{ايآ اسمٌ على مُسمى ، جِئتي لتَأخُذي حَقَكِ فَأخَذتِي قَلبِي مَعَه}

البارت السادس

بالمزرعة؛؛؛؛؛

الكل وصل للمزرعة بعد ساعة والكل توزع بالغرف الموجودة مثل كل مرة و دخلوا يناموا ويريحوا انفسهم من تعب السهر والطريق لين الساعة ١٠ اما الجد الي وصل بعدهم بساعة دخل لمجلس الرجال الي يكون بعيد عن البيت شوي بحيث الحريم تاخذ راحتها لو جاء ضيوف ، ودخل ابو رعد للمجلس بعد ما تأكد من وصول الكل وسلامتهم جلس جنب ابوه ونطق : يبا
ابو تركي : قلبي مو مرتاح السالفة راح تنفتح السر الي خبناه كل هالسنين بينكشف
ابو رعد بقلق واضح : شلون ؟وش صار بالمستشفى يبا ؟ و وش بنسوي اللحين ؟
ابو تركي : لازم نكلم رعد ويعرف بالموضوع وهو يتصرف من كيفه القرار الاول والاخير له
ابو رعد بضيق : بس يبا
قاطعه ابو تركي : ما عندنا حل ثاني السر بينكشف ما عاد نقدر نخبي اكثر دام بنته ورا الموضوع وخاصة ثقتها وقوتها بانها بتعرف كل شيء قريب ووقت شافتني عنده اكيد اللحين ابوها بقول لها كل شيء
ابو رعد تنهد بضيق واضح من هالسر الي ما يعرف وش ممكن تكون ردة فعل رعد عليها : الي تأمر فيه يبا
ابو تركي بهدوء : دق عليه او مدري كيف تتواصل معه خله يرجع ضروري بكرا الصبح ابيه عندي هنا
ابو رعد : حاضر يبا بقوم اكلمه.

بالمسشتفى ؛؛؛؛

بعد انهيارها وانهيار امها بوفاة ابوها امها تعبت ونقلوها لغرفة خاصة وبقيت هي الوحيدة بينهم ولازم تكون قوية عشان امها وعشان تقدر تكمل اوراق ابوها لاجراءات الدفن اخذت نفس عميق ومسحت دموعها ووقفت طلعت من غرفة انها بتتوجه للاستقبال لكن استوقفها صوت : ورد
التفتت للصوت الي يناديها ونطقت بضعف : سلاف
تقدمت لها سلاف وضمتها وهي تحاول تهديها بكلمات المواساة الي تعرفها واخرها نطقت : عظم الله اجركم يقلبي اصبري واحتسبي
ورد بدموع : شكر الله سعيكم ، الله يرحمه انا السبب بموته لولا اصراري باني اعرف وش يصير ووش مخبى من شفت ابو تركي ما كان بابا تعب كذا وتركنا وراح
سلاف باستغراب : من ابو تركي ووش علاقتكم فيه
ورد : اقولك بعدين بروح اخلص اجراءات الدفن
وقفتها سلاف ونطقت : انتظري ورد لا تروحي سلطان هنا بكلمه يخلص الاجراءات هو عشان ياخذه للمقبرة بعد انتي ما تقدرين وحدك
ضمتها ورد بحب وضعف ونطقت : مشكورة سلاف مشكورة مرة ما ادري وش بسوي بهالظرف بدونك
شدت عليها سلاف ونطقت : لا تقولين كذا انتي اختي مو صديقتي وبس وبعدين لو ما وقفنا سوا بهالظروف متى اوقف معك يقلبي يلا اجلسي بروح اجيبلك عصير واطمن على خالتي من الدكتور واجيك
هزت راسها ورد بصمت ورجعت دخلت للغرفة وجلست على الكرسي بجنب امها مسكت يدها ونطقت : سامحيني يما سامحيني انا السبب بموت ابوي كنت برجع حقه ما كنت ادري انه بيموت لو بقيت ورا هالقضية وفي اسرار ما ندري عنها يما سامحيني تكفين(وشهقت ببكاء يقطع القلب) ،اهىء، هىء ،هىء

