت بعد مدة علا فعلا  وهي كمان اتجوزت دكتور قبل انا وعلا ما نتجوز وسافرت مع جوزها لمحافظة تانية
&&&&&&
ملك... يا ماما انا مش عايزة اتجوز
سلوي.. يا بنتي عمر ده شخص محترم جدا واخوك بيشكر فيه جدا ،  ومريح اقعدي معاه وجربي يا بنتي مش هتخسري حاجة
ملك... يعني انا لسه فاسخة خطوبتي مكملتش شهر ونص، والمفروض اتخطب دلوقتي
سلوي... محدش واقفلك بالفستان والقاعة جربي وبعدها احكمي يا ملك
انت مش نفسك تكوني عروسة؟
فكري يا بنتي احنا مش عايزين غير مصلحتك وسابتني ماما وخرجت
&&&&&&
ملك.... عروسة؟!
أكيد عاوزة أكون عروسة، يعني أنا.. أنا زي كل البنات والله.
قبل ما أنام بليل بتخيل نفسي عروسة، بشوف فرحي وفستاني والفرحة الي هتكون ملياني ، وعياط ماما وحضنها ليا، بشوف بابا وهو ماسك دراعي، واسمعه وهو بيوصي جوزي عليا، بشوف  ضحكة محمود  وهو بيرقص معايا بعد ما خدني من عريسي غصب.
بشوفه وهو بيضحكلي وضحكته مليانة فرحة  بيا،
بشوف فرحة اخواتي وصحابي بيا وتجهيزاتهم معايا،  بشوف بوكية الورد الي هختاره وردة وردة يبقي جوري احمر ولا لافندر ولا اختاره توليب. بشوف شخص فرحان بيا، قلبه اختارني زي ما قلبي اختاره، بشوف ابتسامته ليا، انتصار في عنيه انو عرف يكسب الحياة ونكون نصيب بعض، شدة ايده علي ايدي وبابا بيوصيه بيا، بوسه راسي وعنين كلها أمان وبتطمن أني اختارت صح.
بشوف بيت واسع دافي على قدنا، وعيال صغيرة قاعدة قدامه بيحفظهم قران علي ما اخلص انا العشا،  والي يسمع صح يختار فيلم الاسبوع
،  بشوف قاعدة رايقة في البلكونة متأخر وكوبايه الشاي حاضنه ايدينا، وراسي علي كتفه وهو بيحكيلي يومه، وانا وبحكيله و بشتكيله من فرهدة العيال، فيبوس راسي بوسة كلها حنية، ويقولي انت قدها، بشوف يوم الجمعة وإذاعة القرآن شغالة في بيتنا وانا بحضر الغدا علي ماهو يصلي ويرجع وبنتي   قاعدة بتحاول تتعلم مني زي ما انا كنت بعمل مع امي، بشوف مناقشة بينا علي ازاي نربي ولادنا، بشوف كتب بيشتريها نقراها في الموضوع ده و ندور علي ناس متخصصة ناخد برايها ونتابعها عشان نربي امانتنا صح.
وكمان بتخيل اني سعيدة وراضية بحياتي، ومش ندمانه أبدًا ولا راجعة اقول لنفسي كان لازم تفكري، أنتِ اتسرعتي.
&&&&&&&
وللحكاية بقية
أتمنى الجزء الأول يعجبكم
بقلمي أنا سنيوريتا الروايات أروى العش 🧚‍♀️🧚‍♀️