{ايآ اسمٌ على مُسمى ، جِئتي لتَأخُذي حَقَكِ فَأخَذتِي قَلبِي مَعَه}

البارت الثاني

بعد يومين ،،،

بغرفة ورد جالسة على سريرها واللاب قدامها والاوراق حواليها لها يومين تشتغل على القضية لكن فيها اشياء مفقودة عجزت تلاقيها ولهالسبب قررت تروح شركة المسمى برعد وتاخذ معلومات منه ،قامت ورتبت اوراقها واخذت اللاب وحطتهم بشنطتها و بدلت ملابسها و تعطرت واخذت اغراضها ونزلت للصالة شافت امها وابوها جالسين يتقهون ويتابعون برنامج على التلفزيون تقدمت منهم بعد م ردت السلام وباست راس امها وابوها
امها باستغراب : وين رايحة يا يما مالك وقت من جيتي من الشركة
ورد بابتسامة : برجع الشركة في اوراق مهمة نسيتها باخذها وبمر الكافيه مواعدة صديقتي نلتقي بعد ساعة
ابو ورد بحنان : انتبهي لنفسك يبا ، (ومد يده لجيب ثوبه وسحب بوكه واخرج منه فلوس ومده لورد) خذي ذول الفلوس يبا خليهم معاك لو نقصك شيء
ورد بحب : الله يخليك لنا يالغالي بس مو محتاجة شيء الي عطيتني اياهم الصباح باقي مثل ما هم ما صرفتهم
ابو ورد : معليه يبا خلهم معك يمكن تحتاجينهم
اخذتهم منه وباست يده وطلعت لسيارتها وتوجهت لشركة رعد بدون علم ابوها الي اكيد راح يرفض روحتها له
بعد مدة من الوقت وصلت للشركة وقفت سيارتها بالمواقف ونزلت منها دخلت للشركة ووصلت للسكرتيرة الموجودة بمكتبها ردت السلام بهدوء ونطقت : لو سمحتي ابي اقابل الاستاذ رعد
السكرتيرة باستغراب:من انتي ؟ وعندك موعد
ورد بثقة : انا المحامية ورد ،ولا ما عندي موعد قولي له المحامية ورد تبي تشوفك ضروري
السكرتيرة باستغراب من الواقفة امامها سحبت السماعة وطلبت الاذن من رعد وبعد ثواني نطقت :تفضلي بانتظارك
مشت لمكتب رعد دقت الباب ووقت سمعت سماحه لها بالدخول فتحت الباب ودخلت ونطقت بهدوء :السلام عليكم ،استاذ رعد؟
رفع عيونه عن اوراقه وناظرها لثواني معدودة ورد السلام ببرود ونطق :تفضلي
جلست بثقة استغرب منها رعد وقال : من انتي ومن وين تعرفيني ووش تبين؟
ورد بهدوء : معك المحامية ورد ماجد ال... جيتك عندي استفسار لكم سؤال يخص القضية الي معي وما احد يقدر يجاوبني عليها الا جدك ولهالسبب ابي اقابله وضروري جدا
رعد باستفسار : قضية وش ذي ووش دخل جدي انا موب فاهم شيء
ورد بهدوء : مو مهم تفهم اللحين جدك يفهمك كل شيء المهم اللحين ابي اشوف جدك
رعد ببرود : ما اقدر اخذك له لين اعرف وش ذي القضية ووش دخل جدي فيها
ورد بهدوء : بالمختصر ابوي من سنين شركته انسرقت وبسبب هالسرقة الشركة افلست وجدك طلب من ابوي يتنازله عن الشركة بمقابل وانا ابي اقابل جدك ابي اعرف وش المقابل وليش ابوي وافق يتنازله عن شركته ومين الي سرق الشركة
رعد بتفاجىء من كلامها : انتي وش قاعدة تخربطين عارفة نفسك وش تقولين
ورد ببرود : اي واللحين بقابل جدك
وقف رعد بهدوء وسحب مفاتيح سيارته وجواله ونطق بهدوء :الحقيني
طلعوا من الشركة لمواقف السيارات وكانت بتركب سيارتها بس وقفها صوته : اركبي معاي وسيارتك بخلي السواق يجيبها
هزت راسها برفض : اعتذر منك ما احب احد يسوق سيارتي انت امشي قدامي وانا بكون وراك
وركبت سيارتها بدون تسمع رده وحركت بهدوء
اما رعد زفر بعصبية من هالانسانة الغريبة وعنادها وتصرفاتها الاغرب ركب سيارته وحرك وراها تجاوزها وصار يمشي قدامها وهي وراه .

