بنت الحارة🤍

part8

يونس: شوفت مش قولتلك طلع العواطف المكبوته دى بتجيب من الاخر  مش تقولى بثبتلها حبى بالافعال بس الكلام له وقته بردك
محمد: ماشى يا خبره بس اليوم طلع جامد حتى امى لسة جيبالى خبر دلوقتي
يونس: عساه خيرا اخبرنى يا صديقي
محمد: هههههه ابدا يا سيدى نور جايلها عريس
يونس بصدمه:اية؟؟؟!!!!
محمد باستغراب: اية يا ابنى مالك
يونس بتوتر: ها لا لا ابدا مفيش اصلى استغربت عشان هى لسة صغيرة يعنى وبتدرس
محمد: فعلا هى صغيرة وبعدين هو أنا هوافق على طول كده هسأل الاول واعرف عنه كل حاجه وطبعا انت معايا فى كل ده
يونس بكسرة: طبعا يا حبيبي عن اذنك
محمد وقفه: مالك يا يونس وشك اتغير كده ليه
يونس: مفيش حاجه عايز ابقى لوحدى أنا ماشي
وقبل ما يفتح باب المكتب
محمد: يونس انت بتحب نور
يونس حس أن اتكب عليه جردل مية: لا لا ازاى دى زى اختى
محمد: هتكدب عليا برده
يونس: مش عايز اخسرك يا محمد أنا ماليش غيرك من كتر حبى ليك ولعيلتك حبيت نور صدقنى مش بايدى عارف انك هتزعل منى صدقنى حاولت والله اكتر من مرة انى ابعد وأبطل تفكير مقدرتش صعب قلبى كان يوجعنى اوى واقول دى بتقولك يا ابيه هتحبنى ازاى أنا آسف يا صاحبي حقك عليا
محمد: ولما روحت ليها الكلية كان خوف ولا غيرة
يونس بصدمة: هى حكيتلك
محمد: اة حكتلى أنا معودها على كده وبينى وبينك غيرت بس اطمنت انك خايف عليها زى بس كنت بقول انك بتعمل كده عشان شايفها زى اختك على العموم أنا مش زعلان منك إحنا اكتر من اخوات يلا
يونس حضنه: ربنا يخليك ليا يا صاحبي
محمد: بس هو أنت متأكد انها بتحبك
يونس: للاسف معرفش أنا بتمنى ده اكيد بس عمرى ما هجبرها على ده حتى لو مختارتنيش هفضل اتمنالها كل خير وعمرها ما هتكون سبب انى اخسرك فى يوم
محمد: ربنا يقدم اللى فيه الخير
فى بيت محمد
اسماء بتنظف البيت كله ونور كانت لسة داخلة من الباب
نور: اية يا سمسمه هو بكرا العيد ولا اية
اسماء: هو احنا مبننضفش غير فى العيد بس المفروض الشقة تبقى كده على طول وبدل ما تتريقى روحى هاتى الشرشوبة لمعى الأرض ولا أنا مخلفاكى بنت بالاسم بس
نور: شكرا على الموشح اليومى للسيدة مرات ابويا اسماء بس خمسة جد كده انا عايزة اعرف فى اية
اسماء: فى عريس جاي بالليل
نور بغباء: ليا
اسماء: لا ليا أنا
نور: بجد يا سمسم
اسماء: عوض عليا عوض الصابرين يا رب ليكى يا آخرة صبرى
نور: بس أنا مش موافقة
اسماء: انتى لسة شوفتية ولا قعدتى معاة اقعدى معاه وابقى قررى بعدها
نور: ماما يا حبيبتي أنا لسة بدرى اوى انى اتجوز أنا لسة بدرس وعندى جامعة وبعدين أنا مش مؤهلة انى اشيل مسؤلية دلوقتي ارجوكى سيبينى على راحتى
اسماء: ماشى يا نور بس على الاقل اقعدى مع الناس لما يجوا متكسفيش اخوكى ادامهم
نور: حاضر يا ماما
اسماء بفزع: يالهوى البامية على النار
نور: هههههه
ودخلت نور اوضتها عشان تغير
نور: والله وبقيتي عروسة يا بت يا نور وبتشوف تليفونها بيرن
نور: حبيبي كنت لسة هكلمك
دهب: يلا يا واطية من لقى احبابة نسى أصحابه ها
نور: احباب مين يا بنتى أنا مش موافق اصلا
دهب: لية يا وجه البرص انتى
نور: يا ستى فكك جواز اية وبلا اية أنا عايزة اعيش ملكة متوجه فى بيت اهلى اسيبه اللى باكل وبشرب وبنام فى ببلاش واتجوز واحد يقولى فطرينى وغدينى وحميني وليفينى وفليني يا ستى أنا بدهن رجلى فولتارين بعد ما اروح من الجامعة
دهب: يخربيتك هموت ههههههههههه مش قادره
نور: المهم هتيجي امتى
دهب: بعمل حبه حلويات اهو وجايالك
نور: تمام يا حبيبي يلا باى
دهب: باى
بالليل فى بيت محمد بعد العشاء
اسماء: وبعدين يا ابنى دى الساعه داخلة على ٩ ومحدش جه انت متأكد أنه جاى
