ﺧﯾوط القدࢪ

الفصل الثاني

﴿ إِنَّ اللَّهَ وَمَلَائِكَتَهُ يُصَلُّونَ عَلَى النَّبِيِّ ۚ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا ﴾

في صباح اليوم التالي في شقة صديق نادر
استيقظ نادر و وجد نفسه على الفراش في إحدى الغرف و بجانبه فتاة يعرفها نهض و دخل الى الحمام كان يقف تحت الماء و يتذكر احداث ليلة امس لقد عاد لذلك الطريق مرة اخرى انهى حمامه ثم خرج كانت الفتاة استيقظت .
هايدي : صباح الخير يا حبيبي .
رد نادر و هو يكمل ارتداء ملابسه : صباح النور .
هايدي : هتمشي بدري كدا ؟ مش تستنى نفطر سوا .
ارتدى ساعة يده و هو يقول : مرة تانية يا هايدي .
هايدي : شكلك كدا هتختفي تاني و محدش هيعرف يوصلك .
اقترب نادر منها و قبل خدها و هو يقول بصوت منخفض : مش هيحصل و هنتقابل كتير .
ابتسمت له ثم خرج من الغرفة و الشقة كلها نزل و ركب سيارته و هو يفكر في شئ سوف يفعله مهما كانت النتيجة .

®®®®®®®®®®®®®®®®

في إحدى البنايات الفاخمة في شقة رياض العمري
كان يحضر الفطور لأولاده استيقظ يوسف وذهب له وهو يقول : صباح الفل على اجدع لواء في الداخلية .
رد رياض دون النظر له و قال : لا .
يوسف : هو انت عرفت انا هطلب ايه اصلا ؟!
رياض : اه عايزني اسافر معاكوا الغردقة و انا عندي شغل كتير ومش فاضي .
يوسف : يا حج دا هو اسبوع تعالى بقا ارتاحلك شوية واهو بالمرة نشوفلك مزة حلوة .
شعر باحدهم يضربه خلف رقبته و قال ادهم : قولتلك نقي الفاظك بعد كدا ايه مزة دي .
يوسف : سيبك من الفاظي واقنع ابوك يجي معانا .
أدهم : ما تحاول تيجي معانا يا بابا حتى لو يوم واحد .
تنهد رياض ثم قال : خلاص هاشوف .
تفاجئ رياض بيوسف يقفز فوقه و يقبل رأسه و هو يقول : حبيب قلبي هاخدلك غيارين معايا . ثم تركهم و ذهب يحضر الحقائب .
نظر في اثره رياض وهو موسع لعينيه و يقول : نفسي اعرف دا اتقبل في شرطة ازاي !
رد أدهم و هو يبتسم : البركة فيك يا سيادة اللواء .
وضع رياض الافطار وهو يقول : غلطة عمري اني دخلته شرطة لا اني خلفته اصلاً.

®®®®®®®®®®®®®®®®
في منزل نور
كان البيت يعم بالصوت المرتفع حيث كانت نور تتشاجر مع آسر فهو رافض لفكرة سفرهم .
نور : بقولك ايه انا كبيرة مش عيلة صغيرة و هنسافر انت مالك بقا بتتدخل ليه !
آسر : مش هتسافروا منغير راجل معاكوا و انا و ابوكي و عمو عبد الله مشغولين اصبري لما حد فينا يبقى عنده وقت .
نور : لا و بعدين بابا و ماما وافقوا و طنط أسماء هتيجي معانا .
آسر : اه يعني انتي جاية تعرفيني مش اكتر كأني مليش لازمة طيب تمام سافري يا نور واعملي اللي انتي عايزاه .
قال ذلك ثم نزل الى عمله في عيادة ابيه جلست أمل بجانب نور وهي تقول : مكنش ينفع تعاملي اخوكي بالشكل دا انتي عارفة انه خايف عليكي .
نور : ما هو اللي عصبني رافض و خلاص و المبرر بتاعه مش مقنع قولنالكوا ان طنط أسماء هتكون معانا علشان تتطمنوا وهو مفيش فايدة .
أمل : بردو مكنش ينفع تكلميه بالشكل دا لما يرجع من الشغل تصالحيه علطول قبل ما تسافري .
اومأت لها نور ونهضت حتى تحضر حقيبتها اخذتها و ذهبت الى ديما دقت الباب و فتحت لها فاطمة وهي تقول : يعني كان لازم السفرية دي طب ما كنتوا تستنوا لحد ما حد فينا يجي معاكوا .
ضمتها نور وهي تقول : متقلقيش يا خالتو دا هما عشر ايام هنقعدهم هناك ونيجي علطول مش هنلحق نطول .
دقائق وجاءت ديما و معها حقيبتها و جاء عبد الله حتى يودعهم ضم ديما و هو يقول : حبيبة بابا انتي هتوحشيني اوي خدي بالك من نفسك .
ديما : وانت اكتر يا بابا والله متقلقش عليا هكون كويسة .
رن هاتف نور باسم نادين اذا هي تنتظرهم امام البناية فقالت : يلا يا ديما ناادين بترن عليا يبقى بقوا تحت .
نزلوا الفتاتان و رأت نور آسر يقف عند نادين و يتحدثوا فذهبت لهم و ضمت شقيقها و هي تقول : متزعلش مني مش عايزة اسافر وانت زعلان مني .
ضمها له اكثر هو لا يشعر بالراحة من ناحية هذا السفر و لكنه سوف يسعدها حاوط وجهها بكفيه و هو يقول لها : خدي بالك من نفسك وبلاش تهور علشان عارفك كويس و لو حصل اي حاجة كلميني هتلاقيني عندك علطول .
نور : حاضر .
نظر آسر لديما و قال : عارفك انتي العاقلة اللي فيهم اي حاجة تحصل كلميني .
اخرجت نادين رأسها من نافذة السيارة وهي تقول : قصدك ايه بالعاقلة اللي فيهم دي اننا مجانين يعني !
قال آسر و هو يدخل البناية : اه .
ركبوا الفتيات السيارة و ذهبت بهم أسماء الى المطار .