زمان كنت غريب و دخيل علي عشي
و اخدت نصيب من قلبت وشي
و لمحت الخوف ساكن في سنيني
و رقبتك داقت نار سكيني
كنت اما القاك اتضايق وامشي
ويوم والتاني الكره مدامشي
و قَدرنا ربطنا لطول الدهر
و صيرت قريب لعنيا ك رمشي
وصبحت حبيب و سند وضهر
ومحيت بوجودك كل القهر
انا شفت ليك أشكال والوان
جواك كان ميت مليون إنسان
واحد كان اب كبير وأمان
والتاني حبيب بيشع حنان
والتالت طفل تايه عن امه
كان كل أحلامه يشوفها تضمه
والرابع كان اطيب إنسان
والخامس كان مجرم هربان
و كتير بيبانو في كل مكان
كنت اما تعيط تندهلي
وتقولي انا شايف فيكي أهلي
الدنيا بسرعة برق أذتني
وانتي عالجتيني و علي ماهلي
جاي بعد ده كله تسيب و تغيب
و تعود من تاني بعيد و غريب
وتشيل ب ايديك إحساس الضهر
واهو طال الغياب وحضرنا القهر
و كملت أيام وصلت للشهر
و حاوطني الخوف ورجع من تاني
بقا جنبي قريب بقا جار لمكاني
وغريبي حبيبي سكن احلامي
بقا بس يخصه معايا كلامي
واشعاري وكام ذكرى لاغاني
واهو ريحته دخلت جوا احلامي
ده خيال من كتر همومي
ولا يمكن داخل اوضتي حرامي
اه ياخوفي واه يا غلب سنيني
ده حبيبي رجع عينه فعيني
ونصيبه يدوق تاني سكيني
