أرواح تسكن مشارق الشمس لا تحجبها سحائب اليأس،"سعوديه" للكاتبة/ شمس ورى الغيم

19

الجزء التاسع عشر

الخميس

الخبر
الساعة الـ 03:00 عصرا

جالس بالشقة و باله مشغول عليها من يومين ما سمع صوتها و أخر مكالمة كان صوتها متضايقة و تعبانه كل الي يقولون له أخواته إن ضغطها مرتفع شوي و نائمة لكنه ما هو قادر يصدقهم و إحساسه يقول أنهم مخبين عنه شي .. طلع من الحمام ( أكرمكم الله ) بعد ما اخذ له شاور من ثلاث أيام و هو يحس انه ما استمتع بالمويه زي اليوم يوسف\ فعلا المويه هنا حياة ثانيه
سعود\ المويه هي نفسها فكل مكان لكن قول هنا ما في شمس أصدقك
يوسف\ أي والله
سعود\ ما أنت رايح لأهلك ؟
يوسف\ المغرب بروح الحين بريح وشفيك أنت وجهك مقلوب كذا ؟
سعود\ من يومين ما كلمت الوالدة يقولون تعبانه
يوسف\ لا سلامتها عسى ماشر
سعود\ الضغط مرتفع عندها
يوسف\ عشان ما نزلت جده يعني؟
سعود\ ما أظن لأنه من قبل تعبت الظاهر زعلانه من شي و ما تبى تقولي
يوسف\ طيب سالت اهلك ؟
سعود\ يقولون ما فيه شي صاير
يوسف\ اجل احمد ربك و لا تشيل هم الضغط أحيان يرتفع من و لا شي بكرة و أنها راجعه بصحة و عافيه ........

******************

جده
الساعة الـ 05:30 عصرا

اشتاقت لكل شي مرت به الشوارع البيوت حتى السيارات و زحمتها من أسبوع ما طلعت و لا شافت نور الشمس اشتاقت لكل شي في الحارة مسجدها و الأطفال الي يجتمعون على لعب الكورة في قطعة الأرض المقابلة لبيتهم و اشتاقت أكثر للي داخل البيت محتاجه تحضنهم كلهم و كأنها من سنين ما شافتهم محتاجه تروح غرفتها و تتخلص من كل الحزن
الي بقلبها و تكمل إحساسها أنها لسى بنت ما جنت من الزواج إلا اسم متزوجة و بس ... وقف سلمان قدام بيت أبو نواف بدون ما يطفي السيارة\ متى تبين ارجع لك ؟
هند\ ما راح تنزل معي ؟
سلمان\ لا خليك براحتك مع اهلك
هند\ و اذا سألوني ليش ما نزلت ؟
سلمان\ قولي لهم أي شي عنده شغل مواعد احد أي كذبه
هند يعني عارف أنها كذبه\ إن شاء الله
سلمان بدون نفس\ ما جاوبتي متى ارجع لك ؟
هند\ بعد صلاة العشاء
سلمان\ اوكيه ....

****************

الخبر
الساعة الـ 06:10 مساء

وقف يستوعب الكلام الي سمعه من ولد أخته فارس معقول كل ذا يصير و هو ما عنده خبر سعود\ أش تقول أنت ؟
فارس\ يا خالي أتعوذ من الشيطان الحمد لله جدتي استقرت حالتها دحين
سعود\ وش استقرت ثلاث أيام و هي بغيبوبة و عندها جلطة و أنا أخر من يدري
فارس\ و تلات أيام و أنا معها في المستشفى ما تركتها
سعود\ و هالحين فكرت تقولي كان صبرت كمان ؟
فارس\ خالي اعرف انك معصب دحين بس والله ما قدرت أقولك لين اطمئن على حالتها و أطمئنك و هدا ما هو راي بس حتى أبوي قالي أسوي كداا
سعود هدى شوي فعلا فارس ماله ذنب يحط حرته فيه\ لا اله إلا الله طيب و الحين وش وضعها بالضبط و بدون ما تخبي علي شي
فارس\ أقولك نفس كلام الدكتور توي شفته دحين جدتي فاقت من الغيبوبة و تعدت مرحلة الخطر وتوي داخل عندها و شفتها و عرفتني لكن عشان أحطك بالصورة جدتي لسى ما
تتكلم و لا تتحرك
سعود خلاص ما عاد فيه يسمع أكثر\ زين سكر أنا جاي جده الحين
سكر سعود من فارس بدون ما يسمع رده و توجه لغرفته طلع شنطته الصغيرة و رمى فيها ملابسه بإهمال و بدون ترتيب يوسف كان يطالعه من أول و ما هو فاهم الموضوع كامل كل الي تأكد منه إن أم سعود جاتها جلطة يوسف\ قول لا اله إلا الله و هد شوي عشان تعرف أنت وش بتسوي
سعود\ لا اله إلا الله وش بسوي بنزل جده هالحين
يوسف\ صاحي أنت بتروح بالسيارة ألف و خمس مئة كيلو و أنت بذا الوضع مستحيل أخليك
سعود و هو يحط أغراضه في جيبه\ منتظر رأيك أنا ؟
يوسف\ لحظة سعود بتمشي كم ساعة و بتسرع و بتجيب لنفسك المشاكل اصبر خل ندور طيارة
سعود\ مستحيل تحصل طيارة الحين و لا بعد أسبوع حتى كلها محجوزة
يوسف و هو يطلع جواله\ اصبر خل أدق لعلي يشوف أخوه ناصر يمكن يقدر يدبر لنا حجز
سعود\ عجل طيب شوفه
اتصل يوسف على علي و مع ثاني رنه رد ...
علي\ هلا والله
يوسف\ هلابك أقول علي أخوك ناصر في الدوام الحين ؟
علي\ خير وش صاير تسال عنه صار له شي
يوسف\ لا بس أبيه يدبر لسعود حجز على جده الحين
علي\ وشفيه سعود ؟
يوسف\ الوالدة تعبت شوي و بيشوفها بعدين أقولك المهم الحين ناصر يقدر يدبر لنا حجز
علي\ ثواني بس أدق عليه و أرد لك خبر
يوسف\ لا تطول الله يخليك
سكر يوسف و التفت لسعود\ يقول بيدق لخوه و يرجع يخبرنا
سعود\ خلني أتوكل على الله و أروح بالسيارة أصلا بكون محتاجها هناك
يوسف\ ما عليه سعود طول بالك دقائق بس و اذا على السيارة أنا اشحنها لك لجده لا تشيل هم
سعود\ ما قصرت والله

ثواني من الانتظار

يوسف و هو يرفع جواله\ هذا علي
سعود\ رد بسرعة
يوسف\ هلا هاا بشر
علي\ دبر حجز بس بعد ساعتين الطيارة
يوسف\ المهم انه حصل
علي\ خلاص هو في المطار الحين بعطية رقمك و يدق عليك أنت بتوصل سعود المطار ؟
يوسف\ إيه أنا بوصله خلاص انتظر اتصاله يالله فمان الله
سعود\ فيه حجز ؟
يوسف\ إيه الطيارة بعد ساعتين قوم نمشي للمطار
سعود\ يالله
يوسف\ طمني عاد و السيارة على السبت تكون عندك بإذن الله
سعود\ إن شاء الله بس السبت قدم لي على إجازة تكفى
يوسف\ و لا يهمك .....

*******************

يُرجى التصويت للبارت❤️