انت البداية في كل شي ومسك الخِتام.

البارت التاسع عشر

بعد مرور وقت
طلع من غرفته وهو يسحب شماغه وطلع وهو يتوجه لغرفة نايف ودخل عليه : عطني مفتاحك
نايف وهو معقد حواجبه : وين رايح بذا الوقت ؟
نياف بحدة : هات المفتاح خلصني
عطاه نايف واخذه وهو يطلع ركب سيارته شاف بكت دخان سحبه وهو يطلع الولاعة من جيبه وشغل السجاره
حرك وهو يرمي شماغه بجنبه وزاد من سرعته وشغل اغانيه وهو يرفع لاخر صوت لجل ما يفكر بشي بدا يتخطى السيارات باقصى سرعه ويتجاوز الاشارات ونقاط التفتيش
تنهد وهو يصرخ وضرب الدركسون بعصبيه وضرب المسجل حط رجله على الفرامل وهو يوقف بجنب الخط رجع على المرتبه وهو يمسك راسه بتعب انتبه على اتصال جواله وكان رقمها رد عليها وهو يتنهد
وجد بخوف :نياف شفييك ؟
نياف بتعب :تعبان
وفتح باب السيارة وهو ينزل وكمل وهو يحس انه يحتاج يتكلم ويقول كلشي مثقل عليه : قربت منها وجد انا الي كنت اعصب عليك لا قربتي مني شبر انا الي كنت حتى امي ما اخليها تقرب مني انا الي كنت اكره قرب بنات ادم كلهم قربت منها اليوم سمحت لنفس المسها فوق كرهي لها وحقدي عليها لمستها توقعت اني بخليها تندم لانها تبلت علي صار العكس وانا الي ندمت اني لمستها كرهتها اكثر وكرهت نفسي
وصرخ وهو يتنهد : مابيهاا مابي قربها مابي وجودها لا ابوي فاهمني ولا امي حاسه فيني والكل واقف بصفها وشايفيني مغتصب بنظرهم

عز *

رد على ابوه وبالصريح :محد له ريال بالورث
وناظر ام ملاك :الي سمعتيه يا عمه ثقيل وصعب بس ياليت تتفهمين وتفهمين بنتك ان رفضها مو واقف عليها واني بعد مغصوب عليها عشان وصيه عمي واني طلبتها لما كنت بالمستشفى عشان انفذ الوصية
وطلع وهو يركب شاصه ورجع للبر
-
قاموا البنات وهم يدورون على ملاك
دخلوا غرفه نجلاء وشافوها على جوالها
مرام : ملاك
ملاك : ها
مرام : ترا كلنا زيك مصدومين بس الصدق عز عمره ما كذب ولو تسالينا كلنا بنقولك مصدقينه اخونا واحنا نعرف اكثر منك وبعدين عز مستحيل يكذب بامور الزواج
اسماء: وقال بعد ما طلعتي انه حتى هو مجبور عليك وبيتزوجك عشان وصيه ابوك
قربت منها نجلاء :مو تحبين ابوك ؟ مو تبينه يرتاح بقبره ؟ مو انتي تدعين له وتتصدقين عنه مراح تفيده بشي دامه مو مرتاح بقبره نفذي وصيته واقبلي بعز عشان ابوك ولا تفكرين باحد انتي تحبين ابوك اكثر من اي شي ثاني اسعي لراحته قبل راحتك
تنهدت ملاك وهي تناظرهم : انا مابيه مابي اخوكم صدق معقد وكريه ولا ابلعه وما وقفت عليه بس كل عيال اعمامي واعمامي اكرههم كلهم ولو تزوجته بيقعد ينشب لي على كل شي محب احب احد يتحكم فيني ما احب احد يكون له سلطه علي وبعدين انا مو جاهزة للزواج
مرام : لاااا صدقيني عز مو كذا لو قلتي سيف كان كلنا ايدنا كلامك بس صدقيني عز اقصى طلباته حليب نياق والله ما يحب احد يسوي له شغله او يطلب من احد شي غير شي يحتاجه وضروري ومو معقد
ملاك : اكرررههه اكره اخوك
اسماء بمزح : صدقينيي بعد كلامك الي قلتيه بالمجلس لو حطك بوسط نياقه لشهر قليل فيك
ملاك : يخسي وبعدين عنده نياق ويحب البر وشذا ؟!!
ضحكوا وهم يناظرونها : تعودنا وبتتعودين
مرام : بعدين ما تبينا نكون اخوات زوجك ؟
ملاك : يع اذا تبون اتزوجه عندي شروط وبقولها لاخوكم اذا وافق تزوجته
نجلاء : الله يستر منك انتي وشروط
مرام : بتودينا بداهيه
اسماء: بدق على عز يالله سمعينا شروطك

"صلوا على محمد"