محمد: والله مش عارف يا ماما
دهب: معلش يا ماما الغايب حجته معاه
نور فى سرها: يا رب يكون حنطور دخل في وقع فى الترعة يجيله بلهارسيا
فايزة: معلش يا ام محمد دلوقتي يجيي
والساعة قربت على ١١ بالليل
اسماء: لا دى عالم معندهاش زوق كانوا حتى اتصلوا على الأقل أنهم مش جايين
نور: خلاص يا ماما حصل خير
دهب: معلش يا ماما متزعليش لعله خير
محمد: تعالو نفضى السهرة سوا بقا بما إن عريس الغفلة مش باين له حس
نور: ولا تزعل نفسك يا أبيه اهو على الأقل هناكل الجاتو كله
دهب: همك على بطنك دايما يا حلوفه
نور: ليه كده طاااه
فايزة: ههههههههههه يخربيت فقركم انتو الاتنين معلش يا ابنى أنا لازم اروح عشان السهر غلط عليا واخد علاجى وارتاح يلا يا دهب تصبحى على خير يا ام محمد تصبحوا على خير
الجميع: وانتوا من اهلوا
كله دخل بيته ينام
اسماء: يا عينى على بختك يا بنتى
نور: يا ستى أنا مش فدماغى حاجة ومش مضايقة بالعكس ده انا مستفيده والله البت دهب بتعمل بسبوسة ليها العجب حاجة اخر الاجة والله موووزز يا بختك يا سى محمد
اسماء: تصدقى فعلا عندك غورى يا بنت الجزمة من وشي
عند دهب
أدت فايزة الدواء وغطتها ودخلت اوضتها لقت مسج على الواتس اب من محمد ( حبيبتي أنا فى البلكونه اطلعى عايز اتكلم معاكى شويه) طلعت بعدها على طول
دهب: مالك يا حبيبي فى ايه
محمد: مخنوق شوية مش عارف مالى
دهب: لية بس كل ده عشان عريس نور مجاش متخدهاش على نفسك اوى كده بكرا ربنا يبعتلها نصيبها
محمد: ونعم بالله يا حبيبتي بس مش ده اللى شاغلنى
دهب: اومال ايه
محمد: يونس
دهب: يونس صاحبك ماله؟؟!
محمد: يونس بيحب نور
دهب بدهشة: بجد
محمد: ايوة النهاردة قالى كده
دهب: طب بذمتك ده خبر يخليك بالشكل ده انت المفروض تفرح
محمد: مش عارف لية حاسس أنه له علاقة بالموضوع وخصوصا أنه وعدنى أنه هيجي واتحجج بالشغل
دهب: لا تسئ الظن مش يمكن يكون فعلا عنده شغل ومعرفش ثم انت بتقول بيحب نور مفيش حد يقدر يشوف حد بيحبه بيتخطب أو بيتجوز غيره أو حتى قلبه ميال لغيره وخصوصا لو هو بيحبه اوى تخيل مثلا لو كان يونس والعريس جم ونور وافقت عارف إحساسه كان هيبقى ايه هيبقى عامل زى الطفل اللى اتخطف من حضن أمه أو زى اللى الشوكلاته ضاعت منه بعد ما نجح فى الامتحان كسرة القلب مش بالساهل يا حبيبي تيجى كده نبدل الأدوار أنا مكان نور وانت مكان يونس وجه حد يتقدملى وانت بتحبنى وانا وافقت على الشخص ده
محمد بغضب وغيرة: كنت نسفته عشان فكر فيكي بس
دهب بابتسامة: شوفت رده فعلك يبقى تحطه فى نفس الموقف وتحس بيه وبوجعه لو شاف حاجة زى كده هو انت قولتله ايه بعد ده
وبعد ما حكالها عن موقف الجامعه
دهب: طب وده مش دليل أنه فعلا بيحبها وبيخاف عليها زيك بالظبط انت عارف انت حسيت بايه حسيت بالغيرة غيرة أن دى بنتى مش اختى اتربت على أيدى وفحضنى أنا امانها وضهرها وسندها ولما تميل بيها الدنيا أنا اللى هشيلها وهساعدها تقوم من تانى ازاى هى تشوف راجل تانى غيرى فى حياتها عارف فيلم عريس من جهه امنيه عادل إمام مشكلته مع بنته أنه مكنش عايز يخليها تشوف راجل غيره وكان كل عريس يجيلها يطلع فيه القطط الفاطسة عشان يفضل هو بس الهيرو فى نظرها سيبه يتكلم معاها ويشوفها ولو ليهم نصيب مستحيل اى حاجه تبعد ما بينهم
محمد: ياااة يا دهب انتى ازاى كده ازاى فهمانى وبتفهمينى من غير ما اتكلم تصدقى بالله
دهب: لا اله الا الله
محمد: ورب الكعبة أنا لو قعدت عمرى كله اصلى واشكر ربنا أنه ادانى جوهره زيك مش هيكفى ربنا يديمك فى حياتى يا اغلى من حياتي كلها بحبك
دهب بخجل: احمم.  تصبح على خير
محمد: وانتى  من اهلى يا حبيبتي ♥️

By youmna mohamed ♥️♥️
وللحديث بقية 💕