الصياد فريسة

10

كنتا جايط ومُكبكب لحدي ما مشيت ليها..

دقيت ليها وريتا اني قدام بيتهم..

وقالت لي اخش وح القى رفا منتظراني جنب الباب..

دخلتا وفعلا لقيت رفا منتظراني..

سلمتا عليها وكد وخشيت وراها..

عاينتا للبيت حوليني..

كان واسع و واضح فيه العز..

ودتني جنينتهم الورا..

شفتها من بعيد..

قاعدة في الكرسي المتحرك بتاع المرضى داك..

رجلها الشمال معمول فيها الجبس..

لابسة تيشيريت كوبي فاتح كد..

وشاكاهو بي بنطلون ابيض بتاع قماش..

وشعرها ضفيرة واحدة..

وبتتكلم بي التلفون..

وقفتا قدامها..

بقت تعاين لي وتتكلم..

من كلامها عرفتا انو دي امها..

خلصت وقفلت..

عاينت لي..

رفعتا ليها حواجبي:الحجة مالا زعلانة؟!

ابتسمت:م كانت عارفة بي الحادث واول ما عرفت اصرت اني اجيها

قعدت في الكرسي:وانتو ليه م وريتوها؟!

قالت:يعني..قلتا بعد اطلع من المستشفى اوريها

هزيت راسي وم قلتا شي..

قالت:م نفسي اسافر ي فادي يخي

قلتا:قولي ليها طيب..اساسا امتحانات الفانيل فضل ليه اقلا من شهر

قالت:قلتا ليها والله..وريتها د كلو لكين هي خايفة علي شديد ومصرة اني امشي

م قلتا شي..

العبرة خنقتنا:م ح تطمن الا تشوفي قدامها

بلعتا ريقي:طيب م تتضايقي انتي

قالت:م اتضايق كيف؟! وانا ح ابعد عنك وح اجمد الجامعة واموري ح تجوط

مسكتها يدها:ليه محسساني انو دي اول مرة تسافري؟!

عاينت في عيوني وقالت:لأنو المرة دي ماشة غصبا عني زايد نحنا يداب رجعنا لبعض

ابتسمتا:ويعني؟!..ح نتواصل ي بت م ح ننقطع

نزلت راسها وم قالت شي..

مسحتها دموعها:ي بت استهدي بالله..كلها فترة قصيرة وح ترجعي لي ولجامعتك

م قالت شي..

قلتا ليها:حبيبي..عايني لي

عاينت لي..

سألتها:مالك انتي متنشنة كد المرة دي؟!

قالت:م بعرف ي فادي يخ..يعني هسي انا لحدي ما اسافر الامتحانات ح تكون بدت بعدها ح تجي اجازة وح اقعد فترة الاجازة كلها..د لو اصلا نزلتا معاكم السمستر الجديد..يمكن اجمد وم انزل الا مع الورانا..وقتها ح تكونو اتخرجتو و اي زول شاف حياتو وانا واقفة في محلي