يا عمري اللي ضاع نهب وغبينة

واحد:

( 🔺 تنويه: أي نصوص أدبية في هذه الرواية سواء كانت عاميّة أو بالفصحى هي بقلمي، ما عدا تلك التي سأضعها بين علامتي التنصيص "" )

صرخ بانزعاج من صوت الباب اللي يندق بصوت مزعج متكرر، ووقف يمشي بخطوات سريعة غاضبة: خيرر خيررر !!

ارتفعت حواجبه بادراك لما شاف امه: ااا.. يمه؟ .. السموحة جعلني فداك، والله ناسي اني عندكم احسبها شقتي والعامل يدق الباب

عطته نظرة حادة ثم دخلت وهي تمشي على عكازها، وبالقوة منع نفسه عن مساعدتها، لأنه يعرف عزة النفس اللي في كبار السن خصوصا البدو، مستحيل تسمح للضعف يغلبها، او تسمح لاحد يساعدها ..

لحقها وجلس جنبها ع الكنب وحاول يسأل بأدب: عسى خير يمه؟ بغيتي شيء؟
سحبت نفس طويل، وهي تطالع الارض، ثم قالت: ولد اختك الله يرحمها .. حاطينه بالتوقيف، ظنّتي ( أظن) انه متفاضخٍ له (متضارب) مع شباب .. او الله اعلم
عقد حواجبه وملامحه تجمعت في نصف وجهه باشمئزاز: وانا وش علي منه ؟!

تجعّد جبينها وحواجبها ارتفعت وطالعته بحدة: لا تنطُر يا ولد ( لا ترفع صوتك)
تنهد وغلب صوته الندم: المعذرة .. أخذ نفس وكمّل: يمه يا جعلني فداك انتي تدرين ان طاريه ينرفزني ويقرفني .. مابي اسمع عنه شيء

ضربت بعكازها الارض: ان شاءالله بتسمع .. بتسمع زييين
زادت عقدة حواجبه وبضيق: كيف يعني ؟ وش مطلوب مني الحين؟ ترا توي راجع من الرياض وتعبااان مالي خلق هالمواضيع
تكلمت بصرامة: المطلوب منك تروح له .. ف الرياض، وتطلعه من التوقيف وتسكّنه معك في شقتك وتنتبه له
ضحك بصدمة: ايش ؟! انا؟؟؟ تمزحين يمه صح ؟!
بانت ملامح الغضب عليها وفي نبرتها: انا وشني قايله قبيل؟! ( وش قلت قبل شوي) انت تحسبني واحدً من اخوياك يوم تنطرني ؟! (تنطرني: ترفع صوتك علي)
طالع بالارض وبضيق: لا والله الا تكرمين يانظر عيني وجعل صوتي ينقطع ان زاد رفعته بس ..
رفعت صوتها بصرامة: لا تبسبس عندي .. اسرْ يالله اسرْ روح للولد

وقف وهو يمسك شعره ويرفعه لفوق بقوة: يمه انا مالي شغل فيه ! من متى وحنا نسأل عنه او نهتم له ؟!! من قالك اصلا انه ف التوقيف؟! هو اتصل وتبكبك صح ؟!!
صدّت عنه وقالت: لا .. خوي اخوك متعب يشتغل في القسم اللي توقّف فيه .. انفصحنا قدام الرجال، يقول دور في ملفه عشان يتواصل مع اقاربه ومحد رد وشاف اسم امه الله يرحمها فيه اسم عايلتنا .. ودق على اخوك وقال له

تكلم بسرعة وكأنه وجد الحل: خلاص أجل .. يعني متعب يتكفل فيه، انا مالي شغل !
ضربته بعصاها على رجله: انت صاحي ؟!! متعب ماعنده شقة في الرياض ورجالٍ متزوج وعنده عيال ماهوب فاضي !!

جز على اسنانه وهو يدور بالغرفة ويده تفرك شعره من وراء ومشى لين وقف قدام الشباك يطالع للمنظر تحت، وشرد ذهنه ..