ماكانت النية حب ياسعود

16

في يوم جديد على اهل الرياض
كانت تمشي بالغرفه وهي تفكر بعُمق باللي صار امس مسكت جوالها وهي تبحث عن اسم عزيز دقت عليه بتوتر وهي تكلمه: عزيز
عزيز بابتسامه من الاتصال وهو يدعي انها موافقه: هلا؟
فجر: انا وافقت تعال اليوم اخطبني من ابوي
عزيز: احلفي!
فجر بضحك: وشوله احلف؟ ترا مو لعبه والله
عزيز: احبك
فجر بضحك:مع السلامه
قفلت الخط وهي مبسوطه نزلت تحت بسرعه وهي تشوف ام سلطان هااااي مااامي
ام سلطان: شعندك صاحيه مروقه؟
فجر: ابد شبعت نوم وصحيت وانا مروقه ومبسوطه
ام سلطان: اجل يلا قومي ساعديني نجهز الفطور قبل ياذن
فجر: يمه عاد تدرين معرف اسوي شي وش تبيني اساعدك فيه؟
ام سلطان: خذي السمبوسه ذي واقليها
فجر: سمي يمه ووش غيره؟
ام سلطان: اللقيمات.
'
'
في ايطاليا| اوتيل ميعاد.
صحت من النوم بنُعاس تمغطت وهي تشوف الشمس الي داخله عالغُرفه ومعطيتها منضر جميل لبست السليبر حقها وراحت تغسل وجهها وتفرش اسنانها طلعت وهي تمسك بطنها وتمرر اصابعها عليه بهدوء اهخ كلها شهور واشيلك بيدي يماما ابتسمت بهدوء وبعدين دخلت المطبخ وهي تشوف الثلاجه فاضيه اوووف وش بسوي على الفطور ؟ هبله وش خلاني اسافر برمضان اوووف الحين شوارع ايطاليا فاضيه وش بيطلعني الحين! يالله شكلي بطلب ديلفري يوصل لي
'
'
في بيت ابو سلطان على طاولة الاكل|
ابو سلطان:فجر مديلي صحن السمبوسه
فجر: سم يبه
ابو سلطان: الا صح ام سلطان جهزو نفسكم اليوم بتجي اختك وابو عزيز مدري وش عندهم والله بس قالو بيجون
فجر ابتسمت بعد ماسمعت هالطاري: متى بيجون ؟
ابو سلطان: بعد صلاة التراويح
فجر بحماس: زييين بنضف البيت يعني بعد الفطور
ام سلطان: وانتي وش دخلك؟ العامله تجي تنضف
فجر: اساعدها يمه هذا جزاتي يعني ترا اسوي خير واساعدها شفيك
ام سلطان: اي زين.
'
'
في بيت ابو فهد:
دخل فهد البيت على نص الاذان باس راس امه وابوه: تاخرت عليكم والله شوارع الرياض زحمه والشغل كان كثير عشان كذا تاخرت ولا انا طلعت قبل ياذن بشوي
ام فهد:روح يمك البس وغسل يدينك وتعال افطر
فهد: سمي يمه
ابو فهد: ام فهد
ام فهد: سم؟
ابو فهد:تعالي بكلمك شوي على جنب
ام فهد: خير عسى ماشر؟
ابو فهد: اختك ابتهال كلمتك شيء؟
ام فهد بتنهيده: بس يابو فهد ابتهال تدري انها مسجونه كيف بتكلمني؟
ابو فهد: نسيتي؟ امس كان موعد خروجها يعني اكيد انها قد طلعت كيف ماكلمتك ؟
ام فهد: بس كيف بتكلمني؟ وهي مامعها رقمي وولا اي شي يخصني
ابو فهد: هي مامعها احد ترا حاولي انك تدورين رقمها او شوفي بيتها اوصلك اياه بعدين يمكن تكون فيه
ام فهد: على خير ان شاءالله.
'
'

في بيت ابو سلطان|
نزلت من سيارة السايق وهي لابسه عبايه ورديه وبيدها اكياس السوبر ماركت كلمت السايق ينزل باقي الاغراض دخلت البيت:يمه شوفي ذول كل الاغراض الي طلبتيهم رحت جبتها بنفسي مع السايق
ام سلطان: طيب حطيهم بالمطبخ
فجر بحماس وهي توديهم للمطبخ  نقزت فوق لغرفتها عشان تنزل عبايتها وتجي تجهز الحلا
يمه يمه انا بجهز الحلا بيديني
ام سلطان: وش هالسنع الي نزل عليك فجاءه ؟
فجر: امممم فجاءه طلع مني فايده مفروض تنبسطين علي والحين يلا بسوي الحلا
ام سلطان: طيب وبعد ماتخلصين خذي الفحم وحطي البخور وبخري مجلس الرجاجيل وصالة الحريم
فجر: من عيوني الثنتين يامامي
خلصت كل ترتيب البيت وطلعت فوق لغرفتها لبست بنطلونها الجينز مع بلوزه سوداء عارية الاكتاف فكت شعرها الستريت وفيرت اطرافه حطت روج احمر فاقع جريئ  رسمت عيونها بالايشادو مع رسمة ايلاينر بيرفكت تعطرت بعطرها الفواح وهي تتامل نفسها بالمرايا باست المرايا بكُل حُب نزلت تحت يمه باقي ماوصلو؟
ام سلطان: لا لسى