(((عسل مر))))). البارت الاول
اني علي مواليد ٩٠ طولي ١٧٠ وزني ٧٥ حنطاوي شكلي حلووو
اني من الكوت من عائله متوسطة الدخل
ابوي موضف بلري وامي ربت بيت
احنا تسع نفرات سبع ولد وثنيين بنات
عايشين بيت جدي ابو ابوي
جدي كلش عصبي ويريد كلشي يمشي مثل ماهو يريد
بيبيتي متوفيه الله يرحمها
عندي عمات اثنيين طبعا ابوي الجبير
عمتي سناء متزوجه بلبصره وعدها خمس جهال
تجينا مره وحده بلسنه تبقى اسبوع وتروح
وعمتي ليلي ازغر وحده
متزوجه بغداد
اعيالها جانو جيرانه بلكوت وأم زوجها شافتها وخطبتها
بس عمتي ابد مامرتاحه عد عيالها
زوجها يدور بنات ويعاملها بتكبر ويحتقرها
يوميه عركه هو وياها
ورا زواجهم بثمن اشهر اتعارك وياها و طردها
بس للاسف طلعت حامل ورجعته عمته ام زوجه
من رجعت زاد عناد وياها وهجرها بس جان عدها امل
من يصير عدهم طفل يتغير للاحسن
بس ماكو فايده حتى يخابر بنات كدامها
اني تسلسلي بلعائله ماقبل الاخير
طبعا امي عبالك ارنب ماتمر سنه مو حامل
كل سنه حامل
وابوي الله يسلمه نشط مامنطيها مجال ابد
على العموم الراتب جان مايكفينا بلكوه مدبرين امورنا
اخواني الكبار بلعطله يشتغلون حتى يساعدون اهلي
بس هم ضروفنا صعبه لان هواي
احنا وامي وابوي وجدي ١٣ نفر
جدي جان يشجع ابوي على الإنجاب لان ابوي وحيد ويكول ذوله ولده عزوته وقوته
من صار عمري ست سنوات جدي اخذني يسجلني بلمدرسه
طبعا المدرسه قريبه علينا كلش
شارعين ونوصل
وعندي ٣ من اخواني وخواتي وياي بلمدرسه بس كل واحد بصف
وصلنا وسجلني بلمدرسه وجنت كلش فرحان
رجعنا للبيت ولكينا عمتي الزغيره ليلي عدنا بلبيت وتبجي
قبل كم شهر جابت بنيه تخبل سمتها عسل
زوجها ماخذ البنيه وطاردها
يكلها اريد ازوج انتي مو مستواي
اني احب وحده واريد ازوجها
ماجرلها سياره ودازها وكايللها ورقتج توصلج وكل حقوقج
جدي حيل ضاج ونفعل من شافها
بعدين كال
هاي الزواجه كله غلط من البدايه حرامات عفناج تعيشين ويه واحد ضالم مثل هذا
ليلى بويه بنتي اريد بنتي
الحجي بويه قابل انربي بت الناس خليها عندا هو يحير بيها
ليلى اريد بنتي واتنازل عن كلشي
الحجي اسكتي بتهم خليها عدهم انتي بعدج زغيره تزوجين وتخلفين بدال البنيه عشره
عمتي لان تعرف جدي عصبي ومستحيل يتناقش سكتت
بس لاليله ليل ولا نهارها نهار
تبجي ليل ونهار على بتها
وصدرها ورم من الحليب
اني جنت اكثر واحد متعاطف وياها بلبيت
كاعد يمها
وكلما تبجي امسح دموعها
جانت ماتكدر تنام بليل ادز اخوي الجبير يجيبها حب منوم
حتى تكدر تنام
بس ولله تكسر الخاطر
تاكل كلش قليل وبس تبجي
علي.. عمه لاتبجين اني من أكبر اروح اجيب عسوله واجي
باوعت عليه وكامت تبجي بلزايد
طبعا عمتي كلش حلوووه بيضه وعيونها كبار وعدها غمازات
وشعرها اسود طويل
وشغلها وتنضيفها يخبل بس شسوي للحظ الي ماكعد وي زوجها
على العموم عمتي تمرضت واني لازك الها لزك
جانت تنومني بحضنها حتى تعوض النقص الي جاي تحس بي
مرت الايام وبدت حالته شويه تتحسن
هي مانست بتها ابد بس صارت شوبه احسن
كامت تشتغل بلبيت ويه امي
واني صرت ابنها بلفعل انام بحضنها وتقريني وتكتبني دروسي وتسبحني وتغسل ملابسي
حتى من احتاج شي من امي تكلي روح العمتك هي تسويلك اي شي تريده
مشت الايام وعمتي جانت تسئل دائما وتريد تعرف اخبار بتها
جان عدها الرقم الأرضي مال جيران عيالها بغداد
وبين فتره فتره تتصل تطمن على بتها
عرفت زوجها ازوج البنيه الي يريدها
وبتها عد بيبيتها مو عد زوجت ابوها وبيبتها حيل معتنيه بيها
هاي الاخبار كانت اطمن عمتي عليها
بس يبقى كلبها على بتها مثل النار
تفوقت بلمدرسه بسبب عمتي لان جانت تقريني وتكتبني
ومهتمه بيه
تحاول تعوض النقص بحياتها بوجودي
والصراحه اني هم تعودت عليها
واول ما ادخل للبيت اروح عليها كبل
البيت كله كام يصيحلها ام علي على اسمي
يتبع
