الصياد فريسة

4

تاني يوم لمن صحيت وزبطتا اموري وفتحتا تلفوني..

لقيت محمد مرسل لي ريكورد..

فتحتو:ي ماااان قريت السناريو انت؟؟..يخ سناريووو جاي ظط معاك عديل وبعدين فيهو تحاديق كد زابطة عديل..

وضحك..

ابتسمتا لضحكتو ورسلتا ليهو

"تحاديق شنو؟!🙂"

لكين م خاشي..

طلعتا من دردشتو وفتحتا السناريو..

بديت اقرا فيهو سرعة سرعة..

نظرا لأنو م عندي اخلاق ليهو اصلا..

مريت فيهو بسرعة وفهمتا حنكو..

احداثو كانت في القرن ال19..

عبارة عن بت غنية وبتحب الراعي بتاعهم ولمن اهلا بعرفو بحاولو يزوجوها لكين هي والراعي بهربو ويعيشو حياتهم..

وبعد اكتر من 10 سنة اخواها بلقاهم وبقتلهم الاتنين..

لويت خشمي..

سناريو عادي شديد..

هه عادي؟!.. هسي لو قال ليك اكتب نصو م بتكتبو..

اليومين الجاين عدو سرييع..

وجا اليوم الح نبدا فيه بروفات..

لاقيت محمد في الطريق ومشينا سوا لي بيت ناس منذر..

وصلنا قريب الساعة 9..

لاقتنا مها سلمت علينا وضيفتنا هي وبت عمتها..

بيت ناس منذر كان فاضي..

اساسا ناس بيتهم في البلد وهو قاعد مع اختو هنا..

واختو و راجلها قاسمين ليهم نص البيت البغادي..

يعني الجزو البجاي د قاعد فيه براه..

شوية كد وجا هو..

سلمنا عليهو وانا قلتا ليه:والله بيتك د فيه جخنون زابط عديل

ضحك:اصلا طبيعي مجخنن فيهو

محمد ضربو:البياكل براه بتخنق

مها:بطلو قلة ادبكم دي يخي

ضحكنا وم قلنا شي..

شوية كد وريانة جات..

انا كنتا بتكلم مع محمد لمن مها جات من برا وهي وراها..

كانت لابسة فستان رمادي مع الجسم شوية كد لحدي نص الساق..

وفوقو جكت قماش ابيض يدينو كُبار رابطاهو في نص بطنها..

شعرها مضفراهو حمامتين ولابسة حلق مربع كبير لونو ابيض..

واسبورت ابيض..

وطبعا طبعا عاملة في جفنها التحت كُحل ابيض..