الصياد فريسة

2

من أشهر مقولات غسان كنفاني:

"إن قصتنا لا تُكتب،وسأحتقر نفسي لو حاولت ذات يوم إن أفعل"

المقولة دي بتمثلني جداً..

وبتجسّد حالتي..

لأنو قصتنا م بتتكتب ولا بتتحكي..

لكين برضو انا مُصر انكم تعرفوها..

عشان تعرفو انو م دايما الصياد هو البتصاد..

في صياد بقع فريسة وبتم إتصاديتو..

واسوء إتصايد ممكن يتعرض ليه الصياد هو انو تصادتو فريستو الهو إتصادها زاتا..

(انتو فامهيني؟!)..

انا فادي صلاح..

مُلقب بي كابو (د زمن الجامعة طبعا هسي كبرنا خلاص)

مواليد 98..

شغال مدير عام في معرض بتاع عربات مُشتركين فيه انا وصحبي..

متزوج طبعا..

الولد الثاني والاخير لي امي وابوي(الله يرحمو)..

اخوي الكبير اسمو فؤاد..

م بقدر اوصف ليكم شكلي لأنو دي إختصاص بنات..

بس البقدر اقولو اني جذاب وإلى حد ما ممكن اكون كسار..

طبعا د حسب كلام الحوليني علي..

شخصيتي كعبة شديد..

عصبي وعنيد ومستفز و نرجسي (كل الصفات دي قلّت حاليا)..

المهم م ح اتكلم ليكم عن نفسي كتير اقرو القصة وح تعرفوني كويس..

قصتنا انا وريانة بتبدا في مُنتصف 2019..

وبداية مرحلتي الجامعية..

في جامعة السودان..

كلية مصارف وبنوك..

بتذكر اننا نزلنا جامعة شهر 6..

‏كانت الدنيا بداية خريف..

‏اول اسبوع في الجامعة طبعا دكيتو..

‏لأني م برلوم فرحان ح انزل من اول يوم..

‏اول يوم في الاسبوع الثاني كان واقع في نفس يوم سنوية الوالد الله يرحمو..

‏كانت سنويتو الرابعة..

‏صحيت من الصباح ولقيت امي بتجهز في حاجات السنوية الحتوديها لي المسجد..

‏وكان ظاهر عليها الحزن..

‏شوفتها حزينة مسخت علي يومي وخلتني مُدبرس ورابط وش باقي اليوم كلو..

‏اول يوم ف الجامعة كان اقل من عادي..

‏حتى بتذكر رجعتا من 2..

‏تاني يوم وتالت يوم كان نفس الشي..

‏شوية شوية بديت اعمل اصحاب..