ببيت الجد ابو تركي،،،

كانوا مجتمعين احفاده و عياله ابو تركي وام فهد
جود بترجي : تكفى جدوو قول تم
ناظرها الجد بطرف عينه ونطق : على وش اقول تم يالملسونة
جود بتمثيل للزعل : افا يا جدو الله يسامحك انا ملسونة ؟ لكن مقبولة منك المهم توافق نروح المزرعة هالاسبوع تكفى
الجد ببرود : الاسبوع ذا لا الكل مشغول وانتي عندك جامعة نروح اخر الاسبوع ونجلس يومين
نقزت جود بفرح : يس يس (وقربت لجدها ضمته وباست خده بحب ):عاش جدو عاش عاش
ضحك الكل على هبالها ونطق سياف باستفزاز : اركدي محلك يالقردة جالسة تناقزين مثلهم
جود بقهر : ما القرد غيرك والله وش دخلك فيني
قاطعتها ضربة جدتها بالعصا على ظهرها : عيب يالي ما تستحين على وجهك اخوك الكبير ذا تحترمينه ولا تقولين له هالكلام
جود بحنق : يا جدة ما سمعتيه وش يقول لي
ابو رعد : يبقى اخوك الكبير يبا ولازم تحترمينه واللحين اعتذري منه
بوزت جود بزعل ولمعت عيونها من هجومهم عليها بهالطريقة ووجهت كلامها لسياف بصوت مبحوح : اسفة وحقك علي يا اخوي وطلعت للحديقة ركض من خانتها دموعها
ملاذ بهدوء : ترا ماله داعي هجومكم عليها كذا انتوا تدرون بها انها حساسة وتزعل بسرعة وهي تناظر سياف بنظرات زعل(ووقفت واعطت ولدها سعد لامها ونطقت ) بروح اشوفها
ولحقت جود تدور عليها

قاطع صمتهم دخوله وجنبه ورد : السلام عليكم
ردوا السلام وناظروه باستغراب من البنت الي واقفة جمبه
نطقت ورد من شافت علامات الاستفهام والاستغراب على وجيههم : انا المحامية ورد من بعد اذنكم ابي اشوف مفلح ال... لامر ضروري
الجد باستغراب : خير يا بنتي انا مفلح وش تبين
نطق رعد بهدوء: من اذنك يا جدي نبيك بالمكتب الكلام هنا ما ينفع
ام رعد : وش فيكم يا وليدي وش صاير
رعد بهدوء: كل خير يما بعد اذنكم وتوجهوا ثلاثتهم للمكتب ولحقهم ابو رعد جلسوا وبعد فترة من الصمت نطقت ورد ببرود وهي تراقب وجيههم : انا ورد ماجد ال...
شافت علامات الصدمة على وجه الجد الي وجه نظراته لابنه والي صدمته ما تقل عن صدمة ابوه
ونطقت بهدوء: دام ذي الصدمة كلها على وجوهكم من سمعتوا اسمي بس معناها تعرفون انا ليش هنا
نطق الجد بعد صمت مريب : انتي وش جابك ووش عرفك فينا
ورد ببرود وثقة : الي يسأل هنا هو انا ،واللحين بعرف وش هو المقابل الي عطيتوه لابوي مقابل يتنازل عن الشركة وابي اعرف مين سرقها
الجد بهدوء : انا مالي حق اتكلم بشيء دام ابوك ما قالك والي سرق الشركة احد الموظفين الي كانوا يشتغلون فيها ولانه سرقها وزور هويته وهرب برا البلد ما قدرنا نمسكه مع الاسف
ناظرته ورد بصمت تام وهي ما اقتنعت بكلامه ونطقت : ابي كل الاوراق القديمة والاتفاقات الي كانت بينكم من سنين ابيها كلها
ابو تركي بهدوء : مالك حق فيها وذي اسرار عمل ما يصير تاخذينها
ورد بهدوء : ما باخذها بشوفها هنا وبرجعها
الجد : كلمي ابوك وخذي الاوراق منه كلها موجودة عنده لحفظ الأمانة
ناظرته بهدوء ونطقت : الحقيقة بكشفها عاجلا او اجلا لكني بكشفها ووقفت تمشي للخارج بثقة
اما رعد الي كان طول الجلسة صامت ويراقب الي يصير نطق ببرود : وش قصة الشركة والسرقة والتنازل
الجد بهدوء : كل شيء بوقته حلو لا تستعجل يبا
ناظرهم رعد بحدة وطلع من المكتب ومن البيت بكبره ناظر سيارتها وشافها موب موجودة تنهد بضيق وركب سيارته وتوجه لبيته بكرا بيسافر كندا عنده اجتماع للصفقة الجديدة بعد بكرا وصل بيته وطلع لغرفته خلع ثوبه ورماه ع الكنب وتمدد على سريره بتعب سحب جواله وحط منبه بينام شوي وبعدها بجهز شنطته غمض عيونه لكن طيفها جاء قدامه فتح عيونه وهو يستغفر وتقلب لليمين ورجع ينام وبعد وقت من التفكير غفيت عيونه.

انتهى 💛
وش رأيكم بالبارت 🤗
ووش توقعاتكم للأحداث الجاية 🤔
لا تنسوا التصويت يحلوين 🌟💛