أرواح تسكن مشارق الشمس لا تحجبها سحائب اليأس،"سعوديه" للكاتبة/ شمس ورى الغيم

5

الجزء الخامس
الأحد
جده الساعة الـ 8:00 صباحا

يوم جديد و اشراقة جديد للأحلام بكل عنفوان الأمل و حب الغد و الكفاح بطموح للأفضل اليوم بنروح تشوف دوامها و حياتها الجديدة من اليوم كل شي بيتغير حتى نومها و صحوتها من اليوم بيكون لها دور اكبر في البيت و مصروفة راح تفرش لجدتها غرفتها مثل ما و عدتها و تشتري لمنال و فهد كل اللي يتمنونه و تجيب شغالة تساعد أمها بشكل يومي بشغل البيت حتى نواف ماراح تنساه بتحول له فلوس كل شهر كل هذا و هند ما فكرت بنفسها كل اللي تتمناه تسعد إلي حولها و تشوف بوجيهم البسمة كل هالاماني و هي ماتدري شو ينتظرها لكنها تتمناها وهذا حقها ما دام الأحلام ببلاش ......

نازلة مع الدرج و عبايتها و شنطتها بيدها لان أبو منذر له خمس دقائق واقف عند الباب و هي مرتبكة و متردده تنزل تتطمن على لبسها و أغراضها بالشنطة يمكن نست شي استعجلت خطواتها باتجاه الباب الخارجي و هي تشوف أمها و جدتها جالسات بالصالة
هند\ ادعولي
أم نواف\ الله يوفقك يا بنيتي انتبهي لحالك
هند\ ان شاء الله يمه يالله أشوفكم على خير
أم نواف\ هند يمه شلتي الجوال معك أكيد تحتاجيه
هند وهي و أصله عند الباب\ إي يمه أخذته معي
( هند ما عندها جوال خاص فيها هو جوال أمها من زمان وتستخدمه هي و فهد لما يطلعون مشوار )
في الطريق أبو منذر والي يعتبر هند و حده من بناته
أبو منذر\ هاه يا بنتي تبيني انتظرك عند الباب و إلا أروح كم مشوار و ارجع لك
هند و ببالها وانأ وش عرفني بطول أو لا\ والله مدري يا عمي اليوم ما راح أداوم عندهم بس اخلص أوراقي و من بكره أداوم لكن مدري كم اجلس لين اخلص أوراقي
أبو منذر\ اجل بروح لي مشوار قريب منك و لا خلصتي دقي علي
هند\ أن شاء الله عمي
نزلت هند وهي تطالع المبنى قدامها كانت عمارة من ثلاث ادوار و باين عليها جديدة لسى ما تهالكت من الزمن سمت بالله وطلعت الكم درجة عند الباب دخلت لكن ما عرفت وين تروح رفعت رأسها ممكن تشوف لوحة ترشدها لكن خاب ضنها انتبهت لباب مفتوح على يمينها و داخله مكتب قربت من الباب و دقت عليه دق خفيف لكن ما في رد رجعت دقت بقوة أكثر و برضوا ما في أي إجابة تقدمت بخطوتها و دخلت المكتب كان مكتب واسع شوي و في مكتبين و كأنه الاستقبال لكن المشكلة ما في احد هند بخاطرها الله ييسرها .
مرحبا اختي أي خدمة
التفتت لصوت البنت اللي ورآها و بخاطرها الحمد لله ما هو رجال \ هلا إيه انتم كلمتوني أمس بخصوص وظيفة مقدمة عليها
الموظفة \ هلا فيك تفضلي لحظه بس أعطي سكرتيرة المدير خبر بوصولك
هند\ شكرا
رفعت الموظفة سماعة التلفون تعطي الطرف الثاني خبر بوصول هند اللي كان كل تفكيرها كيف بتدخل عند المدير لوحدها بحياتها ما قابلت رجال بمكان بدون فهد أو نواف بسرها دعت ربها أن المدير يكون ما هو سعودي يمكن يخفف عليها شوي <<<<<ما هو كلهم رجال ؟
الموظفة\ تفضلي نهاية الممر في باب على يدك الشمال فيه مكتب السكرتيرة و المدير
