مسلمة وأفتخر

البارت الاول

معلومة قبل القراءة: الفصول كانت متلخبطة وعدلت اللي ينفع تعديله فهتلاقوا الفصول اللي فيها الصور او كلام خارج الرواية مش مترتبة. 🥀🌹🌹🍄
ـــــــــــــــــــــــــــــــــــــــــــــــــــــــــ
أنا تسبيح عندي ١٩سنة طالبة في كلية هندسة قسم هندسة مدنية طبعا الكل كان مستغرب إن أنا أدخل القسم ده لأني مدللة العائلة آه أصل أنا الصغيرة وكمان بنت على ولدين ختمت القرءان وأنا في أولي ابتدائي بسبب مامتي وبابايا واصرار أخويا الوسطاني أنس اللي ديما بيقف جمبي و يدعمني ومنساش دوره ساعة مقولت إني هدخل هندسة مدنية اللي الجميع رفض رفض قاطع وبعد قليل من الدلع والمحن والدلال وطبعا الزن علي بابا وافق بوعد إن أخلي بالي من نفسي بس ده مينكرش إن كريم أخويا الكبير حنين وبيعاملني بحذر علي إني قزاز ممكن يتكسر كبرت على الدلع والحب والخوف اللي محوطني بيه أخواتي وبابا وماما ولبست الخمار عن اقتناع بعد فترة السنكحة الإعدادية وأول سنتين في الثانوية ده ميمنعش إن كنت بلتزم حدودي في الفترة دي حياتي كانت هادية و جميله جدا جدا بين أسرتي لحد اليوم اللي اتشقلبت فيه حياتي ١٨٠°درجة اليوم ده لقيت بابا جاي من الشغل بدري ودخل عليا القوضة وقالي باستعجال :

"تسبيح قومي لمي هدومك بسرعه علشان تسافري" .

طبعا بصتله باستغراب بابا اللي كان بيرفض إني أبات عند جدتي اللي ساكنة في البيت اللي قصادنا بيقولي قومي عشان تسافري اتنفضت من مكاني وقلتله:

"أسافر فين يا بابا وليه وبعدين حضرتك ناسي إن أنا ورايا جامعة".

فرد عليا وقالي:

"هتسافري الصعيد وأنا نقلت ورق الجامعة بتاعتك للجامعة هناك ".

قلتله:

"طب ليه مانا هنا كويسة وأنتو ليه تنقلوا شغلكوا ودراستكوا ".

بصلي وقالي والدموع في عنيه:

"تسبيح أنتي بس اللي هتنقلي".

بصتله بصدمة والدموع بدأت تتجمع في عيني وقولتله :

  "ليه يابابا أنا عملت حاجه تزعلك مني".

قالي وهو بيحضني:

"عمري مازعل من روحي بس أنا مضطر".

قلتله بترجي:

"طب متقولي ليه ده أنت عمرك مخبيت عليا حاجة".

اتنهد وقالي:

"أنا اتحطيت في مصيبة كبيرة ولازم ابعدك عشان متتأزيش".

شورتله بعيوني يكمل فقال:

"أنا كان عندي صفقة الأسبوع اللي فات أو بالأصح مناقصة ورسيت علي الشركة بتاعتنا وصاحب الشركة المنافسة اتعصب وفضل يزعق جامد ويقولي هتندم يا أحمد وهحسرك علي أغلي حاجة عندك استغربت وسيبته ومشيت وبعدها بيومين اتبعتلي صور ليكي ولأخواتك ومعاهم رسالة بيهددني فيها إن لو مسبتش الصفقة ليه هيقتلكوا أنا هبعتلك أخواتك بعد فترة بس لازم أنتي تختفي الوقتي".