أرواح تسكن مشارق الشمس لا تحجبها سحائب اليأس،"سعوديه" للكاتبة/ شمس ورى الغيم

13

الجزء الثالث عشر

السبت

جده
الساعة الـ 09:00 صباحا

اليوم أول يوم في الاختبارات النهاية للعام الدراسي من الفجر و هي صاحية مع فهد و منال الي راحت تأخذ شهادتها من المدرسة مع أم نواف لكن السبب الحقيقي الي مخلي هند ما تقدر تنام إنها بتطلع بعد نص ساعة مع أبوها بسرها كانت تضحك على سخرية القدر هي طالعه مع أبوها يعني ما هو شخص غريب عليها و رايحه تعمل فحص قبل الزواج يعني حلم كل بنت بالدنيا لكن في غير وضعها صحيح بتطلع مع أبوها لكنها من سبع سنوات ما طلعت معه صحيح بتتزوج لكنها ما تدري وش مصيرها و مع من ؟
أم محمد\ أنتي متاكده انك موافقة يمه ؟
هند بغصة\ افى يا جدتي أنتي متبين تشوفين هنودتك عروسه ؟
أم محمد\ والله انه يوم السعد عندي يا يمه الي أشوفك فبيتك و عندك عيالك لكن أبيه برضاك ما هو غصب عنك
هند\ و من قال لك اني ما اني راضيه ؟
أم محمد\ عيونك فاضحتك يا بنيتي
هند\ ههههههههه و بعيوني ذي بجيب رأس العريس أنتي لا تشيلين همي و ادعيلي بس إن يكون وجهه علينا خير يمكن على يدينه يجينا الفرج
أم محمد\ الله كريم يا يمه ما ينسى عباده....

*******************

الخبر

الساعة الـ 10:00 صباحا

طالع الملف الي بيده و نزل النظارة و هو يبتسم بفخر إن عنده بالقسم مهندس مثل سعود ..
المدير\ ما شاء الله عليك شغلك تمام
سعود\ تلميذك طال عمرك
المدير\ صراحة يا سعود أنت من أفضل المهندسين عندنا بشركة و الكل يشهد على كذا بس لو تسمع مني و تقدم على بعثه و تكمل دراستك في الخارج صدقني بيكون لك مستقبل هنا
سعود\ والله ذا الموضوع في بالي أنا و المهندس يوسف من تخرجنا لكن الوقت الحالي عندنا ارتباطات عائلية بنخلصها بأذن الله و نكمل دراستنا
المدير\ و أنا مستعد بالي اقدر عليه لكم يوسف معدل تخرجه ممتاز جدا و حرام يوقف على الماجستير بس و أنت مبدع و تقدر تنجز و معدلك تمام
سعود\ تسلم طال عمرك ما تقصر نحن ما نستغني عنك راح يجي اليوم نسافر و ندرس و نجيب الشهادة العليا بأذن الله
المدير\ بأذن الله موفقين يأرب
سعود و هو يوقف\ يأرب تأمر شي طال عمرك
المدير\ تسلم يا سعود

طلع سعود من عند المدير بعد ما تطمئن على الشغل الي قضاء فيه أصعب وقته بدون يوسف لكنه حصل في حمد و عبد المحسن نعم الإخوان ( سعود تعود من توظف ما يطلع عمل ميداني إلا مع يوسف و هذي أول مره له يروح بدونه بينما يوسف سبق و انه راح مرتين عمل بدون سعود ) فكر يمر بطريقة على مكتب سيف و علي من أسبوع ما شافهم و لا سمع أخبارهم \ السلام عليكم
علي\ و عليكم السلام هلا والله
سعود و هو يسلم عليه\ حياك الله شخبارك يا القاطع لا سؤال و لا اتصال ؟
علي\ هههههه و لا سلام من بعيد والله أنت أمس واصل قلت أخليك تنام و ترتاح و بعدين أدق عليك يا المعرس
سعود و هو يكشر من ذكرى العرس\ ما في وأنا أخوك لا عرس و لا غيره
علي\ افى ليش ؟
سعود\ ما صار نصيب والله
علي\ الله يكتب لك الي فيه الخير إلا تعال اجلس قلي شخبارك و كيف كان شغلك ؟
سعود\ الحمد لله بخير و الشغل خلصناه خلاص
علي\ زين والله
سعود\ إلا وين سيف ما اداوم اليوم ؟
علي\ إلا مداوم لكن راح يشوف يوسف يقول عندهم شغل
سعود\ كنت بسلم عليه لكن مدامه عند يوسف أكيد ماراح يجي سوالفه ما تخلص و أنا و راي شغل بخلصه
يوسف من عند الباب و كان واقف مع سيف\ و أنا حتى هنا ما اسلم من لسانك
طنشه سعود و راح يسلم على سيف\ شخبارك يالمعرس خلاص ذليتنا على الخطبة و ما صار نصيب و رجعت أنت المعرس فينا
سيف\ ههههه الله يعوضك بأحسن منها لا تذكرني بالعرس خلاص بقى أسبوعين بس والله ما عندي وقت أحط راسي ساعة إلا طلعوا لي بشغله و يا سيف روح و جيب و ودي
علي\ هههههههههههههههه حتى ثياب العرس أمس توي مفصله
سيف\ عاد ذليتنا بكم ثوب و ياليت عاد أنت الي بتدفع حقهم
يوسف\ قسم بالله محد يدفعها غيري و البشت كمان
علي\ وأنا واعدك بحجز يومين الفندق علي لين تسافر
سعود\ و السيارة أجارها و زينتها علي
سيف\ ما تقصرون والله نخدمكم بالأفراح.........

