ماكانت النية حب ياسعود

11

اخر يوم في الشاليه|11:00 صباحاً
ام سلطان: يالله فجر استعجلي لمي الاغراض الي بالمطبخ وشيلي كلشيء والشواحن والاستشوار والملابس لاتنسين شيء!
فجر: امي بشويش انا بسوي كل ذا يعني
محمد: هايي شتسوون؟
ام سلطان: قوم خذ الاغراض ذي وودها شنطة السياره واذا ماكفت حطها عند السواق
محمد:اوكي يمه
فجر: يمه شدعوه كل ذا انا اخذه يدي اوجعتني ترا
ام سلطان: بلا هرج ماله فايده وروحي ودي الاغراض مع اخوك ابرك
فجر بحلطمه: ان شاءلله يمه
'
'
في غرفة ميعاد&سلطان|
سلطان دخل بعد ماخذ شور وهو حاط المنشفه على راسه وشافها نايمه: ميعاد قومي بنمشي يلا
ميعاد:سلطان اتركني خلني انام
سلطان: يالله يابيبي قومي تجهزي بنمشي للبيت
ميعاد: يعني لو قلت بيبي بقوم مثلاً؟
سلطان: يس قومي يلا
ميعاد: يالله شوي اقوم
سلطان: لا مافي شوي الحين تقومين تنشطي وش هالكسل
ميعاد: تكفى عاد انت اخر شخص يتكلم عن الكسل
سلطان وهو يسحبها من الفراش بقوه: اوه انتِ تعاندين يعني؟
ميعاد: واذا كنت اعاند؟
قرب منها وهو يمسك خصرها ويشد عليه وحط عيونه بعيونها وهو يقرب مرا غمض عيونه وهو يهمس: بعاندك اكثر
ميعاد:امممم بس ترا عنادي اقوى على فكره يعني
سلطان وهو يشد على خصرها:امممم مو مشكله يبيبيء كلنا بنعاد بعض اجل
ميعاد وهي تلعب بشعره: اممم اجل تحمل كل مايجيك ياحب
سلطان لمح رقبتها المُغريه:باسها بهدوء موافق ياحب
ميعاد: والحين يلا وخر راحت وهو يسحبها مرا ثانيه ويحشرها عالجدار
ميعاد: يالله سلطان ماتبطل حركاتك ذي
سلطان: كيف ابطلها وعندي كل هالجمال؟
ميعاد وهي كاتمه ضحكتها: انا اقول بدل رومنسية القرود هذي خل نجهز اغراضنا ابرك
سلطان:لقيت شيء احلى من رقبتك ناضر شفتها بنضرات خبيثه وهو يبوسها
ميعاد: خلصت فلمك الهندي ذا؟
سلطان: بسامحك هالمره يلا روحي جهزي اغراضك
'
'
عائله جديده لاول مرا تضهر|
ابو نجد"مساعد"العمر٤٦ سنه
ام نجد"نوره"العمر٣٨سنه
نجد العمر٢٢ سنه
نايف العمر١٩ سنه
عائله بسيطه حالتها الماديه متوسطه عايشين في الرياض تحديداً الباديه كان ابو نجد من عشاق الابل والبر عاش كل حياته هناك عصبي مُتشدد اغلب الشيء لاكن قلبه حنون رغم عصبيته الشديده
ام نجد اطيب قلب بالعايله قلبها رهيف وحنون كل الي عايشين قريب منهم يحبونها خصوصاً الاطفال
'
'
في الساعه ال11:30صباحاً|خيمة نجد ونايف
كانت خطواته مُتجهه لهم وهو معه عصايته وهو يدخل:نجد نايف يلا قومو الساعه11:30 عاونو امكم بالفطور
نجد: بس شوي يبه
ابو نجد: اقوول قومو يلا ماتسمعون انا شقلت! ضرب بعصاته بقوه على الارض فز نايف من ضربة العصاه القويه: سم يبه بقوم الحين
نجد وهي تتمغط بنعاس:صباح الخير يبه
ابو نجد: انا بروح عند الابل واجي الاقيكم مجهزين الفطور!
ام نجد: سم يابو نجد كلشي تبيه بيكون جاهز
طلع من الخيمه متجهه للابل وبطريقه لهناك طاح وهو يصرخ!
ام نجد بخوف: ناااييف وشفييييه ابببوك!!
نايف ارتاع: بسم الله يمه والله مدري وشصارله
ام نجد: وهي تركض من جهه ونايف من جهه ونجد من جهه
ام نجد اول ماوصلت شافت حيه تزحف لطريقها: ناايف حييه!
نايف وهو ياخذ العصايه ويقتلها
نجد وهي تبكي:يمه تكفين خلينا نلحق على ابوي لايصيرله شيء
ام نجد: تعالي ساعديني نوديه للخيمه
نجد وهي تمسكه من رجوله وام نجد من عند راسه وهم يودونه للخيمه
ابو نجد وهو يتوجع: نايف روح قريب تحصل ابو مطلق يعالج شعبي ناده لي بسرعه!!
