{ايآ اسمٌ على مُسمى ، جِئتي لتَأخُذي حَقَكِ فَأخَذتِي قَلبِي مَعَه} 💢متوقفة💢

البارت الثالث

ببيت الجد ؛؛؛؛

نزل الجد وابو رعد وجلسوا ونطقت الجدة بتساؤل: وش صاير يا ابو تركي مين ذي البنت الي جت وطلعت مو شايفة قدامها حتى انها ما ردت على احد فينا
الجد بهدوء : سالفة طويلة تعرفونها بعدين المهم اللحين ان جت هالبنت مرة ثانية تجيبونها مكتبي ولا احد يكلمها
الجدة بهدوء : ابشر مثل ما تبي
جلس الجد ونطق لام رعد : قهويني يا بنيتي
قامت ام رعد بابتسامة ومدت له الفنجال : سمي يبا
الجد بابتسامة حنونة : تسلم يمينك يالغالية
ابتسمت بحب لعمها : الله يسلمك

نروح للحديقة ؛؛؛؛

جالسة بالجلسة ورا البيت ودموعها تنزل بحزن كلام سياف جرحها وهجومهم لها يوم ردت عليه جرحها اكثر ما كانت متوقعة كلامهم لها هي بطبعها كذا مرحة وتفرح لابسط الاشياء الي تبسطها بس بنفس الوقت هي حساسة مرة وما تتحمل احد يقط عليها كلام ويزعلها ، مسحت دموعها من حست بيد على كتفها وشافت ملاذ تجلس بجنبها وهي تقول : نجودتي لا تزعلين منهم انتي تدرين بسياف كيف يحب يستفزك والباقي فهموا الموضوع غلط
جود بزعل : وشو له يهدم فرحتي بقبول جدي نروح المزرعة وهو يدري اني اشتقت لمهرتي (حصانها ) وبعدين ما شفتيهم شلون كلهم هزأوني وسياف ما احد تكلم معاه
ملاذ : لا تخافين تراني ما سكت لهم وترا سياف انا بتفاهم معه وقت نرجع للبيت واللحين قومي غسلي وجهك وتعالي نشوف وش قصة البنت الي جات مع رعد
نجود باستغراب : اي بنت وليش جات مع رعد ؟
ملاذ : ما ادري وقت لحقتك شفت رعد وجنبه بنت ما ادري من هي ولا ليش جاي لاني طلعت بسرعة
نجود : اجل يلا تعالي ومشوا للمغاسل جاهلين الي جالس يراقبهم ويسمعهم .

ببيت ابو ورد الساعة ٨:٣٠ م ؛؛؛؛

دخلت البيت بهدوء والتعب والارهاق واضح عليها القت السلام وتقدمت لامها وابوها وقبلتهم وجلست على الكنبة قبالهم
نطقت الام بحنان : يعطيك العافية يما باين عليك تعبانة تبين احط لك العشاء تاكلين وبعدها ترتاحين
هزت راسها رافضة ونطقت ببحة : لا يما مابي شيء بطلع انام شوي عندي شغل كثير لازم اخلصه
ابو ورد بحنان : لا تتعبين نفسك يبا الشغل موب طاير تتعشين وبعدها ارتاحي والصباح يصير خير
ناظرت ابوها بنظرات غامضة ما قدر يفسرها ونطقت بهدوء : تعشيت مع صديقتي بالمطعم بروح انام تصبحون على خير
ردوا بصوت واحد : وانتي من اهل الخير
صعدت غرفتها وفسخت جزمتها (اكرمكم الله ) واخذت بجامتها عبارة عن شورت قصير وبلوزة كت لونها ابيض وعليها رسومات من الخزانة ومنشفتها وراحت تتروش وبعد نص ساعة طلعت وجلست على التسرحية جففت شعرها ومشطته ودهنت يديها ورجليها لوشن برائحة الياسمين ورشت من عطرها المفضل واخذت لابتوبها وجلست على السرير فتحته وجلست تشتغل وتسترجع الاحداث الي صارت ببيت ابو تركي وتسجل كل شيء عندها وتحاول تعرف وش الشيء الي مخبيه ابوها عنها ورافض يحكيلها اياه وبعد ساعتين من التفكير وتسجيل الملاحظات وربط الاحداث قررت تروح تشوف خزنة ابوها وتكتشف بنفسها الشيء الي مخبيه ابوها عنها .
سكرت اللاب و ضبطت المنبه على صلاة الفجر ونامت على طول من تعبها وارهاقها.