******************

جده
الساعة الـ 12:00 ظهرا

دخلت هند البيت بعد ما عملت الفحص مع أبوها و الي قال لها انه هو الي راح يأخذها و يخبرها النتيجة حاولت هند في أبوها ينزل يتغداء معهم أو على الأقل ينزل يسلم على أمه و يجبر بخاطر منوله و يبارك لها و الي أكيد ناجحة و فرحانة بالشهادة لكنه رفض و كان يقدم حجج واهية و مالها أصل أهم شي يبعد عنهم... سمعت صوت الباب و ركضت جهته من رجعت من المدرسة و هي فرحانة بشهادتها و أدور على هند من غرفة لغرفه عشان تخبرها أنها نجحت \ أنتي رجعتي ؟
نزلت هند بجسمها لمستواها و فتحت لها يدينها\ تعالي
منال و هي بحضن هند\ شوفي أنا نجحت و بروح صف اثنين
هند\ مبروك يا حبيبتي شاطرة منوله عقبال ما تصيرين دكتورة
منال\ أنتي وين رحتي أنا دورت عليك فكل مكان
هند كانت مشتريه دبدوب من محل الهدايا الي بالمستشفى هدية نجاح لمنال\ كنت مع بابا و اشترى هالدبدوب هدية نجاح لك
أخذتها منال بتردد ممزوج بين الفرح و الخوف\ ليه أنا طيب ليش هو ما اعطانيه بنفسه ؟
هند\ كان مستعجل بس بيجي مره ثانية
منال\ و أنتي وين رحتي معه ؟
هند و هي تمد لها يدها عشان تشوف مكان الإبرة \ اممم كنت تعبانه و بابا وداني عند الدكتور
منال\ وليش ما أعطاك دواء ؟
هند\ أعطاني إبرة بس و قالي تسيرين زينه بعدها
منال\ يعني أنتي هالحين ما يعورك شي ؟
هند\ إيه خلاص ما يعورني شي
منال\ بس الإبرة تعور مره ثانية قولي انك تبين شراب بس
هند\ هههههههههههه من عيوني.......

***************

جده
الساعة الـ 05:30مساء

خلاص معاد تقدر تستحمل هالبنات و سخطهم المستمر على سعود و موضوع زواجه الإنسان خلاص كره الزواج من كثر حنتهم فوق رأسه و هي بدت تحن عليه و تبي تريحه من ذا الموضوع صحيح تبي تشوف عياله لكنها تبيه برضاه وزواج يكون مرتاح فيه \ خلاص عاد سكرن ذا الموضوع و فكني صدعتن براسي
أم عزام\ يمه و لين متى نسكره يعني خلاص خطبنا له وحده و ما وافقت خلاص معاد ندور غيرها ؟
أم فارس\ هالحين بيقولون هو ما يبى إلا بنت خلف و يوم رفضته قال ما عاد يبي غيرها
أم سعود\ لا اله إلا الله ما هو كنكن انتن الي اخترتنها له و إلا هو وش درأه إن خلف عنده بنت
أم عزام\ اخترتها على بالي أنها بنت ناس و طلعت أعوذ بالله شكلها طالعه على أهل أبوها شايفين أنفسهم مدري على ايش ؟
أم سعود\ يا بنيتي اتركي الناس فحالهم ترى من تكلمتي فيه تكلم عليك
أم عزام\ قطيعة عاد بحسب لهم أو لكلامهم حساب
أم فارس\ صح كلام أمي الكلام في الناس من ورآهم ما يجوز
أم عزام\ خليك أنتي يا أم حلال و حرام في حالك هم بيتكلمون فيه ما هو فيك
أم فارس\ و أنتي اختي و الي يجي عليك يجي علي
أم عزام\ كان إلا كذا و ما تبين الكلام يجي عليك خلاص قولي انك ما أنتي اختي و ريحي راسك
أم سعود\ وش ذا الكلام تبرين من أختك وانتن قدامي
أم عزام\ يمه هي ما يعجبها شي من جهتي حتى لو أتنفس ودها تقول لي غلط و عيب
أم فارس\ هالحين أنا كذا بس استأهل عشاني أبي مصلحتك
نادت على شغالتها تجي تساعدها تروح غرفتها لكنها وقفت تقول لهم كلمتها الأخيرة\ شيلن يديكن من موضوع زواج أخوكن هذا ولدي و أنا الي راح أزوجه .....

*********************

يُرجى التصويت للبارت❤️