بغرفة نياف *
دخلت دورات المياة وهي تنزل ملابسها ودخلت بوسط الموية ونزلت دموعها وانتشرت شهقاتها سحبت كل ماعينها شافته وتكبه على جسدها وتضرب نفسها بقرف وصرخت وهي تقعد بوسط الموية وتحضن نفسها وبداخلها تدعي على نياف
بعد ساعات وبدون ما تحس بالوقت طلعت من دورات المياة وهي تلبس روبها الحرير الذهبي وتوجهت لغرفة لينا
دخلت وهي تناظر لينا الي تسوي ويفي لشعرها ومجهزة عباية تخرجها تقدمت سُلاف وهي تسحب اللحاف ودخلت بسرير لينا بكل صمت
لينا : سُلاف شفيك ؟
سُلاف لا رد
تقدمت لينا لعندها وهي تسحب اللحاف : بنت شفيك؟
وليه نايمه بدون ما تلبسين ملابسك؟ بعدين يالله تجهزي ما بقى شي على التخرج
طلعت سُلاف شقهاتها : اتركيني ابي انام
لينا وهي تقعد بجنبها بخوف : التبن سوا لك شي صح ؟ قولي وش مسوي والله لاعلم ابوي يربيه
سُلاف : تعلمين عمي انه قرب مني ؟
ناظرتها لينا بصمت وبدون استيعاب : استني الكلب لمسك مرتين ؟
سُلاف سحبت اللحاف وهي تعطيها ظهرها
لينا بتفكير : بس حتى لو علمت ابوي بيقول من حقه حيوان صدق الله ياخذه اكرهه وهو اخوي كيف لو وهو زوجك
حضنت سُلاف : على الاقل قومي البسي ملابسك لا تنامين بالمنشفه بتمرضين
ماردت سُلاف وتنهدت لينا وهي تسحب جوالها وترسل لصحباتها انهم ما راح يحضرون وربطت شعرها وغيرت التكييف للحار وطلعت وهي تترك سُلاف تنام وبداخلها تدعي على اخوانها دخلت المطبخ وهي تسوي لها قهوة
-
قفل من وجد بعد ما سمع عتابها له وتنهد وحرك للبيت
وصل ونزل وهو يدخل شاف لينا طالعه من المطبخ ووقفت وهي تخزه بحقد وتوجهت للصاله
تجاهل نظراتها وحط شماغه على كتفه وطلع لغرفته
-
بغرفة نجلاء*

قعدوا البنات بجنب ملاك واتصلت اسماء على عز ووصلها صوته المستعجل : تبين شي ضروري ؟
اسماء : ايه
مرام : اسمع ملاك وافقت على الزواج بس عندها شروط
تنهد عز : رايح لسوق الغنم ومستعجل اذا رجعت نشوف شروطها
اسماء : يا غبي تأجل زواجك عشان غنم
عز : نفعتني اكثر منك وتراها ملاك
وقفل بعد ما سمع صوتها : وشفيها ملااك؟
مرام بفضول : يخي قولي لنا وبعدين قولي له
ملاك : لا جاء صحوني ابي انام
ضربتها اسماء وقاموا وتركوها تنام
-
بالليل
رجع من سوق الغنم ودخل يتروش وطلع وهو يجفف شعره
ورفع عيونه من ركضوا مرام واسماء لعنده : يالله امش نبي نعرف شروطها
عز : تبطي عظم ما نفذتها بعد كلامها
اسماء : الحين امش انت بعدين قرر
تنهد ومشى مع خواته ودخل المجلس وهم ينتظرون ملاك
دخلت بكوب حليب وقعدت على الكنب وهي تشرب ببرود
مرام : اخلصيي
ملاك : ثلاثه شروط وافقت انت بوافق انا
عز : غردي
ملاك وهي تشرب من الحليب وتوقف وترجع تشرب مره ثانيه : الاول املاك ابوي كلها تتسجل باسمي
ناظرته وهي تنتظره يعارض او يقول شي وتنهدت وهي تكمل : الثاني زواجنا يكون لمدة شهر وبعدها كل واحد بطريقه
الثالث والاخير يكون زواجنا بس كلام يعني ما تتدخل فيني ولا اتدخل فيك ولا اشوفك ولا تشوفني يعني بالمختصر مالك سلطه علي بزواجنا او بعد زواجنا
ناظرها بهدوء : الشرط الاول املاك ابوك صارت املاكي ولا بتاخذني منها ريال بالنسبه للشرط الثاني لو كان زواجنا على ورق ذاك الوقت اقدر انفذ شرطك بس زواجنا بيكون مختوم بشهود وشيوخ وهذا ما يسمح لي اخليه على ورق والشرط الثالث بتزوجك وبرجع للبر يعني ارتاحي مراح اشوفك ولا تشوفين
وقام وهو يناظرها : وافقتي احسن لك ولابوك المرحوم ما وافقتي صدقيني محد خسران غيرك

نتوقف هنا