Andekhi Jhalak

Ek Ajeeb Si Mohabbat

Ek ajeeb sa pyar hai tumse, Kabhi tum itni pasand aane lagti ho jiski koi hadd nahi, Aur agle hi waqt aisa lagne lagta hai jaise kuch nahi.

Main kayi raat tumhe bina yaad kiye soya hoon, Aur kuch raat mujhe neend hi nahi aayi, Kabhi tumhare na hone se poora sheher sannata lagta hai, Aur kabhi main akela hota hoon, phir bhi chubhti hi nahi tanhaayi.

Mere pyar ka graph upar neeche kood raha hai, Kabhi tumhare naam se khush ho jaata hoon, Kabhi farq hi nahi padta.

Aaj tum pe pyar aayega toh kavita likh doonga, Kal uth ke padhoonga toh lagega kyun hi likha tha, Samajh nahi aa raha tumhe maangun khuda se ya rehne do abhi,

Kabhi lagta hai ki pyar hai, kabhi shaq rehta hai ki hai bhi ya nahi.

Kyunki hamesha tumhari yaad nahi aati, Main har dum pagal nahi rehta tumhare liye, Kabhi toh tumhare late reply pe gussa aata hai, Kabhi dhyaan hi nahi rehta ki maine message bheja tha kuch batane ke liye.

Maine suna hai pyar mein dard hota hai kaafı, Par mujhe toh tumse pyar hi kabhi kabhi hota hai, Mujhe nahi pata isko pyar hi kahenge ya kya, Par jab hota hai tab alag hi hadd ka hota hai.

Jaise main jalne lagta hoon tumhe kisi aur ke saath dekh lu toh, Din mein 100 baar tumhari profile ke chakkar maar leta hoon main toh.

Koi gaana sunta hoon toh apne aap ko tumhare saath imagine karta hoon, Tab mujhe yakeen hone lata hai ki haan main tumse pyar karta

hoon, Par phir ek din tum mere khwaab mein nahi aati, Mujhe nahi bura lagta jab tumse baat nahi ho paati.

Yeh kya ho raha hai kyun ho raha hai, Mujhe samajh nahi aa raha tum door nahi ho mujhse aur mere paas bhi nahi aati.

Ek ajeeb si mohabbat hai tumse, Ajeeb sa pyar hai yeh, ki tum saath raho toh bhi theek,

Aur na raho toh bhi farq nahi padta, Tumhe sirf dil mein rakha hai iss liye main shaant hoon, Tumhe sar pe chadha leta toh shayad main hi majnu hota, Aur mujhe khud ko khona nahi hai, khona nahi hai.