أرواح تسكن مشارق الشمس لا تحجبها سحائب اليأس،"سعوديه" للكاتبة/ شمس ورى الغيم

15

الجزء الخامس عشر
الجمعة

الخبر
الساعة الـ 11:15 صباحا

طلع من الحمام ( أكرمكم الله ) بعد ما أخذ له شاور يستعد لصلاة الجمعة كان يحس بألم في صدره و نغزه بقلبه من أمس ما قدر ينام زين منها و ما هو عارف السبب كل شي تمام بحياته حتى صوت أمه سمعه قبل ساعة و كانت مبسوطة لبس ثوبه و اخذ شماغه و طلع يستعجل يوسف وقف على باب غرفته و نادى عليه\ يالله يا يوسف عجل
طلع يوسف و شماغه على كتفه\ يالله جاهز أنا
طلع سعود المفتاح من جيبه و مده على يوسف\ خذ سوق أنت
يوسف\ وش فيك وجهك تعبان ما نمت ؟
سعود و هو يحط يده على صدره من جهة القلب\ مدري أحس بضيق بصدري ما أني مرتاح حتى بالنوم
يوسف\ ليش فيه شي مضايقك ؟
سعود\ لا ما في شي
يوسف\ خلاص بعد الصلاة نروح المستشفى تكشف
سعود\ هههههههه ما يحتاج يمكن انخنقت من ريحة البخور أمس
يوسف\ طيب يعطونك شي يريحك و تنام مرتاح
سعود\ امش بس امش اذا القلب ما هو مرتاح ما تقدر تعالجه المستشفيات
وقف يوسف قدام سعود\ قول وش مضايقك تخبي علي ؟
سعود\ أحس من أمس إن في قطعة من قلبي مقطوعة ما أحس فيها
يوسف\ كلمت اهلك اليوم ؟
سعود\ إيه الصبح كلمت الوالدة ما عليهم خلاف
يوسف\ حمد لله اجل بلاك هنا و هو يأشر على قلبه
سعود\ لكنه فاضي ؟
يوسف\ ما هو شرط تدري بالي فيه سنين و أنا أحسه مثلك لين حصلت ساره و اكتشفت إنها هي الي كانت فيه من قبل اعرفها والحين أحس فيها قبل تتكلم اذا زعلانه و إلا تعبانه
سعود\ الله يسرها و أنا أخوك لين أحصلها ..

****************

جده
الساعة الـ 01:30 مساء

من أمس ما أكلت شي خلاص رأسها بينفجر و بدت تدوخ هو قالها عندك الثلاجة خذي الي تبيه لكنها تحس بشعور غريب كيف بتآكل من فلوس شخص ما يبيها .. اووف لازم أتعود أصلا كم ببقى يعني مأكل أنا زوجته و محسوبة عليه حتى لو ما يبيني طالعت بملابسها للمرة ألاف محتشمة خلاص بطلع ( كانت لابسة بينجابي هندي كم طويل بلون الأبيض و الأسود ) فتحت الباب بهدوء يمكن يكون نايم باب غرفته مسكر حمدت ربها و طلعت للمطبخ كل شي قدامها لكنها مجبورة تأكل بدون نفس من الوضع الي عايشته أخذت لها تفاحه تأكلها و هي تتأمل المطبخ مرتب و نظيف حتى الكوب الي الفجر كان مع سلمان مغسل و مرتب على جنب من المغسلة .. شكل هالانسان منظم و يحب الترتيب شي حلو والله سمعت صوت الباب يتسكر كانت بتطلع تشوف لكنه كان أسرع منها و دخل عليها المطبخ و في يده غداء بنفس ملامح وجهه أمس هادئ جدا \ السلام عليكم
يعني ما يدخل إلا و أنا أكل لو تأخر شوي بس \ وعليكم السلام
بكل هدوء و بدون أي كلام اخذ له صحن و ملعقة و فتح الكيس و حط له أكل وصب له كاس مويه و قبل يطلع\ الباقي لك بالعافية
هند\ شكرا
طلع و تركها في حيرتها يعني حتى على الأكل ماراح نجتمع فيه مع بعض اوكيه كذا أحس أنا من الأساس مغصوبة عليه خليه يعيش براحته و أنا براحتي أخذت الكيس و حطت لها أكل و جلسة بالمطبخ تأكل و حاولت تكون سريعة ما تبيه يشوفها دقائق و قامت وقفت على المغسلة تغسل صحنها و ملعقتها كانت تحسه واقف ورآها يتأملها لكنها سوت نفسها ما تدري عنه و كملت غسيلها
طولت هذي يا عني ما انتبهت لي وافق\ خلصتي ؟
سوت نفسها متفاجئه بوجوده و التفت بسرعة\ من متى أنت هنا ما انتبهت ؟
سلمان\ اذا خلصتي بعدي بغسل
انتبهت هند انه يأشر على الصحن الي بيده \ أعطني أنا اغسله
مده لها سلمان\ شكرا
هند\ العفو
سلمان\ راح يجون أهلي العصر خلك جاهزة و استقبليهم لأنهم بيرجعون ينبع المغرب
هند\ إن شاء الله
كان متردد ينطقها و باين عنده كلام \ فيه شي ثاني كمان
هند\ الي هو ؟
سلمان بتردد\ لا تقولي للوالدة شي
هند ما فهمت عليه\ شي مثل شو ؟
سلمان\ أي شي تسألك عنه قولي تمام و الحمد لله بس
هند بعد ما فهمت قصده\ ابشر ....