{ايآ اسمٌ على مُسمى ، جِئتي لتَأخُذي حَقَكِ فَأخَذتِي قَلبِي مَعَه}

البارت العاشر

مساء الخير يا حلويني 🥹 اشتقت لكم وجاية ومعي بارتات تسركم وتعجبكم ان شاءالله ابي اشوف تفاعل حلو وتشجعوني ارجع اقوى من قبل على الكتابة والتنزيل واللحين بخليكم مع البارتات🤍

لا استبيح القراءة بدون لايك ⭕
بسم الله الرحمن الرحيم

دخلوا ونطقوا مع بعض : السلام عليكم
رفعت راسها ورد وناظرت رعد وجات عيونها بعيون رعد الي ناظرها لثواني ولف نظره لصوت ام ورد الي رحبت فيهم : وعليكم السلام حياكم تفضلوا اجلسوا
جلسوا رعد وسلطان ونطق سلطان مباشرة : يا خالة في موضوع يخصكم وجايين نكلمكم فيه انا والاستاذ رعد كوني المحامي الخاص له
نطقت ورد بهدوء عكس العواصف الي داخلها : بخصوص ؟
نطق رعد : بخصوص ابوك وقضية افلاس الشركة حقته
نطقت ورد بغصة : احنا عرفنا كل شيء
لف نظره رعد لسلطان بصدمة ونطق : كييف ؟
مدت له ورد الورقة ونطقت : تفضل شوف بعينك
رعد باستغراب : وش ذي ؟
ورد بهدوء ونبرة الحزن طاغية بصوتها : وصية ابوي لي
ناظرها رعد لثواني واخذ منها الورقة وبدأ يقراها بعيونه وبعد مدة بسيطة انتهى من قراءة الورقة ورفع عيونه يناظر ورد ونطق بهدوء : نفس الكلام الي قاله لي جدي مكتوب بالورقة يعني اللحين انا وانتي متزوجين من ١٣ سنة ( وصار يضحك باستهزاء و هدوء على الي صار لهم مو قادر يعبر عن الشيء الداخله )
ناظرتهم ام ورد ونطقت : وش ناوي عليه يا ولدي
لف نظره لها ونطق بهدوء عكس البراكين الي داخله : ابد يا خالة القرار بيد بنتك الي تبيه انا جاهز اسويه لكن الي ابيكم تعرفوه (ووجه نظره لورد وثبت عيونه بعيونها ) وخاصة انتي ورد انه يشهد عليي ربي لو تبين نبقى سوا ونعلن زواجنا بحطك بعيوني وان كانك ما تبيني وكل واحد يروح بطريقه من عيني ذي قبل ذي (وهو يأشر على عيونه اليمين ومن بعدها اليسار) والشيء الاهم الي ابيك تعرفينه اني ابيك شاريك ولولا الظروف كنت جيت وخطبتك رسمي.
ورد ببرود : وش تنتظرون مني مثلا لي ١٣ سنة متزوجة ولا ادري عن الموضوع ويوم دريت تبوني انا اقرر
ناظرتهم لثواني ثم وجهت نظرها لامها ونطقت : انا بطلع ارتاح ومابي احد يزعجني ، ( واعطتهم ظهرها طالعة من المجلس لغرفتها )
اما رعد وقف ووقفوا جميعهم معه ونطق : اتركوها تاخذ راحتها بالتفكير ولا احد يضغط عليها بشيء ،وخالتي من اليوم اعتبريني ولدك واي شيء تبونه دقي علي ( ومد لها كرت ارقامه ) وانا بمركم كل يوم وبجيب معي كل النواقص الي تحتاجونها للبيت .
نطقت ام ورد : لا يا ولدي لا تكلف على نفسك وتتعبها نحنا الحمدلله مو ناقصنا شيء و ورد مو مقصرة بالبيت
قاطعها رعد : معليه يا خالتي انا زوج بنتك ومن اليوم انا مسؤول عنكم وحتى لو قررت ورد نتطلق .
ناظرته ام ورد بامتنان بدون ما تنطق بحرف
ورعد ودع ام ورد وطلعوا رعد وسلطان ولحقتهم سلاف الي نطقت : سلطان ، انتظر
وقف سلطان ونطق : هلا عيني تبين شيء ؟
سلاف : اي وصلني بطريقك للبيت
ناظرها سلطان ونطق بتساؤل : سيارتك وين ؟
سلاف : ما جيت فيها جات ورد اخذتني من البيت وطلعنا لكوفي وبعدها رجعنا للبيت
نطق رعد باستعجال : سلطان يلا يا خوي بنوصلها بطريقنا بس تكفى ابي الحق الاجتماع نص ساعة ويبتدي
نطق سلطان : زين يلا جايين ( ووجه كلامه لاخته ) يلا تعالي اركبي
هزت راسها بدون كلام ومشت للسيارة ركبوا وتحركوا متوجهين لبيت سلطان وبعد فترة من الوقت وصلوا ونزلت سلاف من السيارة وتوجهت للبيت اما سلطان فتح الباب وكان بينزل لكن لف نظره لرعد الي نطق : سلطان ، مشكور على وقفتك معي واي شيء تحتاجه خبرني
ابتسم سلطان بهدوء وربت على فخذ رعد ونطق : ابد ما سويت شيء ذا شغلي المهم اللحين انت فكر بحياتك الجاية
تنهد رعد بضيق ونطق : ان شاءالله خير
ونزل سلطان من السيارة متوجه لبيته اما رعد حرك سيارته متوجه للشركة وبعد ربع ساعة وصل رعد للشركة وقف سيارته بالمواقف ودخل للشركة بهيبته المعهودة والكل يسلم عليه شفهيا ويقدم له التحية والاحترام ، دخل لمكتبه ودخل وراه السكرتير ونطق : اهلا طال عمرك هذي اوراق الصفقة لاجتماع اليوم ( ومد له الملف الخاص بالصفقة )
نطق رعد بعد اخذ الملف : زين جيب لي قهوة لغرفة الاجتماعات والحقني مو باقي كثير وقت للاجتماع
هز راسه السكرتير بطاعة واحترام وخرج ينفذ طلب رعد.