نايف بركض: ان شاءلله يبه
راح وهو يركض عند ابو مطلق: ابو مطلق الحقنا
ابو مطلق: العلم ويش؟
نايف وهو يتنفس بسرعه من الركض والخوف: ابوي كان رايح للابل قرصته حيه
ابو مطلق وهو يجهز الادويه الشعبيه: يلا ياولدي ودني له والف لاباس عليه
'
'
في بيت ابو سلطان|
وصلو للبيت وهم يدخلون الاغراض للبيت ميعاد بتعب: انا بصعد غرفتي اريح شوي
ام سلطان: يلا يابنيتي
فجر: يمه يصير اقولك بطلع فوق تعبت وانا اشيل الاغراض
ام سلطان: اقول قومي رتبي الاغراض بالمطبخ ونزلي الاشياء الي بسيارة السواق ابرك لك صدقيني
فجر: يالله الواحد بهالبيت مايرتاح ابد!
ام سلطان: بدون حلطمه ويلا على شغلك
محمد: الحمدالله عاد انا نزلت اشياء كثير وخلصت بروح العب سوني
ام سلطان: وانت هذا همك السوني
محمد: اكيد يمه هذا ضروري
سلطان: يمه انا بروح للشركه بشوف وش الاوضاع هناك تبين شيء؟
ام سلطان: روح الله معك
'
'
في بيت ابو فهد| على الفطور
جاء فهد وهو ماسك الشاهي: وهذا احسن شاهي جاكم
ام فهد بابتسامه: تسلم يدينك ياحبيبي هات الخبز الي عندك
فهد وهو يمد لها الخبز: سمي يالغاليه
ابو فهد: السلام عليكم
ام فهد: وعليكم السلام
فهد: وعليكم السلام يبه شلونك طمني عنك؟
ابو فهد: الحمدالله بخير يارب لك الحمد
جلس وهو مروق: ام فهد عاونيني الخبز
ام فهد: سم
ابو فهد: اليوم عشان احسكم طفشتو من قعدة البيت بنروح البر جهزو نفسكم وخذو معكم كلشيء
ام فهد: اي والله طفشنا من قعدة البيت، فهد يمك بعد ماتخلص حط الفرش والمراكي بالسياره وانا بجهز القدر والاغراض والقهوه والشاهي والمكسرات والحلا
'
'
في الشركة|مكتب سلطان&عايض
سلطان وهو حامل بيده ايس امريكانو داخل برواق لمكتبه: السلام عليكم
عايض: هلا والله وعليكم السلام مابغيت تداوم
سلطان:ابد والله تو جينا من الشاليه المهم طمني كيف اوضاع الشركه؟
عايض: ابد كلشي تمام بس هذا الموضف الجديد اشغلنا كل يوم يتهاوش مع حُراس الامن
سلطان: اي خير ان شاءلله
عايض: وانت شلونك كيفك مع زوجتك لاتقولي هوشات كمان
سلطان وهو يتكي عالكرسي: والله يعني احياناً زي العسل واحياناً هوشات
عايض: ماستغرب منك اكيد ان انت حق الهوشات
سلطان بضحكة سُخريه وهو يتذكر اخر موقف بينهم.
'
'
في الباديه|
جاب غتره وهو يربطها على رجله ويمص السم ويتفله كررها كثير واخر مرا استفرغ اكرمكم الله
ابو مطلق: تخلصت من السم وخلاص الامور طيبه دامه استفرغ اكيد انه بخير الا نايف تعال عندي ابوك وشصارله كيف قرصته الحيه؟
نايف: قالنا جهزو الفطور وهو بيروح للابل شوي وانه يطيح ويصرخ وامي تقول ابوك طايح ويصرخ ويوم وصلنا الا وهي حيه قارصته
ابو مطلق: اعوذ بالله اهم شيء قتلتوها؟ وانتبهو ترا الحيات تكثر بالصيف.
'
'
في بيت ابو سلطان|جناح سلطان&ميعاد
اخذت شاور وطلعت وهي تصادف ورقه صغيره طايحه عالارض كملت مشي بعدم اهتمام نشفت شعرها وراحت بتنام تريح راسها لاكن عانقها الفضول انها تفتح الورقه وتشوف وش فيها راحت تشوف الورقه كانت رساله من فهد اخوها! كيف وصلت ومين وصلها!
"السلام عليكم اختي حبيبتي ميعاد،انا حبيت اقولك بس اني قلت لامي عنك واني شفتك لاكن تطمني ابوي مادرا عن شيء بس والله انجبرت اقولها تعبت اششوف امي تبكي محروقه ليل نهار وكل ماسألها وشفيك يمه تقولي اختك،اتمنى تكونين بخير من اخوك فهد، ارسلت لك الرساله مع زوجك وهو الي وصلها لك.
حست بقشعريره وهي تقراء الرسأله وقلبها محروق على شوفة امها دقت على سلطان الي كان مع اخوياه في الاستراحه: الو سلطان وينك تعال البيت بسرعه
سلطان حس ان الوضع مايمزح وصوتها فيه نبرة بُكاء: شفيك؟ فيه احد مضيق صدرك؟
ميعاد: لا بس تعال بسرعه
سلطان: انا الحين طالع من عند العيال.