الصياد فريسة

8

تاني يوم مشيت الجامعة عادي..

كنتا شايل هم ح الاقيها كيف..

لكين هديت نفسي في العربية ونزلتا..

دخلتا الجامعة وانا لاوي خشمي بزهج..

مشيت علي قاعتنا..

اصلا المحاضرة بادية..

دقيت الباب وخشيت بعد الدكتور اذن لي اخش..

حسيت بي رعشة لمن هوا التكيف ضربني..

مشيت بتوتر علي البنش القاعدة فيه مها لأنها الوحيدة وقعت فيها عيني من اصحابي..

قعدتا وختيت يديني الاتنين في رُكبي..

عاينتا لي مها..

لقيتها مُبتسمة وبتعاين لي..

عاينتا للدكتور..

المحاضرة كلها كانت كيف كيف وم فهمتا ليها شي..

الدكتور لمن بشيل الاتندِس عرفتا انو ريانة م جات الليلة..

ختيت نفس بي راحة..

بعد الدكتور طلع سلمتا علي مها وعلي محمد ومنذر وكد..

حضرنا محاضرة تاني وبعدها طلعنا نفطر..

ورجعنا حضرنا آخر محاضرة..

اصلا هم تلاتة محاضرات بس..

بعداك مشينا عن ست الشاي البنقعد فيها دايما..

لمن قعدنا وكد لين جات لي محمد..

عاينت لي كد وقعدت..

من غير م تسلم علينا..

لكين شكلها لاقت ديل لأنو شوية كد ومها ومنذر بقو يتنوسو معاها عادي..

معناها انا بس الم سلمت عليه..

د الكان ناقصني والله..

انا من دخلتا الجامعة قلبي بضرب..

ولمن شفتا صحبتها اوترتا زيادة..

وطبعا ردة فعل لين بتوضح انو ريانة حكت ليهم..

آه..

قلتها ب صوت عالي وانا بفتح في تلفوني وبوصل في السماعة..

بعداك لين قالت طالعة ومحمد مشا يقدمها..

ومنذر كان اصلا قام من بدري..

مها قالت لي:كابونا

قلتا ليها:مهاوي سبب البلاوي..خبرك يخ؟؟

مها:كويسة انا..انت خبرك شنو؟!

قلتا:كويس..زي ما شايفة

عاينت لي مساااافة:عملتا شنو في موضوع ريانة؟!

عاينتا ليها:مفروض اعمل شنو؟!

مها:هو في شنو اساسا..نحنا م فاهمين اي شي