وقفت هند \ مشكورة اختي
مشت مثل ما وصفت لها الموظفة و كل الأماني تمشي معها في طريقها و تزينه لها بالأمل و الفرج من رب العالمين شافت الباب المقصود وقفت و سحبت نفس عميق تهيئ نفسها للي جاي دقت الباب و ها المرة وصلها الرد بسرعة \ تفضل
دخلت بخطى بطيئة و هي تشوف السكرتيرة اللي كاشفة وجهها تبتسم لها تطمنة هند و تقدمت لها \ السلام عليكم
السكرتيرة\ و عليكم السلام هلا تفضلي
جلست هند و كان رجولها محتاجه ترتاح من الرجفة اللي بدت تسري فيها بمجرد ما حست أنها بتكون بعد لحظات جالسة مع رجال لوحدها \ شكرا
السكرتيرة\ أنتي هند صح ؟
هند\ إيه أنا
السكرتيرة\ الآن تدخلين على المدير ما شاء الله عليك معدل تخرجك ممتاز أكيد شغلك بيكون حلو معنى
هند\ بأذن الله
رفعت السكرتيرة سماعتها تطلب من المدير إذن لدخول هند اللي ما سمعت منها إلا حاضر و أن شاء الله \ تفضلي المدير ينتظرك
وقفت هند وسالت السكرتيرة ببراة \ وأنتي ما راح تدخلي معي ؟
السكرتيرة ببالها شكل هالبنت ما هي متعودة تخالط مجتمع رجالي \ ترى المدير إنسان ما يخوف وكبير بعمره شوي اعتبريه مثل أبوك
هند ببالها و هو وينه أبوي لكنها تطمئنت شوي مجرد ما سمعت انه كبير بعمره \ اوكيه مشكورة
باب المكتب مكان بعيد كلها خطوتين و هي عنده دقت الباب و وصلها صوت رجولي غليظ و مربك بالنسبة لهند اللي ما تعودت تسمع غير صوت أبوها و أخوانها وإذا مرة سمعت صوت أبو منذر سمت باسم الله في سرها و دارت مقبض الباب و دخلت المنظر قدامها كان شبه مريح رجال واضح من الوهلة الأولى انه شامي و الشيب مغطي شعر رأسه بالكامل
هند\ السلام عليكم
المدير\ وعليكم السلام تفضلي اجلسي
جلست هند و بخاطرها يارب ثبت على قلبي و يسرها لي \ شكرا
المدير والي كان يطالع هند بعيونه من فوق لتحت و كأنه يتفحصها من تحت الغطاء و العباية \ شوفي ياهند أنا اخترتك له الوظيفة ما بين عشرين متقدمة من شان درجاتك كتير منيحه و باين هلا انو أدامي بنت خلوقه و محترمة كتير
هند\ تسلم أن شاء الله أكون عند حسن ضنك
المدير\ اوكيه هلا أنتي عم بتعرفي طبيعة شغلك شو حاتكون عنا صح ؟
هند\ إيه تقريبا
المدير\ حلو كتير و قسم النساء بالدور التاني تقريبا عنا أربع مريضات كبار بالسن عندهن جلطة و مسببه ليهن شلل جزئي بتكوني مشرفة عليهن و تراعينهن وقت دوامك
هند\ أن شاء الله
المدير\ و في شغله تانيه بدي أخبرك فيها هلا أنتي راح تشتغلي معنا شهرين بدون ما نعمل معك عقد لبين ما نشوف شغلك منيح وإلا لا بس طبعا ايلك راتب 2800 ريال و 200 تأمين ما تخافي
هند\ زين أن شاء الله
المدير\ هلا فيك تروحي تتعرفي على مكان عملك و زميلاتك فيه و من بكرة تبدي تداومي هون من الساعة 8 إلى 4 لانا محتاجين موظفة هلا
هند\ أن شاء الله
المدير\ في عندك أي سؤال ؟
هند و هي توقف \ لا شكرا
المدير\ على العموم بابي مفتوح لئلك أي وقت ما تحملي هم كم هند عنا
الجملة الاخيرة ابد ما عجبتها توها تقول برتاح له\ شكرا اقدر أروح الآن
المدير\ إيه طبعا أتفضلي