اليوم الثاني الساعة ١٢:٤٥ الظهر ،،،،

ببيت الجد مفلح الكل متجمعين بالصالة بعد الصلاة ويتقهون ينتظرون الغداء والاحاديث تدور بينهم قطع احاديثهم صوت الجد الي نطق : وين رعد للحين ما جاء
نطق فهد : بكلمه اللحين اشوف وينه
هز راسه الجد بدون كلام
واخذ فهد جواله عن الطاولة امامه وخرج من المجلس للحديقة يكلم رعد وبعد دقايق انتهى من المكالمة وكان بيرجع للمجلس لو ما انتبه لمحبوبته جالسه بزاوية الحديقة وتسقي الورد ومو منتبهة لفهد وكل تركيزها على الورد ، واقف مكانه يتأملها بحب ونبضات قلبه الي ارتفعت ويجزم انه صوتهم مسموع لها ، كان بيروح لها ويكلمها لكنه تراجع باللحظة الاخيرة من سمع صوت سيارة قريبة من البيت وعرف انه رعد جاء ولف راجع للمجلس عشان لا احد يشك فيه .

اما عند عاشقة الورد جود الي يوم سمعت صوت سيارة تركت مرش الماء الخاص بالسقي وكانت بتدخل للبيت بس انتبهت ان السيارة سيارة اخوها رعد وركضت لعنده اول ما شافته ينزل من السيارة وضمته بقوة وهي تقول : رعدد، اشتقت لك وينك مختفي
ضمها رعد الي اتفاجئ من وجودها وضمها له بهالسرعة والقوة ونطق بحنية : قريب يعيوني انتي بس مشغول شوي الشغل كثير وما اقدر اتركه او اهمله
بعدت عنه جود بضع انشات وهي تناظر وجهه ونطقت : عساك ع القوة يا خوي ، اكلت شيء تبيني اجيب لك شيء
هز راسه بنفي وهو يقبل راسها ونطق : لا يعيوني بنتظر الغداء ونتغدا سوا واللحين ادخلي داخل بشوف جدك يبيني
نطقت بمرح وهي تشبك يدها بعضده : زين يا اجمل الاخوان يلا
ومشوا داخلين للبيت جود اكلمت طريقها لصالة الحريم مبسوطة بشوفة اخوها وحنيته لها ، ورعد اكمل طريقة للمجلس دخل ونطق السلام يقطع احاديثهم
ردوا السلام عليه كلهم باصوات متفاوته واقترب رعد من جده وابوه وقبل راسهم بهدوء وجلس بجانب جده المكان الوحيد الي كان فاضي بالمجلس ورجع الكل لاحاديثهم وهمس الجد لرعد بهدوء وتساؤل : وش صار ؟
نطق رعد بنفس الهدوء : نتكلم بالمكتب موب هنا يا جدي
هز راسه الجد بهدوء وهو يربت على فخذ رعد وبعدها بدقائق جات جود للمجلس ودقت الباب ونطقت من خلف باب المجلس : جدي تقول لكم جدتي الغداء جاهز حياكم
نطق الجد بصوت جهوري : زين يا بنتي جايين
ووقف الجد ووقف الكل معه متوجهين لصالة الطعام .
وبعد الغداء رجع الكل تجمع بالمجلس وقبل جلوس رعد نطق الجد : رعد الحقني للمكتب
نطق رعد : زين
ومشى متوجه للمكتب ورا الجد وقبل خروجهم من المجلس جاء الحارس ونطق : يا سيد في رجال برا يقول يبيك بموضوع مهم وما يتأجل
نطق الجد باستغراب : ومنهو ذا الرجال ما قال اسمه ؟
هز الحارس راسه بالنفي
ونطق الجد : خله يتفضل
ورجع الكل جلس مكانه بانتظار الضيف الي جائهم فجأة

بالطرف الثاني:
دخل بهيبته لمجلس ابو تركي ونطق السلام بصوت جهوري
الكل رد عليه السلام ومستغربين هالضيف
نطق الجد ابو تركي باستغراب وترحيب بضيفه : حياك تفضل اجلس
جلس المجهول ونطق : الله يحيك يا ابو تركي
نطق الجد ابو تركي : تعرفني ؟ اول مرة اشوفك من وين تعرفني ؟
نطق المجهول بهدوء وخبث بكلامه : الا تعرفني يا ابو تركي بس من زمااان كثيير بس اتوقع انك ناسيني ، المهم هذا موب موضوعنا الي جاي عشانه
نطق ابو رعد وهو يحاول يتذكر هالوجه الي قدامه : انت مين ؟ ووش غايتك مننا ؟
نطق المجهول بابتسامة مستفزة و الخبث موب ظاهر بنبرة صوته الي حولها للبرود : انا عبد العزيز وينادوني  بابو فيصل ، رجل اعمال حر ، وجايكم اليوم بخصوص صفقة مهمة بالنسبة لي ولشركتي .

انتهى 💛
وش رأيكم بالبارت 🤗
ووش توقعاتكم للأحداث الجاية 🤔
لا تنسوا التصويت يحلوين 🌟 💛
تفاعل حلو تنزيل اكثر غزلاني 🤎