ببيت رعد الخاص ؛؛؛؛

فتح عيونه على صوت جواله الي يدق سحب الجوال ورد بدون ما يشوف المتصل ونطق بصوت ناعس :الو
فز من صوت ابوه الي نطق : الو رعد قوم صحصح يبا واحجز اول تذكرة للسعودية وتعال باسرع وقت للمزرعة
رعد باستغراب وخوف من نبرة صوت ابوه : خير يبا وش صاير امي فيها شيء
ابو رعد بهدوء : لا يبا اطمن الكل بخير لكن في موضوع ضروري وجدك يبي يكلمك فيه وطلبك باسرع وقت لانه ما يتحمل تأجيل
رعد بهدوء : زين يبا بجهز نفسي و ساعتين واكون عندكم
ابو رعد باستغراب : ساعتين ليش وينك فيه انت مو مسافر
رعد بهدوء : رجعت امس متأخر وما حبيت ازعج احد وكنت تعبان من السفر
ابو رعد : زين اجل الحمدلله ع سلامتك ويلا استعجل لا تتأخر ننتظرك
رعد : تمام ان شاءالله
وما ان قفل جواله مسح وجهه بيده وهو يتنهد قام وسحب منشفته ودخل الحمام (يكرم القارئ) يتروش وبعد ١٠ دقائق طلع وهو لاف المنشفة على خصره وبيده منشفة ثانية ينشف شعره فيها سمع جواله الي يدق تقدم للسرير وسحبه شاف اسم المتصل ورد بسرعة : الو السلام عليكم
:وعليكم السلام استاذ رعد وينك فيه مشغول ؟
رعد : بالبيت بطلع بعد شوي في شيء جديد عرفته ؟
: اي وشيء ضروري تعرفه
رعد بنفاذ صبر : تكلم يا سلطان لا تتلف اعصابي
المحامي سلطان : ماجد ال... عطاك عمره توفى الصباح
رعد بصدمة : وشوو شلون وش صار تكلم قول
المحامي سلطان : ما ادري تفاصيل بالزبط لكن الي فهمته انه في رجال اسمه ابو تركي جاء لماجد وبنته جات وشافتهم سوا وحاولت تعرف الموضوع لكن حالة ماجد تدهورت وتوقف قلبه مع الاسف
رعد بصدمة اكبر : ابو تركي مين ابو تركي ليكون ..
المحامي سلطان : ما ادري لكن الظاهر انه هو
رعد : اجل عشان كذا طالبني اجيه باسرع وقت ، انت وينك اللحين والجماعة وين
المحامي سلطان : نحنا بالمستشفى حاليا جالس اخلص اجراءات الدفن وبنته منهارة وامها تعبت ونقلوها للطوارئ واختي جالسة معها
رعد : زين اي مستشفى انتوا ؟
المحامي سلطان: بمستشفى ال.. الحكومي
رعد : تمام دقايق وانا عندك خلص الاجراءات لين اجيكم
وقفل منه ودخل لغرفة الملابس ولبس ملابسه بسرعة وطلع مشط شعره ورش من عطره واخذ جواله وبوكه ومفتاح سيارته وطلع من البيت مستعجل وهو يفكر بالوضع ووش راح يصير بعدين
ركب سيارته وشغلها وتحرك باقصى سرعة وبعد ١٥ دقيقة وصل رعد المستشفى وقف سيارته بالمواقف ونزل دخل للمستشفى ووقف عند الاستقبال بيسأل لكن سمع صوت سلطان الي يناديه التفت له وقرب باتجاهه سلم عليه وسأله عن الوضع
سلطان : خلصت الاجراءات واللحين بناخذه للدفن وزوجته منومة هنا ( وهو يأشر على غرفة الطوارئ) وبنتهم عندها بس البنت تبي تروح للمقبرة كونه مالهم احد
رعد : بروح اكلمها ونروح انا وانت للمقبرة ندفنه ونرجع لهم وبعدها بمشي للمزرعة جدي طالبني
هز سلطان راسه بهدوء واتجه رعد لغرف الطوارئ وتحديدا غرفة ام ورد طق الباب ونادى باسم ورد وبعد ثواني طلعت ورد وتفاجئت بوجوده ونطقت باستغراب : انت ؟ وش تسوي هنا
رعد بهدوء : اولا عظم الله اجرك بوفاة ابوك وثانيا جيت وقت سمعت بوفاة ابوك وجيت اتأكد ومع الاسف طلع صحيح وثالثا واخيرا جيت اقولك اجلسي عند امك بروح انا وسلطان بندفن ابوك وبرجع اطمن على الوالدة
ورد بقوة : مابي منك شيء ومالك دخل بابوي ولا فينا يكفي الي جانا منكم انت وجدك الي مدري وش جاء يسوي عند ابوي
قاطعها رعد : الكلام هذا مو وقته وانا وانتي مو فاهمين شيء ولا نعرف وش علاقة ابوك بجدي ومتأكدين في شيء مخبا وبنعرفه قريب لكن اللحين الشيء المهم هو اكرام الميت دفنه وتعرفين انك ما يجوز انتي تدفني ابوك وغير كذا انا موجود اعتبريني اخوك او الي ودك فيه
ورد بقوة غريبة : قلت لك مالك دخل اطلع من هنا وغير كذا اخو صديقتي موجود وهو بيدفنه انت مالك دخل فينا وكلامك الي قلته كله ما يهمني ومابي اعرف شيء خلاص
رعد بهدوء : زين الي تبين انتي اللحين تعبانة ارتاحي ويصير خير بعدها
ورد ما ردت عليه وتركته ودخلت لامها اما رعد تنهد بضيق ورجع لسلطان واخذوا ماجد ودفنوه بالمقبرة وبعد ما انتهوا قرؤوا الفاتحة على روحة ورجعوا للمستشفى وطلب رعد من سلطان يطمن على حالة ام ورد ويرجعهم البيت وهو مشى للمزرعة بيحط حد للموضوع ويكشف السر الي وصل عائلة ماجد لهالحالة وما بيسمح بالظلم يدوم وبيرجع حق ماجد واهله لو كان لهم حق مثل ما قالت ورد.

انتهى 💛

اعتذر على التأخير بتنزيل البارتات لكن صدقا ظروفي ما تسمح لي اجلس واكتب لكم لكن بعوضكم باذن الله وبحاول انزل لكم هاليومين كمان بارتات 💛🦋

وش رأيكم بالبارت 🤗
ووش توقعاتكم للأحداث الجاية 🤔
لا تنسوا التصويت يحلوين 🌟 💛